ދައުލަތުން ބޭނުންވަނީ އަބަދުވެސް އަޅުގަނޑު "ފިއްތާލާފައި" ބަހައްޓަން: އަދީބު
23 ޖުލައި 2020 | ބުރާސްފަތި 07:45މިއަދު 15:00 ގައި އިތުރު އަޑުއެހުމެއް ބާއްވަނީ
ކުރީގެ ނައިބު ރައީސް އަހުމަދު އަދީބު: އަދީބު ފިލުމުގެ ފުރުސަތު އެބައޮތް ކަމަށް ދައުލަތުން ބުނޭ
ދައުލަތުން (ޕްރޮސެކިއުޓަރ ޖެނެރަލްގެ އޮފީހުން) ބޭނުންވަނީ އަބަދުވެސް އޭނާ "ފިއްތާލާފައި" ބަހައްޓަން ކަމަށް ކުރީގެ ނައިބު ރައީސް އަހުމަދު އަދީބު ވިދާޅުވެއްޖެއެވެ.
އަދީބު މިހެން ވިދާޅުވީ، އެމްއެމްޕީއާރުސީގެ ހިޔާނާތާ ގުޅިގެން، އޭނާގެ މައްޗަށް ދައުލަތުން އުފުލި 7 ދައުވާ ކްރިމިނަލް ކޯޓުން ބާޠިލް ކުރުމާ ގުޅިގެން، އެމައްސަލަތައް ހައިކޯޓުގައި އިސްތިއުނާފު ކުރުމުން، ހައިކޯޓުގައި ބޭއްވި އަޑުއެހުމުގައެވެ. އަދީބުގެ އިސްތިއުނާފު މައްސަލަ ކުރިއަށް ގެންދިއުމުގެ ކުރިން، ބުރާސްފަތި ދުވަހު ބޭއްވި އަޑުއެހުމަކީ، އަދީބުގެ ޝަރީއަތް ނިމެންދެން ބަންދުކުރުމުގެ އަމުރަކަށް ދައުލަތުން އެދިފައިވާތީ، އެކަމަށް ގޮތެއް ނިންމުމަށް ބޭއްވި އަޑުއެހުމެކެވެ.
ނަމަވެސް އަޑުއެހުމަށް އަދީބު ވަޑައިގެންނެވީ ގާނޫނީ ވަކީލަކާ ނުލައެވެ. އަދީބު ވިދާޅުވީ، މައްސަލަައިގެ ލިޔެކިޔުންތައް އޭނާއަށް ލިބުނީ ބުދަ ދުވަހު ކަމަށާއި، އެހެންކަމުން އަދި މިހާތަނަށް ގާނޫނީ ވަކީލެއް އައްޔަން ކުރެވިފައި ނުވާ ކަމަށެވެ. އަދި ގާނޫނީ ވަކީލެއް އައްޔަން ކުރުމުގެ ފުރުސަތު ދެއްވުމަށް އަދީބު އެދިލެއްވި އެވެ.
އަދީބުގެ ވާހަކަތަކަށް ރައްދު ދެއްވަމުން، ދައުލަތުގެ ވަކީލު ވިދާޅުވީ، ގާނޫނީ ވަކީލެއް އައްޔަން ކުރުމުގެ ފުރުސަތު އަދީބަށް ލިބެންޖެހޭ ކަމަށް ދައުލަތުން ވެސް ގަބޫލު ކުރައްވާ ކަމަށާއި، ނަމަވެސް، މިއަޑުއެހުމަކީ، ޝަރީއަތް ނިމެންދެން އަދީބު، ބަންދުގައި ބެހެއްޓުމާމެދު ގޮތެއް ނިންމުމަށް ބޭއްވޭ އަޑުއެހުމަކަށްވާތީ، މިފަދަ މައްސަލަތައް، އަހަވަށް ގޮތެއް ނިންމަންޖެހޭ ކަމަށެވެ. އަދި މައްސަލައިގެ ލިޔެކިޔުންތައް އަދީބަށް ބުދަ ދުވަހު ލިބިފައިވާއިރު، ގާނޫނީ ވަކީލެއް އައްޔަން ކުރަން އެކަށީގެންވާ ފުރުސަތު ދެވިފައިވާ ކަމަށް ދައުލަތުން ގަބޫލު ކުރާކަމަށް ވެސް ވަކީލް ވިދާޅުވި އެވެ.
