އޮކްސްފޯޑު ވެކްސިން ޓްރަޔަލްގެ ނަތީޖާތައް ކާމިޔާބު، ވެކްސިނެއް ލިބުމުގެ އުއްމީދު ބޮޑު

އޮކްސްފޯޑް ޔުނިވަރސިޓީން ކޮވިޑް-19 އަށް ވެކްސިނެއް ހޯދުމަށް ކުރަމުންދާ މަސައްކަތުގެ ތެރެއިން ކާމިޔާބު ނަތީޖާތަކެއް ނުކުތުމާއެކު، މި ވައިރަސްއަށް ވެކްސިނެއް އުފެއްދިދާނެ ކަމުގެ އުއްމީދު އިތުރަށް ބޮޑުވެއްޖެއެވެ.

ބީބީސީގައި ރިޕޯޓް ކޮށްފައިވާ ގޮތުން ޔުނިވަރސިޓީ އޮފް އޮކްސްފޯރޑުން އުފެއްދި މި ވެކްސިން އިންސާނުންގެ ހަށިގަނޑުގައި މަސައްކަތްކުރާ މިންވަރު ދެނެގަތުމަށް ހަދާފައިވާ "ހިއުމަން ޓްރަޔަލް" އިން ކާމިޔާބު ނަތީޖާތަކެއް ވަނީ ނުކުމެފައެވެ. އެގޮތުން އެއްވަނަ މަރުޙަލާގައި 1077 މީހުން ބައިވެރިކޮށްފައިވާއިރު، ވެކްސިން ހަށިގަނޑަށް ޖެހުމުން ހަށިގަނޑުގެ އެތެރޭގައި "އެންޓިބޮޑީސް"އާއި، ވައިރަސްއާ ހަނގުރާމަކުރާ "ވައިޓް ބްލަޓް ސެލްސް" އުފައްދާކަމަށް ހޯދިފައިވާކަމަށް ސައިންސްވެރިންނާ ޙަވާލާދީ ބީބީސީގައި ރިޕޯޓް ކޮށްފައިވެއެވެ.

އޭގެ އިތުރުން، މި މަރުޙަލާގެ ނަތީޖާތަކާއެކު، ކޮވިޑް-19 އަށް ވެކްސިނެއް ހޯދިދާނެ ކަމުގެ އުއްމީދު ބޮޑުވެފައިވާ ކަމަށާއި، ނަަމަވެސް އެކަން ކަށަވަރު ކުރުމަށް އިތުރު ޓެސްޓުތައް ހަދަން ޖެހޭކަމަށް ސައިންސްވެރިން ބުނެއެވެ.

އިނގިރޭސިލިވާލުން މިހާރުވެސް ވަނީ މި ވެކްސިންގެ 100 މިލިއަން ޑޯޒް ހޯދުމަށް އެދިފައެވެ.

ކޮވިޑް-19 އަށް ވެކްސިނެއް ހޯދުމަކީ މިހާރު އެންމެ ހަލުވިމިނުގައި ފާމަސޫޓިކަލް ކުންފުނިތަކުން ކުރަމުންދާ މަސައްކަތެވެ. މިކަން ކުރުމުގައި އެކި ގައުމުތަކުގެ އެކި ޓީމުތައް ހަރަކާތްތެރިވާއިރު އޮކްސްފޯޑް ޔުނިވަރސިޓީން ކުރިޔަށް ގެންދާ ޕްރޮޖެކްޓަކީ އެސްޓްރާޒެނިކާ އާއެކު ކުރިޔަށް ގެންދާ މަޝްރޫޢެކެވެ. އެގޮތުން މި ވެކްސިންއަށް ނަން ދެވިފައިވަނީ AZD1222 (އޭޒެޑްޑީ 1222)ގެ ނަމުންނެވެ.