ޓޫރިޒަމް ދާއިރާއިން ވަޒީފާ ދިނުމުގައި ދިވެހިންނަށް އިސްކަން ދިނުމަށް ގޮވާލައި ހުށަހެޅި ޕެޓިޝަން ފާސްކޮށްފި
މެނެޖީރިއަލް މަގާމުތަކަށް ދިވެހިންނަށް އިސްކަންދީ، އަދި ދިވެހިން ނުލިބިއްޖެ ހާލަތެއްގައި މެނުވީ އެމަގާމުތަކަށް ބިދޭސީ މުވައްޒަފުން ނެނެގުން ހިމެނޭ
ރާއްޖޭގެ ރިސޯޓެއް: ކޮވިޑް-19 އާ ގުޅިގެން ރިސޯޓްތަކުގެ މުވައްޒަފުންނަށް ވަރަށް ބޮޑަށް އަސަރުކުރި، ގިނަ ބަޔެއްގެ މުސާރަ ކުޑަކޮށް، ވަޒީފާއިން ވަކިކޮށް، އަދި ބައެއް ރިސޯޓްތަކުން މުސާރަ ނުލިބޭގޮތަށް ޗުއްޓީ
ޓޫރިޒަމް ދާއިރާއިން ދިވެހި ރައްޔިތުންނަށް ވަޒީފާގެ ފުރުސަތު ދިނުމުގައި އިސްކަން ދިނުމަށް ގޮވާލައި، ރައްޔިތުންގެ މަޖިލީހަށް ހުށަހެޅި ޕެޓިޝަން މަޖިލީހުން ފާސްކޮށްފިއެވެ.
ބުދަ ދުވަހު ބޭއްވި ރައްޔިތުންގެ މަޖިލީހުގެ ޖަލްސާގައި ޕެޓިޝަން ކޮމެޓީން ދިރާސާކޮށް ނިންމި ގޮތުގެ ރިޕޯޓް ފާސްކުރީ، ވޯޓުގައި ބައިވެރިވެވަޑައިގެންނެވި 70 މެމްބަރުންގެ އިއްތިފާގުން ނެވެ.
ކޮވިޑް-19އާ ގުޅިގެން ވަޒީފާގެ ހާލަތަށް ބަދަލު އައިސްފައިވާ ފަރާތްތަކުން ފަތުރުވެރިކަމުގެ ދާއިރާގައި ދިވެހިން ބާރުވެރިކުރުވަން ގޮވާލައި، ރައްޔިތުންގެ މަޖިލީހަށް ހުށަހަޅާފައިވާ ޕެޓިޝަނާ ގުޅިގެން، މަޖިލީހުގެ ޕެޓިޝަން ކޮމިޓީން ދިރާސާކޮށް ނިންމި ގޮތުގެ ރިޕޯޓްގައި، އެޕެޓިޝަނާ ގުޅޭގޮތުން ޓޫރިޒަމް މިނިސްޓްރީއާއި ރިސޯޓް ވިޔަފާރި ހިންގާ ކުންފުނިތަކާއި އަދި ފަތުރުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ ހިޔާލުތަކަށް ރިއާޔަތްކޮށް، މައިގަނޑު ދެކަމެއް ކޮމެޓީން ވަނީ ހުށަހަޅާފައެވެ.
ފުރަތަމަ ކަމެއްގެ ގޮތުގައި ހުށަހަޅާފައިވަނީ، ރިސޯޓްތަކުގެ ހިންގުމުގެ ދާއިރާގެ ވަޒީފާތަކަށް ދިވެހި މުވައްޒަފުންނަށް އިސްކަން ދިނުމަށެވެ. އެގޮތުން، ނަމަވެސް މެނެޖީރިއަލް މަގާމުތަކަށް ދިވެހިންނަށް ފުރުސަތު ދިނުމަށާއި އަދި އެފަދަ މަގާމުތަކަށް ދިވެހިން ނުލިބިއްޖެ ހާލަތެއްގައި މެނުވީ އެމަގާމުތަކަށް ބިދޭސީ މުވައްޒަފުން ނެނެގުން ހިމެނެއެވެ.
ދެވަނަ ކަމެއްގެ ގޮތުގައި ކޮމެޓީން ހުށަހަޅާފައިވަނީ، ރިސޯޓްތަކަށް ދިވެހިން ތަމްރީން ކުރުމުގެ މުހިއްމުކަން ދިނުމަށެވެ. އެގޮތުން، ފަތުރުވެރިކަމުގެ ސިނާއަތުގައި ދިވެހިންނަށް ފުރުސަތު ފަހިކުރުމަށްޓަކައި ބޭނުންވާނެ ތައުލީމާއި ތަމްރީންތައް ދިވެހިންނަށް ލިބޭނެ އިންތިޒާމު ސަރުކާރުން ހަމަޖައްސާ ދިނުން މުހިއްމު ކަމަށާއި އެކަމަށް މަގުފަހިކުރުމުގެ ގޮތުން ކަމާގުޅޭ އިދާރާތަކަށް ބާރުއެޅުން ހިމެނެ އެވެ. އަދި ފަތުރުވެރިކަމުގެ ދާއިރާގެ ވަޒީފާތަކަށް ބޭނުންވާ އިލްމާއި ހިލްމު އިތުރުކުރުމަށް ސްކޫލް މަންހަޖަށް ބަދަލުތަކެއް ގެންނަންޖެހޭ ކަމަށްވާނަމަ އެބަދަލު ގެނައުމަށާއި، ސަރުކާރުގެ ފަރާތުން، ޓޫރިޒަމް ދާއިރާއިން ކިޔަވާ ފަރާތްތަކަށް އެޕްރެންޓިސް ޕްރޮގްރާމްތައް ހިންގުމާއި އަދި އެފަދަ ޕްރޮގްރާމްތަކުގައި ބައިވެރިވާ ފަރާތްތަކަށް ސްޓައިޕެންޑް ފޯރުކޮށްދިނުން ހިމެނެއެވެ.
ކޮވިޑް-19 އާ ގުޅިގެން، ރާއްޖޭގެ ފަތުރުވެރިކަމުގެ ދައިރާ އެއްކޮށް ހުއްޓި، ގިނަ ބަޔެއްގެ ވަޒީފާއަށް އަސަރުކޮށްފައި ވެއެވެ. އަދި ރިސޯޓްތަކުން ގިނަ އަދަދެއްގެ މުވައްޒަފުން ވަޒީފާއިން ވަކިކޮށްފައިވާއިރު، މުސާރަ ކުޑަކޮށް، އަދި މުސާރަ ނުލިބޭގޮތަށް ޗުއްޓީއަށް ދިއުމަށްވެސް ބައެއް ރިސޯޓްތަކުން މަޖުބޫރުކޮށްފައިވެއެވެ.
