ކާންޔޭ ވެސްޓް އެމެރިކާގެ ރައީސްކަމަށް ކުރިމަތިލަނީ

އެމެރިކާގެ މަޝްހޫރު ރެޕް ލަވަކިޔުންތެރިޔާ ކާންޔޭ ވެސްޓް އެ ޤައުމުގެ ރިޔާސީ އިންތިޚާބުގައި ވާދަ ކުރާނެކަން އިއުލާނު ކޮށްފިއެވެ.

ރައީސްކަމަށް ކުރިމަތިލާނެކަން އިއުލާނުކޮށް ކާންޔޭ މީގެ ކުރިން ވަނީ ޓްވީޓެއްވެސް ކޮށްފައެވެ. އެގޮތުން ޓްވީޓުގައި އޭނާ ބުނެފައިވަނީ، އެންމެން އެކަތިގަނޑަކަށް ވެގެން އެމެރިކާގެ މުސްތަޤުބަލު ބިނާ ކުރުމަށް މަސައްކަތް ކުރަން ހަނދާންކޮށްދީފައެވެ.

ބޭރުގެ މީޑިއާތަކުން ރިޕޯޓްކޮށްފައިވާގޮތުން ކާންޔޭ މިހާރު ވަނީ އިންތިޚާބުގައި ވާދަކުރުމަށް ފޯމުވެސް ހުށަހަޅާފަ އެވެ. އަދި އެކަމަށް ބޭނުންވާ ފީވެސް މިހާރު އޭނާ ވަނީ ދައްކާފައެވެ. ރިޕޯޓްތައް ބުނާގޮތުން އެމެރިކާގެ އޮކްލަހޯމާ ސްޓޭޓުގެ ވޯޓު ކަރުދާހުގައި ކާންޔޭގެ ނަން އޮންނާނެކަން މިހާރު ވަނީ ކަށަވަރުވެފައެވެ. އަދި ކާންޔޭ ކުރިމަތިލާފައިވަނީވެސް އަމިއްލަ ކެނޑިޑޭޓެއްގެ ގޮތުގައެވެ.

އޮކްލަހޯމާގައި ކެނޑިޑޭސީ ފީއެއްގެ ގޮތުން 35000 އެމެރިކާ ޑޮލަރު ދައްކަން ޖެހެއެވެ.

ކާންޔޭ ވެސްޓަކީ އެމެރިކާގެ ރިއަލިޓީ ތަރި ކިމް ކާޑޭޝިއަންގެ ފިރިމީހާއެވެ. ކިމް މިހާރު ކުރާ އެންމެ ބޮޑު އެއް މަސައްކަތަކީ ނުހައްގުން ޖަލަށް ލާފައިވާ މީހުން މިނިވަން ކުރުމުގެ މަސައްކަތެވެ. އެގޮތުން، ކިމް ވަނީ ވައިޓް ހައުސްއާ ގުޅިގެން އިތުރު ފަރާތްތައް މިނިވަން ކުރުމުގެ މަސައްކަތްވެސް ކޮށްފައެވެ. އަދި މިކަމާ ގުޅޭ ގޮތުން ކިމް ވަނީ ޓްރަމްޕާވެސް ބައްދަލުކޮށްފައެވެ.