ހަދަމުންދާ ރިސޯޓެއްގައި ބިދޭސީންތަކެއް ހަމަނުޖެހުން ހިންގައިފި
21 ޖުލައި 2020 | އަންގާރަ 03:26އެއްވެސް މީހަކަށް އަނިޔާނުވޭ
ހަމަނުޖެހުން ހިންގި ބިދޭސީން
ވ. އަތޮޅުގައި ތަރައްގީ ކުރަމުންދާ ރިސޯޓެއްގައި މަސައްކަތް ކުރާ ބިދޭސީންތަކެއް ހަމަނުޖެހުން ހިންގައިފިއެވެ.
ހޯމަ ދުވަހުގެރޭ މީޑިއާތަކަށް ފޮނުވި މެސެޖެއްގައި ފުލުހުން ބުނީ، އެ ރިސޯޓުގައި މަސައްކަތް ކުރަމުން ދިޔަ ބިދޭސީ މަސައްކަތްތެރިން، މަސައްކަތަށް ހުރަސް އަޅައި އިހްތިޖާޖުކޮށް ހަމަނުޖެހުން ހިންގުމާއި ގުޅިގެން އެ ރަށުގައި ފުލުހުން ހަރަކާތްތެރިވަމުންދާ ކަމަށެވެ. އެއީ ކޮން ރަށެއް ކަމެއް ފުލުހުން ހާމައެއް ނުކުރެއެވެ.
ފުލުހުން ބުނީ، ހަމަނުޖެހުމުގައި އެއްވެސް މީހަކަށް އަނިޔާވެފައިނުވާ ކަމަށެވެ. ނަމަވެސް އެ ހަމަނުޖެހުމުގައި އެ މީހުންގެ ސުޕަވައިޒަރުގެ ރޫމްއަށް ގެއްލުން ދީފައިވާ ކަމަށް ފުލުހުން މައުލޫމާތުދެއެވެ. މައްސަލަ ހައްލު ކުރުމަށް ސްޕޮންސަރުންނާ ވާހަކަ ދައްކަމުންދާ ކަމަށް ފުލުހުން ބުންޏެވެ. އެކަމަކު މައްސަލަ ހައްލު ކުރެވިފައިވާ ކަމެއް ނުވަތަ ނޫން ކަމެއް ފުލުހުން ހާމައެއް ނުކުރެއެވެ.
ބ. އަތޮޅު ބޮޑުފިނޮޅުގައި ތަރައްގީ ކުރަމުން ދިޔަ ރިސޯޓެއްގައި ބިދޭސީންތަކެއް ހިންގި ހަމަނުޖެހުންތަކާއި އެކު ރާއްޖޭގެ އެކި ސަރަހައްދުގައި ބިދޭސީން ދަނީ އިހްތިޖާޖު ކުރަމުންނެވެ. އޭގެ ތެރެއިން ބައެއް އިހްތިޖާޖުތަކުގައި ފުލުހުންނާ ކުރިމަތިލާ ބައެއް ފުލުހުންނަށް ވަނީ އަނިޔާވެފައެވެ.
