ކޮލަމްބިއާގައި ކޮވިޑް-19 ޖެހުނު މީހުންގެ އަދަދު ދޮޅުލައްކައަށް އަރައިފި

ކޮލަމްބިއާގައި ކޮވިޑް-19 ޖެހުނު މީހުންގެ އަދަދު ދޮޅުލައްކައަށް އަރައިފިއެވެ.

ކޮވިޑް-19 ހަލުވި ކަމާއެކު ފެތުރެމުން އަންނަ އިރު ކޮލަމްބިއާ ހިމެނެނީ ކޮވިޑް-19 ޖެހިގެން ރިޕޯޓް ކުރަމުން އަންނަ ގައުމުތަކުގެ ލިސްޓުގެ 19 ވަނައިގައެވެ. ކޮލަމްބިއާގެ ހެލްތް މިނިސްޓްރީން އާންމުކޮށްފައިވާ މައުލޫމާތުތައް ދައްކާގޮތުން ވޭތުވެދިޔަ 24 ގަޑި އިރު ތެރޭގައި 5،083 މީހަކު ވަނީ އަލަށް ބައްޔަށް ޕޮޒިޓިވްވެފައެވެ.

މިއާއެކު އެގައުމުގައި ކޮވިޑް-19 ޖެހުނު މީހުންގެ ޖުމްލަ އަދަދު ވަނީ 150،445ށް އަރާފައެވެ. ކޮލަމްބިއާ ވެފައިވަނީ ދެކުނު އެމެރިކާގެ ގައުމުތަކުގެ ތެރެއިން ލިސްޓުގެ 4 ވަނައަށް ޖެހިލާފައެވެ. މި ލިސްޓުގެ ކުރީގައި ހިމެނެނީ ބްރަޒިލް، ޕެރޫ އަދި ޗިލީއެވެ. ކޮލަމްބިއާއަށްފަހު ދެން އެންމެ ގިނަ ކޭސްތައް ރިޕޯޓްކޮށްފައިވަނީ އަރޖެންޓީނާއިންނެވެ.

ކޮލަމްބިއާގެ ހެލްތް މިނިސްޓްރީން އާންމުކޮށްފައިވާ ތަފާސް ހިސާބުތައް ދައްކާގޮތުން ފާއިތުވި 24 ގަޑި އިރުގެ ތެރޭގައި 188 މީހަކު ވަނީ ބަލީގައި މަރުވެފައެވެ. އަދި މިއާއެކު އެގައުމުގައި ޖުމްލަ މަރުވި މީހުންގެ އަދަދު ވަނީ 5،307ށް އަރާފައެވެ.

އެގައުމުގައި ކޭސްތައް އިތުރުވަމުން އަންނާތީ ލޮކްޑައުންއަށް އިތުރު ފިޔަވަޅުތަކެއް ވެސް ވަނީ އަޅާފައެވެ. ކޮވިޑް-19 ގެ ކޭސްތައް އެންމެ ގިނައިން ފެންނަނީ ވެރިކަން ކުރާ ރަށް ބޮގޯޓާ އިންނެވެ. ބޮގޯޓާއިން 49،644 ކޭސް މިހާތަނަށް ވަނީ ފެނިފައެވެ. އަދި އާ ކޭސްތައް އިތުރުވާތީގެ މުޅި ގައުމުގައި އިއުލާންކޮށްފައިވަނާ ކަރަންޓީންގެ މުއްދަތު އަންނަ މަހުގެ 1ށް ވަނީ އިތުރުކޮށްފައެވެ.