ޓެރަރިޒަމްގެ ތުހުމަތުގައި ބަންދުކޮށްފައިހުރި ޔަމަނު މީހާގެ ހާލު ދެރަވެ ފަރުވާދޭނީ

ޓެރަރިޒަމްގެ ތުހުމަތުތަކެއް ކުރެވި ޖަލެއްގައި ބަންދުކޮށްފައި ހުރި ޔަމަނުގެ ރައްޔިތެއް ކަމަށްވާ ޔާސިރު ޔަހްޔާގެ ހާލު ދެރަވެ އިމަރޖެންސީ ގައި ފަރުވާދޭން ފަށައިފިއެވެ.

ޔާސިރަށް ފަރުވާދެމުންދަނީ އައީޖީއެމްއެޗްގައެވެ. އޭނާގެ ހާލު ދެރަވެގެން އިމަރޖެންސީ ގައި ފަރުވާދޭން ފެށީ އަންގާރަ ދުވަހުގެ ހަވީރު 18:30 ގައި ކަމަށް ކަރެކްޝަނަލް ސަރވިސްގެ މީޑިއާ އޮފިސަރު ވަނީ ވިދާޅުވެފައެެވެ. އިތުރު ތަފްސީލެއް އޮފިސަރު ހާމައެއް ނުކުރައްވައެވެ. ޔާސިރަށް މީގެ ކުރިން ހުޅުމާލެ ހުޅުމާލެ ހޮސްޕިޓަލުންވެސް ފަރުވާދިނެވެ.

Advertisement

ޔާސިރު އަކީ މާލޭގައި ދިވެއްސަކާ ކައިވެނިކޮށްގެން ދިރިއުޅެމުންދިޔަ މީހެކެވެ. ޔާސިރު ކޯޓު އަމުރެއްގެ ދަށުން ހައްޔަރު ކޮށްފައިވަނީ 2017 ވަނަ އަހަރުގެ މާޗް މަހުގެ ތިން ވަނަ ދުވަހުގައި ސައުދީ އަރަބިއްޔާގެ ރަސްގެފާނު ރާއްޖެއަށް ކުރައްވަން އުޅުއްވި ދަތުރުފުޅާ ދިމާކޮށެވެ. އޭނާ އޭރު މަސައްކަތް ކުރަމުން ދިޔައީ އަހުމަދިއްޔާ ސްކޫލާއި، އަރަބިއްޔާ ސްކޫލްގެ އަރަބި ޓީޗަރެއްގެ ގޮތުގައެވެ. ޔާސިރު މައްޗަށް ތުހުމަތު ކޮށްފައިވަނީ ޓެރަރިސްޓް ޖަމާއަތަކާ ގުޅިގެން ހަނގުރާމަތަކަށް ރާއްޖެއިން މީހުން ފޮނުވާކަމުގެ ތުހުމަތެވެ.

މިދިޔަ އަހަރުގެ އޮކްޓޫބަރު މަހު ހޯމް މިނިސްޓަރު އިމްރާން އަބްދުﷲ ވިދާޅުވީ، ޔާސިރު އަކީ ޓެރަރިޒަމާއި ގުޅުން ހުރި މީހެއް ކަމަށާއި، ރާއްޖެއިން ފުރައިގެން ދިއުމަށް އޭނާ އަށް އަންގާފައިވާ ކަމަށެވެ. އެކަމަކު އެކަމަށް އެއްބާރުލުން ދީފައި ނުވާ ކަމަށް އިމްރާނު ވަނީ އޭރު ވިދާޅުވެފައެވެ. ޔާސިރުގެ ވިސާ ވަނީ ކެންސަލް ކޮށްފައެވެ.

ޔާސިރު ވަނީ އޭނާގެ ކަންބޮޑުވުންތައް ހިއްސާކޮށް ރައީސް އިބްރާހިމް މުހައްމަދު ސޯލިހު އަށް ސިޓީއެއްވެސް މީގެ ކުރިން ލިޔެފައެވެ.

ޔާސިރާއި ގުޅިގެން ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވީ އޭނާ އަކީ އެކި ގައުމުތަކުގައި ޓެރަރިޒަމްގެ އަމަލުތަކާއި ގުޅިގެން މީގެކުރިންވެސް ރާއްޖެއިން ބޭރުގެ ޖަލުތަކުގައި އުޅެފައިވާ މީހެއްކަމަށާއި ޓެރަރިޒަމާ ގުޅުންހުރިކަމަށް ބެލެވޭ ފަރާތްތަކާ އޭނާއާ ގުޅުން އޮންނަކަން ބައިނަލްއަގުވާމީ ތަހުގީގީ އިދާރާތަކުން މައުލޫމާތު ދީފައިވާ ކަމަށެވެ.