ދުވާފަރު ލޮކްޑައުންކޮށްފި

ރ. ދުވާފަރުން ހޯމް ކަރަންޓީނުން ދޫކޮށްލި ތިން މީހަކު ކޮވިޑް-19 އަށް ޕޮޒިޓިވްވުމާއި ގުޅިގެން އެރަށުގައި ވައިރަސް ފެތުރިގެން ހިނގައިދާނެތީ ރ. ދުވާފަރަށް އަރައި ފޭބުން މަނާކޮށްފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ރ ދުވާފަރު މޮނިޓަރިންގ އަށް ލާފައިވާކަން އަންގާފައިވަނީ ހޮނިހިރު ދުވަހުގެ ރޭ 21:24 ގައެވެ. ދުވާފަރު މޮނިޓަރިންއަށް ގެނައިސް އެ ރަށަށް އެއްވެސް މީހަކު އަރައި ފޭބޭނީ އެޗްޕީއޭގެ ހުއްދަ ލިބުމުން ކަމަށް ޑިރެކްޓާރ ޖެނަރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއި ކުރައްވައި އެ ރަށު ކައުންސިލަށް ވަނީ އަންގާފަ އެވެ.

މާލެ އިން ދުވާފަރަށް މިދިޔަ މަހުގެ 19 ވަނަ ދުވަހު ގޮސް ހޯމް ކަރަންޓީނުގައި 14 ދުވަސް ހަމަކުރުމަށްފަހު ސާމްޕަލް ނެގެޓިވް ކަމަށް އެޗްޕީއޭ އިން އެންގުމުން މީގެ ދެ ދުވަސްކުރިން ދޫކޮށްލި ތިން މީހުން ޕޮޒިޓިވްވެފައިވާ ކަމަށް އެޗްޕީއޭ އިން ހޮނިހިރު ދުވަހު ވަނީ އަންގާފަ އެވެ.

އެއާއެކު އެ މީހުން ދިރިއުޅެމުންދާ ގެ ކަރަންޓީނުކޮށް ކޮންޓެކްޓް ޓްރޭސިންގެ މަސައްކަތް ކުރިއަށްދާކަމަށް އެޗްޕީއޭއިން ބުނެއެވެ.

ލޮކްޑައުންއަށް ލުއިތަކެއް ދީފައިވަނިކޮށް ރާއްޖޭގައި ވައިރަސް އަށް ޕޮޒިޓިވްވާ މީހުންގެ އަދަދުތައް ވަނީ މަތިވާން ފަށާފަ އެވެ. އޭގެތެރޭގައި މާލޭގައި ދިރިއުޅޭ މީހުންގެ އިތުރުން ރަށްރަށަށްގޮސް ކަރަންޓީނުގެ މުއްދަތު ހަމަކޮށްފައިވާ މީހުންވެސް ހިމެނެ އެވެ. އެގޮތުން އއ. ތޮއްޑޫ، ހޯމް ކަރަންޓީނުގައި ހުރި ކުޑަ ކުއްޖަކު ހުކުރު ވަނީ ކޮވިޑަށް ޕޮޒިޓިވްވެފަ އެވެ. އަދި ބުރާސްފަތި ދުވަހު ހދ. ނޮޅިވަރަމްގައި ހޯމް ކަރަންޓީނުގައި ތިބި ބަޔަކު ވެސް ވަނީ ކޮވިޑް-19 އަށް ޕޮޒިޓިވްވެފަ އެވެ.