ބޯކޮށާ ތަންތަނަށް އެއްފަހަރާ ޚިދުމަތް ހޯދަން ވަންނަ މީހުންގެ އަދަދު މަދުކުރުމަށް ސަމާލުކަން ދޭން ޖެހޭ
8 ޖުލައި 2020 | ބުދަ 18:54އެއްފަހަރާ ޚިދުމަތް ހޯދަން ވަންނަ މީހުންގެ އަދަދު މަދުކުރަން ޖެހޭ
ހެލްތް ޕްރޮޓެކްޝަން އޭޖެންސީގެ ޑިރެކްޓަރ އައިމިނަތު ޝައުފާ
ބޯކޮށާ ތަންތަނަށް އެއްފަހަރާ ޚިދުމަތް ހޯދަން ވަންނަ މީހުންގެ އަދަދު މަދުކުރުމަށް ސަމާލުކަން ދޭން ޖެހޭކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
ބުދަ ދުވަހުގެ ރޭ އެޗްއީއޯސީގައި ބޭއްވި ޕެނަލް ޑިސްކަޝަންގައި ވާހަކަ ދައްކަވަމުން ހެލްތް ޕްރޮޓެކްޝަން އޭޖެންސީގެ ޑިރެކްޓަރ އައިމިނަތު ޝައުފާ ވިދާޅުވީ، ބޯކޮށާ ތަންތަނުގެ ޚިދުމަތްދޭ ފަރާތްތަކުން ވެސް އެއްފަހަރާ ޚިދުމަތް ހޯދަން ވަންނަ މީހުންގެ އަދަދު މަދުކުރުމަށް ސަމާލުކަން ދޭން ޖެހޭނެ ކަމަށެވެ.
ޝައުފާ ވިދާޅުވީ، އެޕޮއިންޓްމަންޓް އިންތިޒާމުން ނުވަތަ އެއްފަހަރާ ވަދެވިދާނެ މީހުންގެ އަދަދުތައް ކަނޑައަޅައިގެންއެކަން ކުރެވިދާނެ ކަމަށެވެ. އަދި ޚިދުމަތް ހޯދާ ފަރާތްތަކުން ތޮއްޖެހުން ކުޑަވާނެ ގޮތަކަށް ކަންކަން އިންތިޒާމު ކުރަން ޖެހޭނެ ކަމަށެވެ.
އޭގެ އިތުރުން، ބޯކޮށާ ނިންމުމަށްފަހު އެކަމަށް ބޭނުންކުރި ތަކެއްޗާއި ތަންވެސް ސާފު ކުރަން ޖެހޭނެ ކަމަށެވެ. އަދި ތަނުގެ ސާފު ތާހިރު ކަމަށް ވެސް ޚާއްސަ ސަމާލުކަމެއް ދޭން ޖެހޭނެކަން އޭނާ ފާހަގަ ކުރެއްވިއެވެ.
ބޯކޮށާ ތަންތަނުގައި ޚިދުމަތްދޭ މުވައްޒަފުން "ގޮގްލްސް"އާއި "ފޭސް ޝީލްޑް" ބޭނުން ކުރުމަށް އެޗްއީއޯސީން ވަނީ އިރުޝާދު ދީފައެވެ. އެގޮތުން ޚިދުމަތް ހޯދަން އަންނަ މީހުން ވެސް މާސްކް އެޅުން ލާޒިމުވާނެ ކަމަށް ބުނެފައިވެއެވެ.
