ރ. ދުވާފަރުގައި މިދިޔަ ހޮނިހިރު ދުވަހުގެރޭ ހިންގި މާރާމާރީގައި ޒަހަމްވި ޒުވާނާއަށް އައިޖީއެމްއެޗުން ފަރުވާދެމުންދާކަމަށް އެހޮސްޕިޓަލުން ބުނެފިއެވެ.
ރާއްޖެއެމްވީއަށް މައުލޫމާތު ދެއްވަމުން އައިޖީއެމްއެޗްގެ މީޑިއާ އޮފިޝަލް ވިދާޅުވީ އިތުރުފަރުވާ ދިނުމަށް މިޒުވާނާ އެހޮސްޕިޓަލަށް ގެނައީ އާދިއްތަ ދުވަހުގެ ހަވީރު ކަމަށެވެ. މިޒުވާނާ އޮޕްރޭޝަން ކުރުމަށްފަހު މިހާރު ސާޖިކަލް ވޯޑުގައި އޭނާ އެޑްމިޓުކޮށްފައިވާ ކަމަށް އޮފިޝަލް ވިދާޅުވިއެވެ.
އޮފިޝަލް ވިދާޅުވީ 21 އަހަރުގެ މިޒުވާނާގެ ހަށިގަނޑުގެ އެތަންމިތަނަށް ތޫނު އެއްޗަކުން ހަމަލާދީފައިވާ ކަމަށާއި، މިޒުވާނާގެ ހާލަތާއި މެދު އަދި ވަކި އެއްޗެއް ބުނަން ދަތިކަމަށެވެ.
"ހަށިގަނޑުގެ ވަރަށް ގިނަ ތަންތަނަށް ހަމަލާދީފަ ހުރީ. މިހާރު ވެސް ފަރުވާ ދެމުން މިއަންނަނީ. ހާލު ރަނގަޅޭ ވެސް ރަނގަޅު ނޫނޭ ވެސް ނުބުނެވޭނެ. ފަރުވާ ދެމުން އަންނަނީ" އޮފިޝަލް ވިދާޅުވިއެވެ.
ޒަޚަމްވި މިޒުވާނާއަށް ފުރަތަމަ ފަރުވާ ދީފައި ވަނީ ދުވާފަރު ހެލްތު ސެންޓަރުގައެވެ. ނަމަވެސް އެކަށޭނަ ފަރުވާ ދެވެން ނެތިގެން އުނގޫފާރުގައި ހުންނަ އެއަތޮޅު ރީޖަނަލް ހޮސްޕިޓަލަށް ގެންގޮސް އެމަޖެންސީގައި ވެސް ފަރުވާ ދީފަވެއެވެ.
ރާއްޖެއެމްވީއަށް މައުލޫމާތު ދެއްވަމުން ދުވާފަރު ކައުންސިލްގެ މެމްބަރު ވިދާޅުވީ މިޒުވާނާއަށް ހަމަލާދީފައި ވަނީ މޭ ކަށިގަނޑުން ތިރި ބަނޑުގެ ދެފަރާތުންނާއި ބުރަކަށިން ހަމަ އެ ދެ ދިމާލަށް ކަމަށެވެ. ހޮނިހިރު ދުވަހުގެރޭ 12 ޖެހިފަހުން ހިނގި މިހާދިސާ އެރަށު ކައުންސިލް އިދާރާ ކައިރީގައި ހިނގާފައި ވަނީ އެއް ގުރޫޕެއްގެ ދެމީހެއްގެ ދެމެދުގައި ހިނގި ހިތްހަމަނުޖެހުމެއްގައި ކަމަށް މިހާތަނަށް މައުލޫމާތު ލިބިފައިވާކަމަށް ކައުންސިލްގެ މެމްބަރު ވިދާޅުވިއެވެ.
މިމައްސަލަ ފުލުހުން ދަނީ ތަހުގީގު ކުރަމުންނެވެ.
