މާލެ ސިޓީގެ ސްކޫލުތަކުގައި މިހާރު ކިޔަވައިދޭން ފަށާފައިވާ ގްރޭޑްތަކުގެ އިތުރުން އެހެން ގްރޭޑްތަކަށް ކިޔަވައިދޭން ފެށި ނަމަވެސް އިތުރު ނުރައްކަލެއް ނެތް ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ) އިން ބުނެފިއެވެ.

ބުދަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގް ވިދާޅުވީ އަންގާރަ އަދި ބުދަ ދުވަހު ޕޮޒިޓިވްވި ކޭސްތަކުގައި ކުޑަ ކުދިން ހިމެނޭ ކަމަށެވެ. މީގެ ތެރޭގައި ސްކޫލު ކުދިންނާއި އަދި ސްކޫލުގެ ބައެއް ސްޓާފުން ވެސް ޕޮޒިޓިވްވެފައިވާ ކަމަށް ޑރ. ނަޒްލާ ވިދާޅުވިއެވެ. ނަމަވެސް މިވަގުތު ސްކޫލަށް ދާ ކުއްޖެއް ޕޮޒިޓިވް ނުވާ ކަމަށާއި، ސްޓާފުންގެ ތެރެއިން ޕޮޒިޓިވްވި ސްޓާފުންނަކީ ސްކޫލު މާހައުލުން ޕޮޒިޓިވްވި ކޭސްތައް ނޫން ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ ސްކޫލުގެ މާހައުލުގައިި މާސްކް އެޅުމާއި ގައިދުރުކަން ބެހެއްޓުމަށް ވަރަށް ބޮޑު ސަމާލުކަމެއް ދީފައިވާތީ ސްކޫލު މާހައުލުގައި ކޮންޓެކްޓުން އެއްގޮތަކަށް ވެސް ނުފެންނަ ކަމަށެވެ.

މީގެ އިތުރުން ޑރ. ނަޒްލާ ވިދާޅުވީ މާލެ ސިޓީގެ ސްކޫލުތަކުގައި ބައެއް ގްރޭޑްތަކުގެ ކިޔެވުން ފެށުމަށް އެޑިއުކޭޝަން މިނިސްޓްރީއާއެކު ގިނަ މަސައްކަތްތަކެއް ކުރެވުނު ކަމަށާއި، ކިޔެވުން ފެށީ ނުރައްކަލެއް ނެތްކަން ޔަގީން ކުރުމަށްފަހު ކަަމަށެވެ. އެގޮތުން ސްކޫލުތަކުގައި ރައްކާތެރި މާހައުލެއް ގާއިމު ކުރުމަށް ކުރޭވެ ކަންތައްތަކާ ބެހޭ ގޮތުން މަޝްވަރާ ކޮށްފައިވާކަން ޑރ. ނަޒްލާ ފާހަގަކުރެއްވިއެވެ.

ޑރ. ނަޒްލާ ވިދާޅުވީ އެކެއް ޖުލައި ސްކޫލުތައް ހުޅުވައި ކިޔަވާ ދިނުމުގެ މަސައްކަތްތައް ކުރިއަށް ދިޔަ ނަމަވެސް މިއަދާ ހަމައަށް ސްކޫލުގެ ތެރެއިން ކޭސްއެއް ފެނުން ނުވަތަ ބަލި ފެތުރޭ މިންވަރު ވަރަށް ކުޑަ ކަމަށެވެ. ނަމަވެސް ކޮމިއުނިޓީ ތެރޭގައި ބަލި އުޅޭއިރު، ޕޮޒިޓިވް ކޭސްތައް ފެންނާނެ ކަމަށާއި، ސްކޫލުތަކުގައި ރަނގަޅު ފިޔަވަޅުތަކެއް އެޅިފައި ހުރުމުން ކޮންޓެކްޓުންގެ ގޮތުގައި ސްކޫލުގެ ތެރެއިން ފާހަގަކުރެވޭ މީހުން ވަރަށް މަދު ކަމަށް ޑރ. ނަޒްލާ ވިދާޅުވިއެވެ.

ސްކޫލުތަކަށް ކުދިން ފޮނުވަން ބައެއް ބެލެނިވެރިން ޖެހެލުންވާކަން ފާހަގަކުރައްވައި ޑރ. ނަޒްލާ ވިދާޅުވީ ކިޔަވައި ދިނުމަކީ މުހިންމު ކަމެއް ކަމަށާއި، ސްކޫލަށް ކުދިން ފޮނުވަން ޖެހޭ ކަމަށެވެ. އެއީ އެކުދިންނާ އެކުވެގެން ކިޔަވައި އެ މާހައުލުގައި އުޅުމަކީ އެކުދިންގެ ހެދިބޮޑުވުމާ ގުޅިފައިވާ ކަމެއް ކަމަށް ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ ކޮވިޑް-19 ޖެހުނު ކުޑަކުދިން ރާއްޖޭގައި ވަރަށް ގިނަ ކަމަށާއި، މިކުދިންނަށް ބަލިޖެހިފައިވަނީ ސްކޫލް މާހައުލުން ނޫން ކަމަށެވެ. އަދި ވިދާޅުވީ ކުޑަކުދިންނާއި، ބަލީގެ ހައިރިސްކް މީހުން ބަލިން ރައްކާތެރި ކުރުމަށް ގެއިން ބޭރަށް ނުކުންނަ މީހުން ބަލިން ރައްކާތެރިވުމަށް އަޅަންޖެހޭ ފިޔަވަޅުތައް އަޅައި އިތުރު ސަމާލުކަމެއް ދޭންޖެހޭ ކަމަށެވެ.

އެޑިއުކޭޝަން މިނިސްޓްރީން ބުނީ އީދު ބަންދަށްފަހު މި އަންނަ މަހު ސްކޫލްތައް އަލުން ހުޅުވާލާއިރު، މާލެ ސިޓީގެ ގްރޭޑް 7 އަދި 8 ދަރިވަރުންނަށް ކިޔަވައިދޭން ފެށުމަށް ތައްޔާރުވަމުންދާ ކަމަށެވެ. އަދި ކޮވިޑް-19ގެ ހާލަތަށް ބެލުމަށްފަހު އިތުރު ގްރޭޑްތަކަށް ވެސް ކިޔަވައިދޭން ފަށާނެ ކަމަށް މިނިސްޓްރީން ބުނެއެވެ.