މެމްބަރުންގެ މަސައްކަތް ވަރަށް ފުރިހަމަ، ފާޑުކިޔުން އަމާޒުވި ނަމަވެސް ކަންބޮޑުވެވަޑައިނުގަންނަވާ: މަޖިލިސް ރައީސް

ރައްޔިތުންގެ މަޖިލީހުގެ މެމްބަރުން ކުރައްވަމުން ގެންދަވާ މަސައްކަތަށް ފާޑުކިއުން އަމާޒުވި ނަމަވެސް ކަންބޮޑުވެވަޑައިނުގަތުމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

މައްޗަންގޮޅި ދެކުނު ދާއިރާގެ މެމްބަރު އަހުމަދު ހައިތަމް ދިވެހިރާއްޖޭގައި ކުޑަކުދިންނަށް ކުރާ އަނިޔާ ހުއްޓާލުމަށްޓަކައި ކުޑަކުދިންނާއި، އެ ކުދިންގެ ޙައްޤުތައް ހިމާޔަތްކުރުމުގެ މަސްއޫލިއްޔަތު ޤާނޫނުން މަތިކޮށްފައިވާ ފަރާތްތަކުން އެމީހުންގެ މަސްއޫލިއްޔަތު ފުރިހަމަގޮތުގައި އަދާކުރުމަށް ބާރުއެޅުމުގެގޮތުން ހުށަހެޅުއްވި ގަރާރަށް ބުދަ ދުވަހު ބަހުސް ކުރެވުނުއިރު މަޖިލިސް ރައީސް ވިދާޅުވީ ފާޑުކިޔުމެއް އަމާޒުވެދާނެތީ މެމްބަރުން ތަޅުލެވިފައި ނުތިއްބެވުމަކީ މުހިއްމު ކަމެއް ކަމަށެވެ.

Advertisement

ކުޑަކުދިންގެ ރައްކާތެރިކަން ކަށަވަރުކުރުމާއި ގުޅިގެން ބަހުސް ކުރަމުންދާއިރު 19 ވަނަ ރައްޔިތުންގެ މަޖިލީހުން ވަނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި ކުޑަކުދިންގެ އަދުލުގެ ގާނޫނު ފާސްކޮށްފައެވެ. އަދި ކުޑަކުދިންނާއި ގުޅޭ އެތައް މައްސަލައެއް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ބަލަމުންދާއިރު، މި މައްސޫލިއްޔަތު އެޅިފައިވާ މުއައްސަސާތައް ޒިންމާދާރުކުރުވުމަށް ވެސް ކޮމެޓީން ދަނީ މަސައްކަތް ކުރަމުންނެވެ.

ރޭޕްއާއި ޖިންސީ އަނިޔާގެ މައްސަލަ ތަކުގައި ހައްޔަރު ކުރާ މީހުންނަށް އެންމެ އެކަށީގެންވާ އަދަބު ނުލިބުމަކީ ގިނަ ބައެއްގެ ހުރި ކަންބޮޑުވުމެކެވެ. ދޭތެރޭ ދޭތެރެއިން މައްސަލަތައް ހޫނުވެ ރައްޔިތުން ރުޅިގަދަވާ ހިސާބަށް ދިޔުމުން ފިޔަވަޅު އެޅުމަށް ފަހު އަނެއްކާ ވެސް، އެކަމަށް މާ ބޮޑު ސަމާލުކަމެއް އެއްވެސް މުއައްސަސާއަކުން ދޭ ތަނެއް ނުފެންނަ ކަމަށް ބުނެ ރައްޔިތުންނާއި ކަމާބެހޭ ޖަމިއްޔާތަކުން އަންނަނީ ކަންބޮޑުވުން ފާޅުކުރަމުންނެވެ.