ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި މައްސަލާގައި އަލީ ވަހީދާއި ސުވާލެއް ނުކުރަން، 15 މީހެއްގެ ބަޔާން ނެގިން: ފުލުހުން
އަލީ ވަހީދުގެ ބަޔާން ނަގާފައިނުވޭ
ފުލުހުން ބާއްވަމުން އަންނަ ނޫސްވެރިންގެ ބައްދަލުވުމުގެ ތެރެއިން
ޓޫރިޒަމް މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި މައްސަލާގައި 15 މީހުންގެ ބަޔާން ނަގާފައިވާ ކަަމަށާއި އެ މައްސަލަ ޕީޖީއާ މަޝްވަރާ ކުރަމުންދާ ކަމަށް ފުލުހުން ބުނެފިއެވެ.
ބުރާސްފަތި ދުވަހު ފުލުހުން ބޭއްވި ނޫސްވެރިންގެ ބައްދަލުވުމުގައި ޑެޕިއުޓީ ކޮމިޝަނަރ އޮފް ޕޮލިސް އަބްދުލް މަންނާން ޔޫސުފް ވިދާޅުވީ އެ މައްސަލާގައި މިހާތަނަށް ކުރީގެ ޓޫއަރިޒަމް މިނިސްޓަރު އަލީ ވަހީދުގެ ބަޔާން ނަގާފައިނުވާ ކަމަށެވެ. ސަބަބެއް ކަމަށް މަންނާނު ވިދާޅުވީ އެއީ އަދި ތަހުޤީޤަށް އަލީ ވަހީދުގެ ބަޔާން ނަގަން ފެނިވަޑައިނުގަންނަވާތީ ކަމަށެވެ.
އަލީ ވަހީދު ޓޫރިޒަމް މިނިސްޓްރަަކަމުން ވަކި ކޮށްފައިވަނީ އެ މިނިސްޓްރީގެ މުވައްޒަފުންތަކަކަށް ޖިންސީ ގޯނާކުރި ކަމުގެ ތުހުމަތުތަކާއި ގުޅިގެންނެވެ. އަލީ ވަހީދުއަށް ތުހުމަތުތައްކުރި މުވައްޒަފުން ބުނާގޮތުން، އެ މުވައްޒަފުންނަށް ޖިންސީ ގޯނާކުރާތާ ގިނަ ދުވަސްތަކެއް ވަނީވެފައެވެ. އެ މައްސަލާގައި އަލީ ވަހީދު ދިރިއުޅުއްވާ އެޕާޓްމެންޓް ބަލައި ފާސްކޮށް، އޭނާގެ ފޯނާއި ލެޕްޓޮޕް ފުލުހުންގެ ބެލުމުގެ ދަށަށް ވަނީ ގެންގޮސްފަ އެވެ.
އަލީ ވަހީދުގެ ފޯނާއި ލެޕްޓޮޕުން އެއްވެސް އެއްޗެއް ފުލުހުންގެ ތަހުޤީޤަށް ފެނިފައިވޭތޯ ނޫސްވެރިޔަކު ކުރި ސުވާލަށް ޖަވާބުދެއްވަމުން ޗީފް ސްޕްރިންޓެންޑެންޓް އޮފް ޕޮލިސް މުހައްމަދު ބަޝީރު ވިދާޅުވީ އެކަމުގެ މައުލޫމާތު ހާމަކުރަން އަދި އަވަސް ކަމަށެވެ. އަދި މައްސަލައިގެ ތަހުޤީޤް ކުރިއަށްދާކަމަށާއި، އެކަމުގައި އިތުރު މައުލޫމާތު ހާމަކުރެވެން ނެތްކަމަށް ބަޝީރު ވިދާޅުވި އެވެ.
ތަހުޤީޤްގެ ކުރީކޮޅުގައި އަލީ ވަހީދުގެ ޕާސްޕޯޓް ހިފެހެއްޓީ ކީއްވެތޯ ނޫސްވެރިން ސުވާލުކުރުމުން ބަޝީރު ވިދާޅުވީ އަލީ ވަހީދުގެ ޕާސްޕޯޓް ހިފެހެއްޓީ ތަހުޤީޤަށް ހާޒިރުކުރަންޖެހިއްޖެ ނަމަ ހާޒިރުކުރުމަށްކަމަށެވެ. އަދި އެއީ ތަހުޤީޤްތަކުގަައި އާންމުކޮށް އަމަލުކުރަމުން އަންނަ އުސޫލުކަމަށް ބަޝީރު ވިދާޅުވި އެވެ.
ޖިންސީ ގޯނާ ކޮށްފައިވަނީ މިނިސްޓްރީގެ ދަތުރުތަކުގައި ރިސޯޓުތަކަށް ގެންގޮސްގެން ކަމަށް ވެސް މިނިސްޓްރީގެ މުވައްޒަފުން ބުނެއެވެ. މާގިރި ހޮޓަލްގައި ހިނގިކަމަށް ބުނާ ކަންކަމާއި، އަލީ ވަހީދާއެކު ރިސޯޓަށް މުވައްޒިފުން ދިޔަކަމަށް ބުނާ ވާހަކަތަކާއި ގުޅިގެން ސުވާލުކުރުމުންވެސް ނޫސްވެރިންގެ ބައްދަލުވުމުގައި ފުލުހުން ތަކުރާރުކޮށް ވިދާޅުވަމުންގެންދެވީ މައްސަލައިގެ ތަހުޤީޤް ކުރިއަށްދާއިރު، އެފަދަ މައުލޫމާތު ހާމަކުރެވެން ނެތްކަމަށެވެ.
