ފިތުރު ޒަކާތް ބެހުމުގައި ހަމަހަމަ ފުރުސަތު ލިބޭނެ ގޮތަށް އިންތިޒާމުތައް ހަމަޖެއްސުމަށް މަޖިލީހުން އެދެފި
މިމައްސަލަ ދިރާސާކޮށްފައިވަނީ އިޖުތިމާއީ ކޮމިޓީން
އިސްލާމިކް މިނިސްޓަރ ޑރ އަހުމަދު ޒާހިރު
މިނިސްޓްރީ އޮފް އިސްލާމިކް އެފެއާޒުން ފިތުރު ޒަކާތް ބެހުމުގައި ރައްޔިތުންނަށް ހަމަހަމަ ފުރުސަތު ލިބޭނެ ފަދަ ގޮތަކަށް އިންތިޒާމުތައް ހަމަޖެއްސުމަށާއި ކޮންމެ އަހަރަކު ވެސް ފަގީރުންނާއި މިސްކީނުންގެ ލިސްޓު މުރާޖަޢާ ކުރުން މުހިންމު ކަމަށް ރައްޔިތުންގެ މަޖިލީހުން ފާސްކޮށްފިއެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މިގޮތަށް ފާސްކޮށްފައިވަނީ 1441 ވަނަ އަހަރުގެ ފިތުރުޒަކާތް ބެހުމުގައި 1439 ވަނަ އަހަރު ފަޤީރުންގެ ގޮތުގައި ރަޖިސްޓްރީވެފައިވާ ފަރާތްތަކުގެ ލިސްޓަށް އިސްލާމިކް މިނިސްޓްރީން ބައްލަވާފައިވާތީ ގިނަ އަދަދެއްގެ ފަޤީރުންގެ ޙައްގުތައް ގެއްލިގެން ގޮސްފައިވާ ކަމަށް ބަޔާންކުރައްވާ ތޮއްޑޫ ދާއިރާގެ މެމްބަރު ހަސަން ޝިޔާން ހުށަހަޅުއްވާފައިވާ މައްސަލަ އިޖުތިމާޢީ ކޮމިޓީން ދިރާސާ ކުރުމަށްފަހު ހުށަހެޅި ރިޕޯޓް ފާސްކުރުމަށް ނެގުނު ވޯޓުގައި ބައިވެރިވެވަޑައިގެންނެވި 58 މެމްބަރުންގެ އިއްތިފާގުންނެވެ.
މި މައްސަލަ ދިރާސާ ކުރުމަށްފަހު ކޮމިޓީން ވަނީ 9 ކަމެއް ފާހަގަކޮށްފައެވެ. އެގޮތުން ކޮމިޓީން ފާހަގަކޮށްފައިވާ ކަންތައްތަކުގެ ތެރޭގައި ހިމެނެނީ ފިތުރު ޒަކާތް ބަހާނީ 1439 ވަނަ އަހަރުގެ މުދަލު ޒަކާތް ބެހުމަށް އެ މިނިސްޓްރީން 2019 ވަނަ އަހަރުގެ 1 އޮކްޓޯބަރ ގައި ކައުންސިލްތަކަށް ފޮނުވާފައިވާ ފަގީރުންގެ ދަފްތަރުގައި ހިމެނޭ ފަރާތްތަކަށް ކަމަށާއި ނަމަވެސް އެއްވެސް ސަބަބަކާ ހުރެ ދަފްތަރަށް އުނި އިތުރެއް އައިސްފައިވާނަމަ އެ ބަދަލަކާއެކު އެންމެ ފަހުގެ ލިސްޓް މިނިސްޓްރީން އެ ކައުންސިލްތަކަށް ފޮނުވާނެ ކަމަށެވެ. އެހެންކަމުން އެ ދަފްތަރުގައި ހިމެނޭ ފަރާތެއް ނޫން އެހެން ފަރާތަކަށް މިއަހަރުގެ ފިތުރު ޒަކާތް ބަހައިގެން ނުވާނެ ކަމަށް ކޮމިޓީން ވަނީ ފާހަގަކޮށްފައެވެ.
އަދި ފަގީރުންގެ ގޮތުގައި އެއްވެސް މީހަކު ރަޖިސްޓްރީވެފައިނުވާ ރަށްތަކުން ފިތުރު ޒަކާތުގެ ގޮތުގައި ލިބޭ ފައިސާ ބަހާނެ ގޮތަކާމެދު ގޮތެއް ނިންމަންވާނީ 1441 ވަނަ އަހަރުގެ ރަމަޟާން މަހުގެ 25 ވަނަ ދުވަހުގެ ކުރިން އިސްލާމިކް މިނިސްޓްރީއަށް ލިޔެ، އެ މިނިސްޓްރީން އަންގާ ގޮތެއްގެ މަތިން ކަމަށް ކޮމިޓީ ރިޕޯޓުގައި ބުނެފައިވެއެވެ.
މީގެއިތުރުން މުޅި ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރި ފަޤީރުންނާއި މިސްކީނުންގެ ގޮތުގައި ރަޖިސްޓްރީވުމަށް އެދޭ ފަރާތްތަކުން ފުރިހަމަ ކުރަންޖެހޭ މައުލޫމާތާއި ލިޔެކިއުންތައް ފުރިހަމަ ކުރުމުގައި ހުރި ދަތިތަކާމެދު ވިސްނައި ރައްޔިތުންނަށް ހަމަހަމަ ފުރުސަތުތަކެއް ނުލިބިދާނެ ކަމަށްޓަކައި އެ ފުރުސަތު ހުޅުވާނުލުމަށް މިނިސްޓްރީން ނިންމާފައިވާ ކަމަށް ވެސް ކޮމިޓީން ވަނީ ފާހަގަކޮށްފައެވެ.
އިސްލާމިކް މިނިސްޓްރީން ރާއްޖޭގައި ފަގީރެއްގެ ގޮތުގައި ބަލަނީ ދުވާލަކު 45ރ. އަށް ވުރެ މަދުން އާމްދަނީ ލިބޭނަމައެވެ.
