ރައީސް ޔާމީންގެ ޝަރީއަތް: އިތުރު ފުރުސަތަކަށް އެދިވަޑައިގެންނެވުމުން ފަހު އަޑުއެހުން އެހެން ދުވަހަކަށް!
މިއަދު ބާއްވަން އުޅުނީ މިމައްސަލައިގެ ފަހު އަޑުއެހުން
ކުރީގެ ރައީސް އަބްދުﷲ ޔާމީން އާއި އެމަނިކުފާނުގެ ގާނޫނީ ޓީމުގެ ބޭފުޅުން ކްރިމިނަލް ކޯޓުން، އެމަނިކުފާނުގެ މައްޗަށް ހުކުމް ކުރުމަށް ބޭއްވި ޝަރީއަތުގައި: އެމްއެމްޕީއާރުސީގެ އިތުރު މައްސަލަތަކުގެ ތުހުމަތ
ކުރީގެ ރައީސް އަބްދުﷲ ޔާމީންގެ ފަރާތުން ހައިކޯޓުގައި އިސްތިއުނާފްކޮށްފައިވާ، މައްސަލައިގެ ޝަރީއަތް އަވަސް ކުރަން، އެމަނިކުފާނާއި އެމަނިކުފާނުގެ ޕާޓީން ބޭނުންވި ނަމަވެސް، ބުދަ ދުވަހު ބާއްވަން އޮތް ޝަރީއަތުގެ ފަހު އަޑުއެހުން، ރައީސް ޔާމީން އެދިވަޑައިގެންނެވުމުން ފަސްކޮށްފިއެވެ.
ބުދަ ދުވަހުގެ ޝަރީއަތުގެ އަޑުއެހުމަކީ، ރައީސް ޔާމީންގެ ފަރާތުންނާއި، ދައުލަތުގެ ފަރާތުން، ފަހުބަސް ވިދާޅުވުމަށް ފުރުސަތު ދިނުމުގެ ގޮތުން ބޭއްވި އަޑުއެހުމެކެވެ. އެގޮތުން، ރައީސް ޔާމީންގެ ގާނޫނީ ވަކީލުންނަށާއި ދައުލަތުގެ ގާނޫނީ ވަކީލުން 30 މިނެޓްގެ ވަގުތެއް ކޮންމެ ފަރާތަކަށް ދެއްވާފައެވެ.
އެގޮތުން ހުލާސާ ގޮތެއްގައި، ރައީސް ޔާމީންގެ ގާނޫނީ ވަކީލުންނާއި، ދައުލަތުގެ ގާނޫނީ ވަކީލުން ވާހަކަ ދެއްކެވުންފަހު، ރައީސް ޔާމީން އެދިވަޑައިގެންނެވުމުގެ މަތިން، އެމަނިކުފާނަށް 10 މިނެޓްގެ ވަގުތެއް ވާހަކަ ދެއްކެވުމަށް ޝަރީއަތުން ދެއްވިއެވެ.
ރައީސް ޔާމީން ވާހަކަ ދެއްކަވަން ފެއްޓެވުމުގެ ކުރިން އެމަނިކުފާނު ވިދާޅުވީ، އެމަނިކުފާނަށް ގާނޫނީ ވަކީލުންނާ ބައްދަލުކުރުމުގެ ފުރުސަތު ލިބިނުލައްވާތާ ވަރަށް ގިނަ ދުވަސްވެއްޖެ ކަމަށާއި، ނަމަވެސް ފޯނުން ގާނޫނީ ވަކީލުންނާ ވާހަކަ ދެއްކުމުގެ ފުރުސަތު ލިބިލައްވާ ކަމަށެވެ. ރައީސް ޔާމީން ވިދާޅުވީ، ދައުލަތުން ދައްކާފައިވާ ވާހަކަތަކާއި އަދި މައްސަލައިގެ ބާވަތުން ގާނޫނީ ވަކީލުންނާ ބައްދަލުކޮށް، މަޝްވަރާ ކޮށްލަން ބޭނުންވާ ކަމަށާއި، އޭގެ ފަހުން ފަހު ބަސް ވިދާޅުވުމަށް ފުރުސަތު ދެއްވުމަށް އެދިވަޑައިގަންނަވާ ކަމަށެވެ.
