ކައުންސިލްތަކާއި އެލްޖީއޭ އުވާލުމަށް ގޮވާލާ ހުށަހެޅި ގަރާރުގެ ފުރަތަމަ ކިޔުން އިއްވައިފި
ގަރާރުގެ ފުރަތަމަ ކިއުން އިއްވާފައިވަނީ ބުދަ ދުވަހުގެ މަޖިލީހުގެ ޖަލްސާގަ
އެލްޖީއޭއިން ބޭއްވި ބައްދަލުވުމެއް- އެލްޖީއޭގެ އައު ބޯޑު އައްޔަނު ކުރައްވާފައިވަނީ ދާދި ފަހުން ފާސްކުރި އިދާރީ ދާއިރާތައް ލާމަރުކަޒީ އުޞޫލުން ހިންގުން ކަށަވަރުކުރުމުގެ ޚާއްޞަ ޤާނޫނުގެ ދަށުން
ސިޓީކައުންސިލްތަކާއި، އަތޮޅު ކައުންސިލްތަކާއި، ރަށުކައުންސިލްތައް އުވާލުމާއި، ލޯކަލްގަވަރމަންޓް އޮތޯރިޓީގެ ނަމުގައި އުފައްދާފައިވާ މުޢައްސަސާ އުވާލުމަށް ގޮވާލައި ހުށަހެޅި ޤަރާރުގެ ފުރަތަމަ ކިޔުން އިއްވައިިފިއެވެ.
ކާށިދޫ ދާއިރާގެ މެމްބަރު އަބްދުﷲ ޖާބިރު ހުށައެޅުއްވި މި ގަރާރުގެ ފުރަތަމަ ކިޔުން އިއްވާފައިވަނީ ބުދަ ދުވަހުގެ މަޖިލީހުގެ ޖަލްސާގައެވެ.
ޖާބިރުގެ މި ގަރާރުގައި ވަނީ ކޮވިޑް-19ގެ ސަބަބުން ރާއްޖޭގެ ހުރިހާ ސިނާޢަތްތައް މުޅިން ހުއްޓި، ރާއްޖޭގެ އިޤްތިޞާދު ފުނޑުފުނޑުވެ، ދައުލަތް ބަނގްރޫޓުވުމާއި ދިމާއަށް މިޞްރާބު ޖަހާފައިވާތީ، ރާއްޖޭގެ އިޤްތިޞާދަށް ލިބުނު ފޫބައްދަން ދަތި ގެއްލުންތަކުން ސަލާމަތްވުމާއި ހަމައަށް، ސަރުކާރުން ކުރަންޖެހޭ ޚަރަދުތައް ބޮޑުތަކުން ކުޑަކޮށް، މި ދިވެހި ޤައުމު ސަލާމަތް ވާނެ ގޮތުގެމަތިން ސަރުކާރުން އަޅަންޖެހިފައިވާ ފިޔަވަޅުތައް މިހިނދުން މިހިނދަށް އެޅުމަށް ބާރުއެޅުމުގެ ގޮތުން ރައްޔިތުންގެ މަޖިލީހުގެ ޤަވާޢިދުގެ 167 ވަނަ މާއްދާ ގެ ދަށުން ގަރާރު ހުށަހަޅާ ކަމަށެވެ.
މި ގަރާރުގެ ފުރަތަމަ ކިޔުން އިއްވުމާއެކު މަޖިލީހުގެ ގިނަ މެމްބަރުން ވަނީ ނިޒާމީ މައްސަލަތަކެއް ނަންގަވާފައެވެ. އެގޮތުން، ބައެއް މެމްބަރުން ވިދާޅުވީ މި ގަރާރުގައި ގާނޫނު އަސާސީ އާއި ޚިލާފު ކަންކަން ހިމެނޭ ކަމަށެވެ. އެހެންކަމުން މި ގަރާރު ބަލައިނުގަނެވޭނެ ކަމަށެވެ. އެހެންނަމަވެސް އެއްބަސް ނުވާ ކޮންމެކަމަކީ ގާނޫނު އަސާސީއާ ޚިލާފު ކަމެއްކަމުގައި ކަނޑަނޭޅޭނެ ކަމަށް ވެސް މެމްބަރަކު ފާހަގަކުރެއްވިއެވެ.
މިކަމާއި ގުޅިގެން ރައްޔިތުންގެ މަޖިލީހުގެ ރައީސް ވިދާޅުވީ މަޖިލީހުގައި އިސްލާމްދީނާއި ޚިލާފު ނޫން ކޮންމެ ވާހަކައެއް ގާރާރެއްގައި ހިމެނޭނެ ކަމަށެވެ.
