ޖުލައި 29 ގައި ބޭންކުތަކާއި އެމްއެމްއޭއިން ހިދުމަތް ލިބޭނެ
16 ޖުލައި 2020 | ބުރާސްފަތި 13:32ބޭކިންގ ހިދުމަތް ހެދުނު 08:30 އިން މެންދުރުފަހު 02:00 އަކަށް ލިބޭނެ
މޯލްޑިވްސް މަނިޓަރީ އޮތޯރިޓީ
1441 ވަނަ އަހަރުގެ އަޟްހާ އީދު އަދި މިއަހަރުގެ މިނިވަން ދުވަހާއި ގުޅިގެން 26 ޖުލައި އިން 03 އޮގަސްޓަށް ސަރުކާރު ބަންދުކުރުމާއި ގުޅިގެން މޯލްޑިވްސް މަނިޓަރީ އޮތޯރިޓީ (އެމްއެމްއޭ) އާއި ބޭންކުތަކުން ހިދުމަތް ލިބޭނެ ކަަމަށް އެ އޮތޯރިޓީން ބުނެފިއެވެ.
އެމްއެމްއޭ އިން ނެރުނު އިއުލާނެއްގައި ބުނީ ބޭކިންގ ހިދުމަތް ހެދުނު 08:30 އިން މެންދުރުފަހު 02:00 އަކަށް އަދި ސިޓީ އާއި ތަކެތި އެ ގަޑީގައި ބަލައިގަތުމަށް ހަމަޖެހިފައިވާ ކަމަށެވެ.
ނިއު ނޯމަލްއަށް ދިން ލުއިތަކާއެކު އެމްއެމްއޭ އިން ހިދުމަތް ދޭން ފަށާފައިވަނީ ޖުލައި 5 ވަނަ ދުވަހުން ފެށިގެންނެވެ.
އެމްއެމްއޭއިން ބުނީ ޖެމްސް ބޭނުންނުކުރާ އިދާރާތަކާއި އާންމު ފަރާތްތަކުން އޮތޯރިޓީއަށް ފޮނުވާ ސިޓީ އާއި އެހެނިހެން ތަކެތި inward.docs@mma.gov.mv އީމެއިލް މެދުވެރިކޮށް ފޮނުއްވުމަށް އިސްކަން ދިނުމަށް އެދޭ ކަމަށެވެ.
އެމްއެމްއޭއިން އިތުރަށް ބުނީ ކުދި ރުފިޔާ ދޫކުރުމުގެ ޚިދުމަތާއި ވަކި ލާރި ދޫކޮށް ބަލައިގަތުމުގެ ޚިދުމަތް ދެމުން ގެންދާނީ، ކޮންމެ ހަފްތާއެއްގެ އަންގާރަ އަދި ބުރާސްފަތި ދުވަހު ކަމަށެވެ.
މި ޚިދުމަތް ހޯއްދުމަށް ކުރިޔެކޭވެސް އެއްފަދައިން އޮތޯރިޓީގެ ނަމްބަރު 7919292 އަށް ޚިދުމަތް ހޯއްދުމަށް އަންނަ ފަރާތުގެ މައުލޫމާތާއި ހޯދުމަށް ބޭނުންވާ ޚިދުމަތް ލިޔުމަށްފަހު އެސްއެމްއެސް ނުވަތަ ވައިބަރ މެދުވެރިކޮށް ފޮނުއްވުމަށް އެދޭ ކަމަށް އެމްއެމްއޭއިން ބުނެއެވެ.
ޚިދުމަތް ހޯދުމަށް އަންނަ ހުރިހާ ފަރާތްތަކުން ވެސް މާސްކް އެޅުމަށް އެމްއެމްއޭ އިން ވަނީ އިލްތިމާސް ކޮށްފައެވެ.