ރައީސް ޔާމީންގެ އެ ވާހަކަފުޅުތަކާ ގުޅިގެން، ފަނޑިޔާރުން ވަނީ ދައުލަތުގެ ވަކީލުންނާ ސުވާލުތަކެއް ކުރިމަތި ކުރުވާފައެވެ. ފަނޑިޔާރުންގެ ސުވާލުތަކާ ގުޅިގެން ދައުލަތުގެ ވަކީލާ ވިދާޅުވީ، ކޮވިޑް-19 ޕެންޑަމިކް އާގުޅިގެން، ކޮވިޑް-19 އިން ރައްކާތެރިވުމަށް ކ. މާފުއްޓާއި އަދި މޯލްޑިވްސް ކަރެކްޝަނަލް ސަރވިސްގައި ވެސް އުސޫލުތަކެއް ކަނޑައަޅާފައިވާ ކަމަށެވެ. އެހެންކަމުން ހެލްތް ޕްރޮޓެކްޝަން އެޖެންސީގެ ގައިޑްލައިނާ އެއްގޮތަށް، މާފުށީ ޖަލުގައި ކަނޑައަޅާފައިވާ އުސޫލުތަކާ ގުޅިގެން ވާކީލުންނާ ބައްދަލުވުމުގެ ފުރުސަތު މިދުވަސްވަރު ނުދެއްވާ ކަމަށެވެ. އަދި ކަރެކްޝަންސްގެ އޮފިސަރެއް ކޮވިޑް-19 އަށް ޕޮޒިޓިވްވުމާއި ގުޅިގެން ވެސް، ރޯގާއިން ރައްކާތެރިވުމަށް ފިޔަވަޅުތަކެއް އަޅާފައިވާ ކަމަށް ވެސް ވަކީލާ ވިދާޅުވިއެވެ.
ނަމަވެސް ފަނޑިޔާރުންގެ ބެންޗުގައި އިންނެވި އިސްފަނޑިޔާރު ހުސައިން މަޒީދު ވިދާޅުވީ، މިހާރު، ނިއު ނޯމަލްގެ ދަށުން ސަރުކާރުގެ އޮފީސްތައް ވެސް ހުޅުވިފައިވާ ކަމަށާއި، އެހެންކަމުން ކަރެކްޝަނުން މިހާރު އަމަލު ކުރާ ގޮތެއް ބުރާސްފަތި ދުވަހު ހައިކޯޓަށް ދައުލަތުގެ ފަރާތުން އަންގަވާ ދެއްވުމަށެވެ. އަދި ރައީސް ޔާމީނަށް އެމަނިކުފާނުގެ ގާނޫނީ ވަކީލުންނާ ބައްދަލު ކުރުމުގެ ފުރުސަތު ލިބިލެއްވޭނެ ގޮތެއް އޮތްތޯ ބައްލަވާ ދެއްވުމަށް ފަނޑިޔާރު އެދިލެއްވިއެވެ.
ދައުލަތުގެ ވަކީލާ ވިދާޅުވީ، ކަރެޝަންސްއާ ވާހަކަ ދައްކައިގެން ރައީސް ޔާމީނަށް ވަކީލުންނާ ބައްދަލު ކުރެވޭނެ ގޮތެެއް އޮތްތޯ ބެއްލެވުމަށްފަހު ކޯޓަށް އަންގަވާނެ ކަމަށެވެ. އިތުރަށް ދައުލަތުގެ ވަކީލާ ވިދާޅުވީ، މި އަޑުއެހުމަށްފަހު، ރައީސް ޔާމީނާ އެމަނިކުފާނުގެ ގާނޫނީ ވަކީލުން ބައްދަލު ކުރެވޭނެ އިންތިޒާމު ކޯޓުން ވެސް ހަމަޖައްސާ ދެވިދާނެ ކަމަށް ގަބޫލު ކުރައްވާ ކަމަށާއި، އެއީ މިހާރު ވެސް މި ޝަރީއަތަށް ރައީސް ޔާމީން ގެންނަވާފައި ވަނީ ހާއްސަ ހާލަތެއްގެ ދަށުން ކަމަށްވާތީ އެވެ.
