ޕްރޮގްރާމެއް ފުރިހަމަ ކުރުމުން ވަކީލު ކަމުގެ ހުއްދަ ދޭންޖެހޭ ގޮތަށް ފާސްކޮށްފި
މިއިސްލާހު ފާސްކުރީ 71 މެމްބަރުންގެ ވޯޓުން
ބާކައުންސިލްގެ މެމްބަރުންތަކެއް
ގާނޫނީ ވަކީލު ކަމުގެ ހުއްދަ ނުލިބި ގިނަ ދުވަސްވެފައި ތިބި ފަރާތްތަކުން ބަރ ކައުންސިލުން ހިންގާ މަސް ދުވަހުގެ ތަމްރީނު ޕްރޮގްރާމެއް ފުރިހަމަ ކުރުމުން ވަކީލު ކަމުގަ ހުއްދަ ދެވޭ ގޮތަށް ގާނޫނީ ފަންނުގެ ގާނޫނު އިސްލާހުކޮށް މަޖިލީހުން ފާސްކޮށްފިއެވެ.
ބުދަ ދުވަހުގެ ޖަލްސާގައި މި އިސްލާހު ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެ ވަޑައިގެންނެވި 71 މެމްބަރުންގެ އިއްތިފާގުންނެވެ.
މިދިޔަ އަހަރު އަމަލު ކުރަން ފެށި ގާނޫނީ ފަންނުގެ ގާނޫނު އޮތްގޮތުން ވަކީލުކަމުގެ ހުއްދަ ދެވޭނީ ބަރ ކައުންސިލުން ކަނޑައަޅާ ބަރ އިމްތިހާނެއް ފުރިހަމަ ކުރުމާއެކު ބަރ ކައުންސިލުން ކަނޑައަޅާ ތަނެއްގައި ވަކި މުއްދަތެއް ވަންދެން ތަމްރީނު ޕްރޮގްރާމެއް ފުރިހަމަ ކުރުމުންނެވެ. އެހެންނަމަވެސް ބަރ އިމްތިހާނެއް ނުބޭއްވޭތީ ވަކީލުކަން ކިޔަވައިގެން ތިބި ގިނަ ބަޔަކަށް ވަކީލު ކަމުގެ ހުއްދަ އޮތީ ނުލިބި އެވެ. އެއާއެކު ގިނަ ބަޔަކު އަންނަނީ އެކަމުގެ ކަންބޮޑުވުން ފާޅުކުރަމުންނެވެ.
އެހެންކަމުން އެކަމަށް ހައްލު ގެނައުމަށް ޚާއްސަ ޕްރޮގްރާމެއް ފުރިހަމަ ކުރުމުން އެ ހުއްދަ ދެވޭ ގޮތަށް ގާނޫނު އިސްލާހު ކުރަން ހުށަހެޅުއްވީ ދަނގެތި ދާއިރާގެ މެމްބަރު މުހައްމަދު ނާޒިމެވެ.
މިކަމަށް ހައްލެއްހޯދައިދޭ ގޮތަށް މިހާރު މަޖިލީހުން ފާސްކޮށްފައިވާ އިސްލާހުގައި ބުނެފައިވަނީ ވަކީލުކަމުގެ ހުއްދަ ނުލިބި ތިބި ފަރާތްތަކަށް އަމާޒުކޮށް އެއް މަސް ދުވަހުގެ ތަމްރީނު ޕްރޮގްރާމެއް ބަރ ކައުންސިލުން ހިންގައި، އެ ޕްރޮގްރާމުން ފާސްވާ ފަރާތްތަކަށް ވަކީލުކަމުގެ ހުއްދަ ދޭންޖެހޭނެ ކަމަށެވެ. އެކަމަކު އެ ފަރާތްތަކަށް ހުއްދަ ދިނަސް، ބަރ އިމްތިހާނެއް ބާއްވާއިރު، އެ އިމްތިހާނުގައި ބައިވެރިވާން އެ ފަރާތްތަކަށް ލާޒިމްވާނެ ކަމަށް ވެސް އެ ބިލުގައިވެ އެވެ.
އިސްލާހުގައި ބުނެފައިވަނީ އެ އިސްލާހު މަޖިލީހުން ފާސްކޮށް ގެޒެޓުގައި ޝާއިރު ކުރާ ދުވަހުން ފެށިގެން ހަތް ދުވަހުގެ ތެރޭގައި އެ ތަމްރީނު ޕްރޮގްރާމްގެ ބައިވެރިންގެ ފެންވަރު ވަޒަންކުރާނެ ގޮތް ބަޔާންކުރާ އުސޫލެއް ބަރ ކައުންސިލުން އެކުލަވާލައި، ގެޒެޓް ކުރަން ޖެހޭނެ ކަމަށެވެ. އަދި އެ އުސޫލު ގެޒެޓް ކުރާތާ ހަތް ދުވަހުގެ ތެރޭގައި ތަމްރީނު ޕްރޮގްރާމް ބާއްވަން ޖެހޭނެ ކަމަށްވެސް އިސްލާހުގައި ވަނީ ބުނެފަ އެވެ.
އެއްމަސް ދުވަހުގެ ތަމްރީނު ޕްރޮގްރާމެއް ފުރިހަމަ ކުރުމުން ވަކީލު ކަމުގެ ހުއްދަ ލިބެނީ މިހާރު ހުވާ ނުކުރެވި ތިބި ވަކީލުކަން ކިޔަވައިގެން ތިބި ކުދިންނަށެވެ. އޭގެ ފަހުން ކިޔަވާ ކުދިންނަށް ހުއްދަ ލިބޭނީ ބަރ އިމްތިހާނު ފުރިހަމަ ކުރުމުން ކަމަށް ގާނޫނީ ފަންނުގެ ގާނޫނުގައި ބުނެފައިވެ އެވެ.
