ޕާކިސްތާނުގެ ފޮރިން މިނިސްޓަރ ކޮވިޑް-19ން ރަނގަޅުވެއްޖެ

ޕާކިސްތާނުގެ ފޮރިން މިނިސްޓަރ ޝާހު މަހުމޫދު ގުރެއިޝީ ކޮވިޑް-19ން ރަނގަޅުވެ ގެއަށް ބަދަލުކޮށްފިއެވެ.

ބައިނަލްއަގުވާމީ މީޑިއާތަކުން ރިޕޯޓްކުރާ ގޮތުން ގުރައިޝީ ގެއަށް ބަދަލުކޮށްފައިވަނީ މި ހަފްތާގެ އަންގާރަ ދުވަހުއެވެ. އޭނާއަށް ފަރުވާ ދީފައިވަނީ ރާވަލް ޕިންޑީގެ އަސްކަރީ ހޮސްޕިޓަލުގައެވެ. ގުރައިޝީ ކޮވިޑަށް ޕޮޒިޓިވްވެފައިވަނީ މި މަހުގެ 3 ވަނަ ދުވަހުއެވެ. އަދި ހުން އައިސްގެ އަމިއްލައަށް ގޭގައި ކަރަންޓީން ވެފައިވެއެވެ. ގުރައިޝީ ކުރެއްވި ޓްވީޓެއްގައި ވިދާޅުވީ ހާލު ރަނގަޅު ކަމަށާއި، މަސްއޫލިއްޔަތުތަކާއި އަލުން ހަވާލުވާން ތައްޔާރު ކަމަށެވެ.

ގުރައިޝީ ކޮވިޑް-19 އަށް ޕޮޒިޓިވްވުމާއި ގުޅިގެން ހޮސްޕިޓަލަށް ބަދަލުކުރީ މި މަހުގެ 4 ވަނަ ދުވަހުއެވެ. އަދި ބާއްވަން ހަމަޖައްސާފައިވާ ބައްދަލުވުންތަކާއި އެހެނިހެން ކަންކަން ފަހަށް ބަދަލުކުރެއްވި ކަމަށާއި، އެގޮތަށް ނިންމެވީ އެންމެންގެ ސަލާމަތާއި ރައްކާތެރިކަމުގެ ގޮތުން ކަމަށެވެ.

ގުރައިޝީ ވިދާޅުވީ ގެއަށް ބަދަލުކުރެއްވި ފަހުން އިތުރު ޓެސްޓެއް ހަދަނަ ސާމްޕަލް ނަގާފައިވާ ކަމަށާއި، އުއްމީދަކީ އެ ޓެސްޓުގެ ނަތީޖާ ވެސް ނެގެޓިވްވުން ކަމަށެވެ. ގުރައިޝީ ވަނީ ކޮވިޑާއި ގުޅިގެން ފްރަންޓްލައިންގައި މަސައްކަތް ހުރިހާ ފަރާތްތަކުގެ މަސައްކަތްތައް ފާހަގަ ކުރައްވާ ޓްރިބިއުޓެއް ދެއްވާފައެވެ.

ގުރައިޝީ ވަނީ ކޮވިޑްގެ ހާލަތާއި ގުޅިގެން އާންމުން ހާސް ނުވުމަށް އެދިވަޑައިގެންފައެވެ. އަދި ރައްކާތެރިކަމުގެ ގޮތުން ފިޔަވަޅުތައް އެޅުމަށާއި، ބަލީގެ އަލާމާތެއް ފެނިއްޖެ ނަމަ ލަސް ނުކޮށް ސިއްހީ އެހީތެރިންގެ އެހީ ހޯދުމަށް އެދިވަޑައިގެންފައެވެ.

ގުރައިޝީ ކޮވިޑް-19ށް ޕޮޒިޓިވްވެ ފަރުވާއަށްފަހު ގެއަށް ދޫކޮށްލާފައިވާ އިރު، ގުރައިޝީ ނިޔާވިކަމުގެ ހަބަރުތައް ސޯޝަލް މީޑިއާގައި ވަނީ ފަތުރާފައެވެ. އެގޮތުން އޭނާ ނިޔާވި ކަމުގެ ވާހަކަ ވިކިޕީޑިއާގައި ވެސް އާންމު ކުރިއެވެ.

ޕާކިސްތާނުގައި މިހާތަނަށް 259،999 މީހަކު ޕޮޒިޓިވްވެގެން ވަނީ ރިޕޯޓްކޮށްފައެވެ. ހުކުރު ދުވަހުގެ މިހާތަނަށް އެގައުމުން 2000ށް ވުރެ ގިނައިން މީހުން ވަނީ ކޮވިޑް-19ށް ޕޮޒިޓިވްވެފައެވެ. މިހާތަނަށް 5475 މީހަކު ވަނީ ބަލީގައި ނިޔާވެފައެވެ.