ވޯލްޑް ކަޕްގައި ރާއްޖެ ވާދަކުރާތަން ފެނުން އެއީ ހުވަފެނެއް: ދަގަނޑޭ

ދިވެހިރާއްޖެ އަކީ ކުޑަ ގައުމެއް ކަމުގައިވި ނަމަވެސް ރާއްޖޭގެ ކުޅުންތެރިންވެސް ބޮޑެތި ހުވަފެން ދެކޭ ކަމަށާއި، އެގޮތުން ފީފާ ވޯލްޑް ކަޕްގައި ރާއްޖެ ވާދަކުރާތަން ފެނުން އެއީ ހުވަފެނެއް ކަމަށް ރާއްޖޭގައި އުފެދުނު އެންމެ މޮޅު ފުޓްބޯޅަ ކުޅުންތެރިޔާ އަލީ އަޝްފާގު (ދަގަނޑޭ) ބުނެފިއެވެ.

ފީފާގެ ވެބްސައިޓަށް ދަގަނޑޭ ދިން ހާއްސަ އިންޓަވިއުއެއްގައި އޭނާ ބުނީ ރާއްޖެ އަކީ ކުޑަ ގައުމެއް ކަމަށާއި، އެކަމަކު ރާއްޖޭގެ ކުޅުންތެރިންވެސް ވަރަށް ބޮޑެތި ހުވަފެންތައް ދެކޭ ކަމަށެވެ. އެގޮތުން ކޮންމެސް ދުވަހަކުން ރާއްޖެވެސް ވޯލްޑް ކަޕްގައި ކުޅުމަކީ އޭނާގެ ހުވަފެނެއް ކަމަށް ބުންޏެވެ.

ދަގަނޑޭ ބުނީ ވޯލްޑް ކަޕާއި ގުޅުން ހުރި މެޗުތަކަކީ ހާއްސަ މެޗުތަކެއް ކަމަށާއި، ވޯލްޑް ކަޕަށް ދިވެހި ޓީމު މިހާތަނަށް ކޮލިފައިނުވި ކަމުގައިވިޔަސް، ވޯލްޑް ކަޕާއި ގުޅުންހުރި މެޗުތަކުގައި ވާދަކުރުމަކީ އަބަދުވެސް ދެކެމުން އައި ހުވަފެނެއް ކަމަށާއި، އެހެން ކަމުން އެ މެޗުތަކުގައި ލަނޑު ޖެހުމަކީ ހާއްސަ ކަމެއް ކަމަށެވެ.

ފީފާގެ ވެބްސައިޓުގެ ޝާއިއު ކޮށްފައިވާ ލިޔުމުގައި ބުނެފައިވަނީ ރާއްޖެއަކީ ފަތުރުވެރި ކަމަށް މަޝްހޫރު ގައުމެއް ކަމުގައިވިޔަސް، މީގެ ކުރިން ރާއްޖެއަކީ ފުޓްބޯޅައިގެ ރޮނގުން މީހުން ނުދަންނަ ގައުމެއް ކަމަށާއި، އެކަން ބަދަލުވީ 2013 ވަނަ އަހަރު އިންޓަނޭޝަނަލް ފެޑަރޭޝަން އޮފް ފުޓްބޯލް ހިސްޓްރީ އެންޑް ސްޓެޓިސްޓިކްސްގެ ލަނޑު ލިސްޓުގެ ދެވަނައިގައި ދަގަނޑޭ ހިމެނުނު ހިސާބުން ކަމަށެވެ. އަދި އެކަން ވެގެން ދިޔައީ ގިނަ ބަޔެއް ހައިރާން ކުރުވި ކަމެއް ކަމުގައި އެ ލިޔުމުގައި ބުނެފައިވެއެވެ.

ބައިނަލްއަގުވާމީ ބޮޑެތި ކްލަބު މުބާރާތްތަކުގައި ޖަހާ ލަނޑުތަކަށް ބަލައިގެން އެކުލަވާލި އެ ލިސްޓުގެ ދެވަނައިގައި ދަގަނޑޭ އޮތީ 23 ލަނޑު ޖަހައިގެންނެވެ. މި ލިސްޓުގެ އެއްވަނައިގައި ޕޯޗުގަލްގެ މަޝްހޫރު ފުޓުބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ އޮތީ ދަގަނޑޭއަށް ވުރެން ދެ ލަނޑު އިތުރަށް ކާމިޔާބު ކޮށްގެނެވެ.