ނަމަވެސް، ރައީސް ޔާމީނާއި އެމަނިކުފާނުގެ ގާނޫނީ ޓީމުން ވިދާޅުވީ، ގާނޫނީ ވަކީލުންގެ ވެސް މަޝްވަރާ ކުރައްވަން ޖެހޭތީއާއި އަދި ރައީސް ޔާމީން ވެސް އާލާސްކަންފުޅާ އުޅުއްވާތީ، ގާނޫނީ ވަކީލުންނާއެކު ބާއްވާ ބައްދަލުވުން އެހެން ދުވަހަކަށް ހަމަޖައްސާ ދެއްވުމަށް އެދޭ ކަމަށެވެ.
ފަނޑިޔާރު ވިދާޅުވީ، ނިންމައިގެން ހުންނެވީ ބުދަ ދުވަހުގެ މި އަޑުއެހުމަކީ ފަހު އަޑުއެހުމެއްގެ ގޮތުގައި ހަމަޖެއްސުމަށެވެ. އިތުރު އަޑުއެހުމެއް ބާއްވާނަމަ، މި މައްސަލަ އަވަސް ކުރަން ރައީސް ޔާމީން އެދިލައްވާފައިވީ ނަމަވެސް އިތުރު ލަސްކަމެއް އަންނާނެ ކަމަށެވެ. އެގޮތުން ކޯޓު ރޫމް ލިބުމުގެ ތާށިކަން ފަނޑިޔާރު ފާހަގަ ކުރެއްވިއެވެ.
ބުދަ ދުވަހުގެ ޝަރީއަތް ނިންމަވާ ލެއްވީ، ފަހު އަޑުއެހުމުގެ ގޮތުގައި އިތުރު އަޑުއެހުމެއް ބޭއްވުމަށް ނިންމެވުމަށްފަހުގައެވެ. ނަމަވެސް އެ އަޑުއެހުން ބާއްވާނެ ތާރީހެއް ޝަރީއަތުން އިއުލާނެއް ނުކުރައްވައެވެ.
ބުދަ ދުވަހުގެ މި އަޑުއެހުމަކީ، ފަހު އަޑުއެހުމެއްގެ ގޮތުގައި، ހަމަޖެއްސުމުގެ ފުރުސަތު ރައީސް ޔާމީނަށް ލިބިވަޑައިގެންނެވި ނަމަވެސް، އެމަނިކުފާނު ވަނީ އެފުރުސަތު ދޫކޮށްލައްވާފައެވެ. އެއީ، ރައީސް ޔާމީން ބޭނުންފުޅުވާ ގޮތަށް ގާނޫނީ ވަކީލުންނާ މަޝްވަރާ ކުރެއްވުމުގެ ފުރުސަތެއް ފަނޑިޔާރު ދެއްވި ނަމަވެސް، މިއަދުން މިއަދަށް ގާނޫނީ ވަކީލުންނާ މަޝްވަރާ ކުރެއްވުމަށް ރައީސް ޔާމީނާއި އެމަނިކުފާނުގެ ގާނޫނީ ޓީމުން ބޭނުންފުޅު ނުވުމުންނެވެ.
އެހެންކަމުން ރައީސް ޔާމީންގެ ޝަރީއަތުގެ ފަހު އަޑުއެހުން، ކަނޑައެޅިގެން ވަކި ތާރީހެއް ނެތްގޮތަށް މިވަނީ ފަސްކުރެވިފައެވެ. ފަހު އަޑު އެހުމަށްފަހު، ދެން ބާއްވާނީ ހުކުމް ކުރުމަށް ބާއްވާ ޝަރީއަތެވެ.
