ރާއްޖެޓީވީ އާއި އާރކް ގުޅިގެން ކުޑަކުދިންނަށް ހާއްސަ ހޭލުންތެރިކުރުމުގެ ޕްރޮގްރާމެއް
22 ޖުލައި 2020 | ބުދަ 09:18ކުރިޔަށް އޮތް 6 މަސް ދުވަހު ހަފްތާއަކު އެއް ދުވަހު ޕްރޮގްރާމް ގެނެސްދޭނެ
ރާއްޖެޓީވީ އަދި އާރކް ގުޅިގެން ޕްރޮގްރާމް ގެނެސްދިނުމަށް އެމްއޯޔޫގައި ސޮއި ކުރަނީ
ރާއްޖެޓީވީ އާއި އެޑްވޮކޭޓިންގ ދި ރައިޓްސް އޮފް ޗިލްޑްރަން (އާރކް) ގުޅިގެން ކުޑަކުދީންނަށް ހާއްސަ ހޭލުންތެރި ކުރުމުގެ ޕްރޮގްރާމެއް ހިންގުމަށް އެމްއޯޔޫއެއްގައި ސޮއިކޮށްފިއެވެ.
އެއްބަސްވުމުގައި ސޮއި ކުރުމަށް ބުދަ ދުވަހުގެ ހެނދުނު ރާއްޖެޓިވީގައި އޮތް ބައްދަލުވުމުގައި އާރކްގެ ފަރާތުން ސޮއި ކުރެއްވީ، އެގްޒެކްޓިވް ކޮމިޓީ މެމްބަރު މުރުތަލާ މޫސާއެވެ. އަދި ރާއްޖެޓީވީގެ ފަރާތުން އެއްބަސްވުމުގައި ސޮއި ކުރެއްވީ ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދުއެވެ.
އެއްބަސްވުމުގައި ސޮއި ކުރެއްވުމަށް ފަހު އިންޓަވިއު ދެއްވަމުން، މުރުތަލާ ވިދާޅުވީ އެއްބަސްވުމުގެ ދަށުން ކުރިޔަށް އޮތް ހަ މަސް ދުވަހު ކޮންމެ ހަފްތާއަކު އެއް ދުވަހު ކުޑަކުދީންގެ ހައްގުތަކާއި ބެހޭ އެކި ދާއިރާތަކަށް އަލިއަޅުވައި ޕްރޮގުރާމް ކުރިޔަށް ގެންދާނެކަމަށެވެ.
މީގެ އިތުރުން ރާއްޖެޓީވީގެ ނޫސްވެރިންނަށް ހޭލުންތެރިކުރުމުގެ ޕްރޮގުރާމް ހިންގުމާއި، އާރކްއިން އުފައްދާފައިވާ ހޭލުންތެރިކުރުމުގެ ވީޑިއޯތައް އަހަރު ދުވަހުގެ މުއްދަތައް ވެފައިވާ އެއްބަސްވުމުގެ ދަށުން ދައްކާނެކަމަށް އޭނާ ވިދާޅުވިއެވެ.
ޕްރޮގުރާމްގެ ސަބަބުން މުހިންމު މެސެޖްތަކެއް ލިބި އެފަދަ ކަމެއް ފާހަގަވެއްޖެނަމަ ރިޕޯޓު ކުރާނެ ގޮތާއި އަނިޔާގެ ނިޝާންތައް ދެނެގަންނާނެ ގޮތާއި ބެހޭ މައުލޫމާތު ލިބިގެންދާނެ ކަމަށް މުރުތަލާ ވިދާޅުވިއެވެ. އޭނާ ވަނީ ކުޑަކުދިންނަށް އަމާޒުކުރެވިގެން، މިހާތަނަށް "މި ސްކޭލްގައި" ރާއްޖޭގައި ޓީވީ ޕްރޮގުރާމެއް ކުރިޔަށް ގެންދެވިފައި ނެތްކަން ފާހަގަ ކުރައްވާފައެވެ.
އެއްބަސްވުމުގައި ސޮއި ކުރެއްވުމަށް ފަހު، ރާއްޖެޓީވީގެ ޑެޕިއުޓީ ސީއޯއޯ ނާޒްމީ ސައީދު ވިދާޅުވީ އާރކް އަކީ ކުދީންގެ ހައްުގުތައް ރައްކާތެރިކުރުމަށް ވަރަށް ބޮޑަށް މަސައްކަތް ކުރާ ޖަމިއްޔާއެއް ކަމަށާއި ރާއްޖެޓީވީގެ އެދިލެއްވުމަކަށް ރާއްޖެޓިވީއާއި ގުޅިގެން މަސައްކަތް ފެއްޓެވީތީ ވަރަށް ބޮޑަށް ޝުކުރު އަދާކުރާކަމަށެވެ. އަދި އުންމީދަކީ "ކުދިންނަށްޓަކައި" ނަމުގައި ގެނެސްދޭ ޓިވީ ޕްރޮގުރާމް މެދުވެރިކޮށް ކުދީންގެ ހައްގުތައް ރައްކާތެރިކުރުމަށް ކުރާ މަސައްކަތަށް ރަނގަޅު ކާމިޔާބީތަކެއް ލިބުންކަމަށެވެ.
