އާންމު ސިއްހަތު ރައްކާތެރި ކުރުމުގެ ބިލަށް ހިޔާލު ހޯދަން ބައްދަލުވުމެއް ބާއްވަނީ
17 ޖުލައި 2020 | ހުކުރު 03:52ބިލު އޮތީ ޖުޑީޝަރީ ކޮމިޓީގައި
ރައްޔިތުންގެ މަޖިލީހުގެ އިދާރާ
ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި ދިރާސާކުރަމުންދާ އާންމު ސިއްހަތު ރައްކާތެރިކުރުމުގެ ގާނޫނަށް އިސްލާހު ގެނައުމުގެ ބިލަށް ހިޔާލު ހޯދުމުގެ ބައްދަލުވުމެއް ބާއްވާ ގޮތަށް މަޖިލީހުން ނިންމައިިފިއެވެ.
މަޖިލީހުން ބުނީ، ހިޔާލު ހޯދުމުގެ ބައްދަލުވުން އޮންނާނީ އާދިއްތަ ދުވަހުގެރޭ މަޖިލީހުގެ ހަތަރު ވަނަ ފަންގިފިލާގައި ކަމަށެވެ. ބައްދަލުވުން ފަށަން ހަމަޖެހިފައިވަނީ 20:30 ގައެވެ.
ފުވައްމުލަކު އުތުރު ދާއިރާގެ މެމްބަރ މުހައްމަދު ރަޝީދު ހުށަހަޅުއްވާފައިވާ ބިލް މަޖިލީހުގެ ތަޅުމުން ބަލައިގަނެ އިތުުރަށް ދިރާސާކުރުމަށް ޖުޑީޝަރީ ކޮމިޓީއަށް ފޮނުވާފައިވަނީ މި މަހުގެ 14 ވަނަ ދުވަހުއެވެ.
މި ބިލަކީ ސިއްހީ ކުއްލި ނުރައްކަލުގެ ހާލަތު އިއުލާން ކުރުމުގައި މިހާރަށްވުރެ ހަރުދަނާ އަދި ދެފުށް ފެންނަ ގޮތަކަށް ކަންކަން ކުރެވޭނެ އިންތިޒާމު ކުރުމަށާއި މިހާރަށްވުރެ ބޮޑަށް ރައްޔިތުންގެ މަޖިލީހަށް ޖަވާބު ދާރީ ކުރެވޭނެ ގޮތް ހެދުމަށާއި ކުއްލި ނުރައްކަލުގެ ހާލަތު އިއުލާންކޮށްފައިވާ ހިނދު މަޖިލީހުގެ ޖަލްސާތައް ބާއްވާނެ ގޮތްތައް މިހާރަށްވުރެ ބޮޑަށް އިތުރަށް ސާފުކުރުމަށް ހުށައަޅާފައިވާ ބިލެކެވެ.
ބިލް ހުށަހަޅުއްވަމުން މުހައްމަދު ރަޝީދު ވިދާޅުވެފައިވަނީ ސިއްހީ ކުއްލި ނުރައްކަލުގެ ހާލަތު މިހާރު އިއުލާންކުރާ ގޮތުން ގާނޫނު އަސާސީގެ ދެ ވަނަ ބާބުން ރައްޔިތުންނަށް ކަށަވަރު ކޮށްދީފައިވާ އަސާސީ ހައްގުތަކާއި މިނިވަންކަން ހިފެހެއްޓިގެންދާ ކަމަށެވެ.
އަދި ހައްގުތައް ހިފެހެއްޓިގެންދާއިރު މަޖިލީހުގެ މެމްބަރުންގެ ބަހެއްނެތި ހިފެހެއްޓިގެން ދާ ދިޔުން ގަބޫލު ނުކުރެއްވޭ ކަމަށް އޭނާ ވަނީ ވިދާޅުވެފައެވެ. އެގޮތުން ހަނިކުރެވޭ އަސާސީ ހައްގުތަކުގެ ތެރޭގައި ވަޒީފާ އަދާކުރުމުގެ ހައްގު، އެއްވެ އުޅުމުގެ ހައްގު ދަތުރު ފަތުރުކުރުމާއި ވަޒަންވެރިވުމުގެ ހައްގު އުނގެނުމުގެ ހައްގު ޒާތީ ދިރިއުޅުން މަސައްކަތްކުރުމުގެ ހައްގު, އިގްތިސާދީ އަދި އިޖުތިމާ ހައްގުތައް ހިފެހެއްޓިގެންދާ ކަމަށްވެސް ބިލް ހުށައެޅުއްވި މެމްބަރު މުހައްމަދު ރަޝީދު ވިދާޅުވިއެވެ.