ރައީސް ޔާމީންގެ ޝަރީއަތް ލަސްވަމުންދަތީ، ރައީސް ޔާމީނާއި އެމަނިކުފާނު ނިސްބަތްވެވަޑައިގަންނަވާ ޕީޕީއެމް/ޕީއެންސީ ކޯލިޝަނުން ގެންދަނީ ކަންބޮޑުވުން ފާޅުކުރަމުންނެވެ. އަދި ރައީސް ޔާމީންގެ ޝަރީއަތް އަވަސްކޮށް، ގޮތެއް ނިންމާވާ ދިނުމަށް ހައިކޯޓުގައި ވެސް ވަނީ އެދިފައި ވެއެވެ.
ކޮވިޑް-19 ގެ ސަބަބުން ޝަރީއަތުގެ އަޑުއެހުންތައް ބޭއްވުމުގައި ދަތިތަކެއް ހުރިހާ ކޯޓުތަކަށްވެސް ވަނީ ކުރިމަތިއެވެ. ނަމަވެސް ދާދިފަހުން، އޯޑިއޯ އަދި ވީޑިއޯ ކޮންފަރެންސިންގ މެދުވެރިކޮށް ބައެއް ޝަރީއަތްތަކުގެ އަޑު އެހުންތައް ކުރިއަށް ގެންގޮސްފައިވެއެވެ.
ރައީސް ޔާމީންގެ ފަރާތުން ހައިކޯޓުގައި އިސްތިއުނާފު ކުރައްވާފައިވަނީ، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން، ކްރިމިނަލް ކޯޓުގައި އެދައުވާ އެމަނިކުފާނުގެ މައްޗަށް ސާބިތުވެ، 5 އަހަރަށް ޖަލަށްލުމާއެކު 5 މިލިއަން ޑޮލަރުން ޖޫރިމަނާކުރި މައްސަލައެވެ.
އެމްއެމްޕީއާރުސީގެ ހިޔާނާތުގެ ފައިސާއިން، މަނީ ލޯންޑަރ ކުރުމުގެ ކުށުގެ ދައުވާ އާގުޅިގެން ކްރިމިނަލް ކޯޓުން އެމަނިކުފާނުގެ މައްޗަށް ހުކުމް ކޮށްފައިވަނީ މިދިއަ އަހަރުގެ ނޮވެމްބަރު 28 ގަ އެވެ.
ގއ. ވޮޑަމުލާގެ އިކުއިޒިޝަން ކޯސްޓްގެ ގޮތުގައި ދައުލަތަށް ލިބެންޖެހޭ 1،000،000 ޑޮލަރު ރައީސް ޔާމީންގެ އެކައުންޓަށް ޖަމާކޮށްފައިވާއިރު، އެމްއެމްޕީއާރުސީގެ އިތުރު މައްސަލަތަކެއްގެ ތަހުގީގުތައް ކުރިއަށްދެ އެވެ. ދާދިފަހުން ވަނީ އެމްއެމްޕީއާރުސީގެ ހިޔާނާތުގައި ހިމެނޭ، ރ. ފުއްގިރި ރިސޯޓެއް ތަރައްގީ ކުރުމަށް ކުއްޔަށް ދިން މައްސަލައެއްގައި މަނީ ލޯންޑަރ ކުރުމުގެ ދައުވާއަކާއި ކޮރަޕްޝަންގެ ދައުވާއެއް ކްރިމިނަލް ކޯޓަށް ހުށަހަޅާފައެވެ. މި މައްސަލާގައި ދައުލަތުން ރައީސް ޔަމީންގެ މައްޗަށް ހޯދުމަށް މަސައްކަތް ކުރާ، ޖުމްލަ ފައިސާގެ އަދަދަކީ 591 މިލިއަން ރުފިޔާއެވެ.
