ލައިސަންސިންގ ތަމްރީނު ޕްރޮގްރާމުގައި ބައިވެރިވުމަށް އެދޭ ފަރާތްތަކުން ބާ ކައުންސިލުގައި ރަޖިސްޓަރީވުމަށް ހުޅުވާލައިފި
19 ޖުލައި 2020 | އާދީއްތަ 04:31ތަމްރީން ޕްރޮގްރާމް ހިންގުމަށް ތައްޔާރުވުމުގެ މަސައްކަތްތައް ކުރިއަށްދޭ
ގާނޫނީ ވަކީލުން ހުވާ ކުރުމަށް ބޭއްވި ރަސްމިއްޔާތެއްގެ ތެރެއިން
ދިވެހިރާއްޖޭގެ ބާ ކައުންސިލުން އިންތިޒާމްކުރާ ލައިސަންސިންގ ތަމްރީނު ޕްރޮގްރާމުގައި ބައިވެރިވުމަށް އެދޭ ފަރާތްތަކުން ބާ ކައުންސިލުގައި ރަޖިސްޓަރީވުމަށް ހުޅުވާލައިފިއެވެ.
ބާ ކައުންސިލުން ބުނީ މޯލްޑިވްސް ކޮލިފިކޭޝަން އޮތޯރިޓީން ގަބޫލުކުރާ މަތީ ތައުލީމުދޭ މަރުކަޒަކުން ގާނޫނީ ރޮނގުން ފުރަތަމަ ޑިގްރީ ހާސިލްކޮށްފައިވާ ފަރާތްތަކުގެ ތެރެއިން، ދިވެހި ރާއްޖޭގެ ގާނޫނީ ވަކީލު ކަމުގެ ހުވާ ކުރުމަށް ބޭނުންވާ ފަރާތްތަކަށް ޚާއްސަ ތަމްރީނު ޕްރޮގްރާމެއް ހިންގުމަށް ރައްޔިތުންގެ މަޖިލީހުގެ ޖުޑިޝަރީ ކޮމިޓީއިން ފާސްކޮށްފައިވާތީ، އެ ތަމްރީން ޕްރޮގްރާމް ހިންގުމަށް ތައްޔާރުވުމުގެ މަސައްކަތްތައް ކުރިއަށްދާ ކަމަށެވެ.
މި ތަމްރީން ޕްރޮގްރާމުގައި ބައިވެރިވުމަށް ބޭނުންވާ ފަރާތްތަކުން 23 ޖުލައި 2020 ގެ 14:00ގެ ކުރިން ގޫގުލް ފޯމް ލިންކްއިންhttps://maldivesbarcouncil.org/licensing-trainingގޫގުލް ފޯމް މެދުވެރިކޮށް ބާ ކައުންސިލުގައި އެމީހެއްގެ ނަން ރަޖިސްޓަރީކުރުމުގެ ފުރުސަތު ހުޅުވާލާ ކަމަށެވެ.
ބާ ކައުންސިލުން ބުނީ ތަމްރީނު ޕްރޮގްރާމުގައި ރަޖިސްޓަރީވުމާބެހޭ އިތުރު މައުލޫމާތު ސާފުކުރުމަށް ބޭނުންވާނަމަ، ބާ ކައުންސިލުގެ 3333990 ނަންބަރު ފޯނަށް ގުޅުއްވުމަށް، ނުވަތަ ދިވެހިރާއްޖޭގެ ބާ ކައުންސިލުގެ secretariat@maldivesbarcouncil.org އެޑްރެހަށް އީމެއިލް ކުރުމަށް އެދޭ ކަމަށެވެ.
