ރ ދުވާފަރުގައި ތޫނު އެއްޗަކުން ހަމަލާދީ ޒުވާނަކު ޒަޚަމްކޮށްލައިފިއެވެ.

ރާއްޖެ އެމްވީއަށް މައުލޫމާތު ދެއްވަމުން ދުވާފަރު ކައުންސިލް މެމްބަރަކު ވިދާޅުވީ އެހާދިސާގައި ޒަޚަމްވި ޒުވާނާއަށް އެރަށުގެ ހެލްތު ސެންޓަރުން އެކަށޭނަ ފަރުވާ ދެވެން ނެތިގެން އުނގޫފާރުގައި ހުންނަ އެއަތޮޅު ރީޖަނަލް ހޮސްޕިޓަލަށް ގެންގޮސްފައިވާކަމަށެވެ. އަދި އިމަޖެންސީގައި ފަރުވާދެމުންދާކަމުގެ މައުލޫމާތު ލިބިފައިވާ ކަމަށެވެ.

ކައުންސިލްގެ މެމްބަރު ވިދާޅުވީ ތޫނު އެއްޗަކުން ހަމަލާދީފައި ވަނީ މައުލޫމާތު ލިބފައިވާ ގޮތުގައި އެ ޒުވާނާގެ މޭ ކަށިގަނޑުން ތިރި ބަނޑުގެ ދެފަރާތުންނާއި ބުރަކަށިން ހަމަ އެ ދެ ދިމާލަށް ކަމަށެވެ. ގާތްގަޑަކަށް 21 އަހަރުގެ އެޒުވާނާއަށް ރީޖަނަލް ހޮސްޕިޓަލްގައި ފަރުވާދެމުން ދިޔަނަމަ ވެސް އަދި ވެސް ލޭމަނާ ނުވާކަމަށް މައުލޫމާތު ލިބިފައިވާކަމަށް ވެސް އޭނާ ވިދާޅުވިއެވެ.

ހޮނިހިރު ދުވަހުގެރޭ 12 ޖެހިފަހުން ހިނގި މިހާދިސާ އެރަށު ކައުންސިލް އިދާރާ ކައިރީގައި ހިނގާފައިވަނީ އެއް ގުރޫޕެއްގެ ދެމީހެއްގެ ދެމެދުގައި ހިނގި ހިތްހަމަނުޖެހުމެއްގައި ކަމަށް މިހާތަނަށް މައުލޫމާތު ލިބިފައިވާކަމަށް ކައުންސިލްގެ މެމްބަރު ވިދާޅުވިއެވެ. އަދި އެކަމާ ގުޅިގެން ފުލުހުންވެސް އެރަށުގައި ހަރަކާތެރިވަމުންދާކަމަށް ވެސް އޭނާ ވިދާޅުވިއެވެ.

ފުލުހުންގެ މީޑިޔާ އޮފިޝަލް ވިދާޅުވީ ރ ދުވާފަރުގައި ތޫނު އެއްޗަކުން ހަމަލާދީ މީހަކު ޒަޚަމްކޮށްލާފައިވާކަމުގެ ރިޕޯޓް ލިބިފައިވަނީ ހޮނިހިރު ދުވަހުގެރޭ 12:45 ހާއިރު ކަމަށާއި ޒަޚަމްވި މީހާއަށް ރ އުނގޫފާރު ރީޖަނަލް ހޮސްޕިޓަލުގައި ފަރުވާދެމުންދާކަމަށެވެ. އަދި ފުލުހުން އެމައްސަލަ ތަހުގީގް ކުރަމުންދާ ކަމަށެވެ.