މީގެ އިތުރުން ދައުލަތުގެ ވަކީލު ވިދާޅުވީ، އަދީބަކީ ކުރިންވެސް ފިލާފައިވާ ފަރާތަކަށްވާތީ، ފިލުމުގެ ފުރުސަތު ވެސް އެބައޮތް ކަމަށެވެ.
ދައުލަތުގެ ވަކީލު ވިދާޅުވީ، ގާނޫނީ ވަކީލެއް އައްޔަން ކުރުމަށް އަދީބަށް ފުރުސަތެއް ދެއްވުމަށްފަހު، މިއަދު އިތުރު އަޑުއެހުމެއް ބާއްވާ ދެއްވުމަށް ދައުލަތުން އެދޭ ކަމަށެވެ.
ދައުލަތުގެ ވަކީލުގެ އެވާހަކަތަކަށް ރައްދު ދެއްވަމުން އަދީބު ވިދާޅުވީ، އަބަދު ވެސް ދައުލަތުން ބޭނުންވަނީ "ފިއްތާލާފަ" ކަމަށް އޭނާ ބަހައްޓަން ކަމަށެވެ. އަދި ދައުލަތުގެ އަމަލުތަކުން ވެސް އެގޮތަށް އިހުސާސް ކުރެވޭ ކަމަށެވެ.
އަދީބު ވިދާޅުވީ، އޭނާ ފިލި މައްސަލާގައި ހުކުމްކޮށް ހުކުމް ތަންފީޒުކޮށް މިނިފައިވާއިރި، އޭނާއަކީ "ތާއަބަދު" ފިލާނެ މީހެއްކަމަށް ދައުލަތުން ގަބޫލުކުރާތީ ހިތާމަ ކުރައްވާ ކަމަށެވެ.
އަދީބުގެ އެވާހަކަ އާއި ދައުލަތުގެ ވަކީލުގެ ވާހަކަތަށް ރިއާޔަތްކޮށް، މިމައްސަލަ ބައްލަވާ ފަނޑިޔާރުންގެ ބެންޗުގެ ފަނޑިޔާރު މުހައްމަދު ނިޔާޒު ވިދާޅުވީ، "ދައުލަތުން އެބުނާ ތްރެޓް އެބައޮތް" ކަމަށެވެ. އެހެންކަމުން، ޝަރީއަތް ނިމެންދެން އަދީބު ބަންދުގައި ބެހެއްޓުމަށް ދައުލަތުން އެދިފައިވާތީ، އެކަމަށް އަވަހަށް ގޮތެއް ނިންމަން ޖެހޭ ކަމަށެވެ.
ފަނޑިޔާރުންގެ ބެންޗުން ނިންމީ، އަދީބަށް ގާނޫނީ ވަކީލެއް އައްޔަން ކުރުމަށް އިތުރު ފުރުސަތެއް ދެއްވުމަށްފަހު، ބުރާސްފަތި ދުވަހު (މިއަދު) 15:00 އަށް އިތުރު އަޑުއެހުމެއް ބޭއްވުމަށެވެ.
އަދީބުގެ އިސްތިއުނާފުގެ މައްސަލަތަކުގެ ޝަރީއަތް ކުރިއަށް ގެންދަވަނީ، ހައިކޯޓުގެ ފަނޑިޔާރުން ކަމަށްވާ، ޝުޢައިބު ހުސައިން ޒަކަރިއްޔާ އާއި ފަނޑިޔާރު މުހައްމަދު ނިޔާޒު އަދި ހުސައިން މަޒީދު އެވެ.
