ކަރަންޓީން ފެސިލިޓީން ފިލި ބިދޭސީއަކު ހޯދަން ފަށައިފި
20 ޖުލައި 2020 | ހޯމަ 07:21މިއީ އިކޮނޮމިކް މިނިސްޓްރީން ފުލުހުންނަށް ހުށަހަޅާފައިވާ މައްސަލައެއް
ކަރަންޓީން ފެސިލިޓީން ފިލާފައިވާ ބަންގްލަދޭޝް ރައްޔިތެއް ކަމަށްވާ، ބަހާދުރު، ކުމިލަ
ކަރަންޓީން ފެސިލިޓީއެއްގައި ބަހައްޓާފައިހުރި ބަންގްލަދޭޝް މީހަކު ފިލައިގެން އޭނާ ހޯދަން ފުލުހުން އިއުލާންކޮށްފިއެވެ.
ފުލުހުން ބުނީ، މި މައްސަލަ ހުށައެޅީ މިނިސްޓްރީ އޮފް އިކޮނޮމިކް ޑިވެލޮޕްމަންޓުން ކަމަށެވެ. މި މައްސަލައާ ގުޅިގެން ހޯދަމުންދަނީ،ބަހާދުރު، ކުމިލަ، ބަނގުލަދޭޝް (ޕާސްޕޯޓު ނަންބަރު: BP0762231) އެވެ.
ފުލުހުން ބުނީ، އޭނާއާ ބެހޭ މައުލޫމާތެއް ލިބިފައިވާނަމަ، ފުލުހުންގެ ހުޅުމާލެ އިންވެސްޓިގޭޝަން ޑިޕާޓްމަންޓްގެ ނަމްބަރު، 9980062 އަށް ގުޅުއްވައި ހިއްސާކުރެއްވުން އެދޭ ކަމަށެވެ.
ކޮވިޑް-19އަށް ޕޮޒިޓިވްވި ބިދޭސީއަކު މީގެ ކުރިން ވެސް ވަނީ ފިލާފައެވެ. މިހާތަނަށް ކަރަންޓީން ފެސިލިޓީތަކުން ފިލައިގެން ނުވަ ބިދޭސީއަކު ހޯދަން ފުލުހުން އިއުލާންކުރިއެވެ.
ބިދޭސީންގެ މައްސަލަތައް ރާއްޖޭގައި ކަންބޮޑުވާ ދަރަޖައަށް މައްޗަށް ގޮސްފައިވާއިރު، ގަވާއިދާ ހިލާފަށް އުޅޭ ބިދޭސީންގެ އަދަދުވެސް ވަރަށް ގިނައެވެ. އެގޮތުން ދެ ލައްކައެއްހާ ބިދޭސީން ރާއްޖޭގައި އުޅޭއިރު، 65،000 އެއްހާ ބިދޭސީން ރަސްމީ އެއްވެސް ލިޔެކިޔުމެއްނެތި، ގަވާއިދާ ހިލާފަށް އުޅޭކަމަށް އަންދާޒާކުރެވެއެވެ.
