ފަސް ގައުމަކަށް ރާއްޖެއިން ކަނޑައަޅާ ސަފީރުކަމަށް ފަސް ބޭފުޅަކު އައްޔަން ކުރަން ރައްޔިތުންގެ މަޖިލީހުން ރުހުން ދީފި އެވެ.

ބުދަ ދުވަހުގެ ޖަލްސާގައި ސަފީރުކަމަށް ރުހުންދިނުމަށް ފާސްކޮށްފައިވަނީ ޕާކިސްތާނަށް ކަނޑައަޅާ ސަފީރު ކަމަށް ގ. ޗޭނުގޭ، ފަރުޒާނާ ޒާހިރު، ބަންގަލްދޭޝް އަށް ކަނޑައަޅާ ސަފީރު ކަމަށް މ. ޒީނާ، ޝިރުޒިމަތު ސަމީރު، ޔުނައިޓެޑް އަރަބް އެމިރޭޓްސް (ޔޫއޭއީ) އަށް ކަނޑައަޅާ ސަފީރު ކަމަށް ހ. މިސްޓީލޮޖް، އައިިމިނަތު ޝަބީނާ، އިންޑިއާ އަށް ކަނޑައަޅާ ސަފީރު ކަމަށް ހ. ނިޔާސާ ޑރ. ހުސައިން ނިޔާޒު އަދި އދ. ގެ ދާއިމީ މިޝަންގެ ޖެނީވާ އޮފީހުގެ ދާއިމީ މަންދޫބު ކަމަށް ގ. ފަރުކަނި، ޑރ. އަހުމަދު އާސިމް އެވެ.

މީގެތެރެއިން ޝިރުމަތު ސަމީރަށް ރުހުން ދިނުމަށް ފާސްކޮށްފައިވަނީ 68 މެމްބަރުންގެ ވޯޓުންނެވެ. ދެން ތިއްބެވި ބޭފުޅުންނަށް ރުހުންދިނުމަށް ފާސްކޮށްފައި ވަނީ 70 މެމްބަރުންގެ ވޯޓުންނެވެ.

ޑރ. އާސިމް ދާއިމީ މަންދޫބުގެ މަގާމަށް އައްޔަންކުރީ ސްވިޒަލެންޑަށް ރާއްޖެ އިން ކަނޑައަޅާ ނަން ރެސިޑެންޓް ސަފީރު ކަމަށް އައްޔަން ކުރާ ގޮތަށެވެ. ޑރ. ނިޔާޒަށް ރުހުން ދިނީ ނޭޕާލާއި ބޫޓާނުގެ އިތުރުން އަފްޣާނިސްތާނަށް ކަނޑައަޅާ ނަން ރެސިޑެންޓް ސަފީރު ކަމަށް ވެސް އައްޔަންކުރާ ގޮތަށެވެ.

ސަފީރު ކަމަށް ފަސް ބޭފުޅަކަށް ރުހުންދިނުމާއެކު މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ މިބޭފުޅުންނަށް ރުހުން ދިނުމަށް ފާސްވުމާއެކު ރާއްޖެ އިން ގައުމުތަކަށް ކަނޑައަޅާފައިވާ ސަފީރުންގެ ތެރޭގައި އަންހެނުންނާއި ފިރިހެނުންގެ އަދަދު ހަމަހަމަވީކަމަށެވެ. އެހެންކަމުން މިއީ ވަރަށް ތާރީޚީ ދުވަހެއް ކަމަށް އެ މަނިކުފާނު ވިދާޅުވި އެވެ. އެހެންނަމަވެސް ސަފީރުންގެ ގޮތުގައި ތިއްބެވީ ކިހާ އަދަދެއްގެ ބޭފުޅުންކަމެއް ނަޝީދު ވިދާޅެއްނުވެ އެވެ.