ފީފާއަށް ދިން އިންޓަވިއުގައި ދަގަނޑޭ ބުނީ 2013 ވަނަ އަހަރުގެ ސީޒަނަކީ އޭނާގެ ކެރިއަރުގައި އެންމެ ކާމިޔާބު ސީޒަން ކަމަށާއި، އެ ސީޒަނުގައި ކްލަބަށާއި ގައުމަށް ގިނަ ލަނޑުތަކެއް ޖަހައިދެވުނު ކަމަށެވެ. މީގެ އިތުރުން ދަގަނޑޭ ބުނީ ދުނިޔޭގެ އެންމެ މޮޅު ކުޅުންތެރިންނާ އެއްސަފެއްގައި ހިމެނުމަކީ ގަބޫލުކުރަން ދަތިވި ކަމެއް ކަމަށާއި، މި ކާމިޔާބީގެ ސިއްރަކީ ގައުމީ ޓީމުގެ ކުޅުންތެރިންގެ އިތުރުން ނިއުރޭޑިއަންޓުގެ ކުޅުންތެރިންގެވެސް ބުރަ މަސައްކަތް ކަމަށެވެ.

ދަގަނޑޭ ވަނީ 2013 ވަނަ އަހަރު ގައުމީ ޓީމަށް 10 ލަނޑު ކާމިޔާބު ކޮށްދީފައެވެ. މީގެ އިތުރުން ނިއުރޭޑިއަންޓާއެކު އޭއެފްސީ ކަޕްގެ ދެވަނަ ބުރުން ޖާގަ ހޯދިއިރު، އޭއެފްސީ ކަޕްގައި ދަގަނޑޭ ވަނީ ނުވަ ލަނޑު ޖަހައިދީފައެވެ.

ދަގަނޑޭ އިތުރަށް ބުނީ ފުޓްބޯޅަ ކެރިއަރުގައި ޔޫރަޕް އަދި އޭޝިއާގެ ބޮޑެތި ކްލަބުތަކުން ގިނަ ހުށަހެޅުންތަކެއް ލިބުނު ކަމަށާއި، އޭގެ ތެރެއިން ޕޯޗުގަލްގެ ބެންފިކާއިން ހުށަހެޅި ހުށަހެޅުމަކީ އެންމެ ބޮޑަށް ވިސްނި ހުށަހެޅުން ކަމަށެވެ. އަދި އެ ފުރުސަތުގެ ބޭނުން ހިފަން ޖެހޭނެ ކަމަށް ދަގަނޑޭ ވަނީ ބުނެފައެވެ.

ދަގަނޑޭ ބުނީ ބެންފިކާގެ ހުށަހެޅުމާ މެދު ސީރިއަސްކޮށް ވިސްނި ކަމަށާއި، އެއީ ބޭނުން ހިފަން ޖެހޭނެ ހުށަހެޅުމެއް ކަމަށެވެ. އަދި އެ ހުށަހެޅުމުގެ ބޭނުން ހިފިނަމަ، ދުނިޔޭގެ މަޝްހޫރު ބައެއް ކުޅުންތެރިންނާއެކު ކުޅުމުގެ ފުރުސަތު ލިބޭނެ ކަމަށެވެ.

ފީފާއިން ފާހަގަކުރާ ގޮތުގައި ދަގަނޑޭ އަކީ ވޯލްޑް ކަޕް ކޮލިފިކޭޝަންގެ އޭޝިއަން ބުރަށް އައު މޫނެއް ނޫނެވެ. ވޯލްޑް ކަޕް ކޮލިފިކޭޝަންގެ މެޗަކުން ދަގަނޑޭ އެންމެ ފުރަތަމަ ފެނިގެން ގޮސްފައިވަނީ 2003 ވަނަ އަހަރުގައެވެ. މިހާތަނަށް ވޯލްޑް ކަޕް ކޮލިފިކޭޝަނުގައި ދަގަނޑޭ ވަނީ 14 ލަނޑު ޖަހާފައެވެ.

ދަގަނޑޭ ވަނީ ގައުމީ ޓީމަށް މިހާތަނަށް ކުޅެދިން 80 މެޗުން 53 ލަނޑު ކާމިޔާބު ކޮށްފައެވެ.