ނޭކުރެންދޫ ކަނޑޫފަލަށް ދިމާވެފައިވާ މައްސަލައަށް ހައްލެއް ހޯދުމަށް އެދިވަޑައިގެން ކަނޑުލަށްވާ ގޮތް ދައްކާލައިފި
7 ޖުލައި 2020 | އަންގާރަ 06:17ކަނޑޫފާގެ ދިހަހާހަށްވުރެ ގިނަ ގަސް މަރުވެފައިވޭ
މަކުނުދޫ ދާއިރާގެ މެމްބަރ މުހައްމަދު ރާއީ ނޭކުރެންދޫ ކަނޑޫފަލަށް އަންނަ ބަދަލުތައް ދައްކުވައިދޭ ފޮޓޯއެއް ޖަލްސާގައި ދައްކާލައްވަނީ
ރާއްޖޭގެ އެންމެ ބޮޑު ކަނޑޫފާތަކުގެ ތެރޭގައި ހިމެނޭ ހދ. ނޭކުރެންދޫ ކަނޑޫފާ ހަލާކުވަމުންދާ މައްސަލަ އެދާއިރާ ތަމްސީލު ކުރައްވާ ރައްޔިތުންގެ މަޖިލީހުގެ މެމްބަރު މަކުނުދޫ ދާއިރާގެ މެމްބަރު މުހައްމަދު ރާއީ މަޖިލީހުގެ ސަމާލުކަމަށް ގެންނަވައިފިއެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި ތިނަދޫއަށް އުދައަރާ ގެއްލުންތައްވި މައްސަލާގައި އެ ދާއިރާގެ މެމްބަރ އަބްދުﷲ ސަނީފް ހުށަހަޅުއްވާފައިވާ ކުއްލި މައްސަލައަށް ބަހުސް ކުރައްވަމުން ރާއީ ވިދާޅުވީ ކަނޑޫފާގެ ދިހަހާހަށްވުރެ ގިނަ ގަސް މަރުވެފައިވާކަމުގެ މައުލޫމާތު ލިބިވަޑައިގެންފައިވާ ކަމަށެވެ. އެކަމުގެ ތަފްސީލީ މައުލޫމާތު ހިއްސާކުރައްވަމުން ރާއީ ވަނީ ނޭކުރެންދޫ ކަނޑޫފަލަށް އައިސްފައިވާ ބަދަލު ފެންނަ ފޮޓޯ އަކާއި އެ ކަނޑޫފަލުން މީގެކުރިން ގެނެސްފައިވާ ކަނޑުލާއި މިހާރު ގެންނަ ކަނޑޫ ދައްކަވާލައްވާފައެވެ. އަދި ފޮޓޯ އާއި ކަނޑޫފާ ވަނީ ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަތްޕުޅަށް އަރުވާފައެވެ.
ރާއީ ވިދާޅުވީ މި މައްސަލަ ހައްސާސް މައްސަލައެއްގެ ގޮތުގައި ގާތުން ބައްލަވައި ދެއްވުމަށް މަޖިލީހުގެ އެންވަޔަރަންމަންޓް އެންޑް ކްލައިމެޓް ކޮމިޓީއަށް ވެސް ދަންނަވާނެ ކަމަށެވެ. ކަނޑޫފާ ހަލާކުވެގެން ދިޔުމަށް އަދި ކަނޑޫފަލުން ރައްޔިތުންނަށް ލިބެމުންދާ ފައިދާ ނުލިބިދާކަށް އެދިވަޑައިނުގަންނަވާ ކަމަށް ރާއީ ވިދާޅުވިއެވެ.
މިކަމާއި ގުޅިގެން ވާހަކަ ދައްކަވަމުން ރައީސް ނަޝީދު ވިދާޅުވީ ނޭކުރެންދޫ ކަނޑޫފަލަށް ވަމުންދާ ގޮތް މެމްބަރު ސާފުކޮށްދެއްވައިފި ކަމަށެވެ.
ރާއްޖޭގެ އެންމެ ބޮޑު ކަނޑޫފާތަކުގެ ތެރޭގައި ހިމެނޭ ހއ. ކެލާގެ ކަނޑޫފަލާއި، ހދ. ނޭކުރެންދޫގެ ކަނޑޫފާ މަރުވާ ސަބަބު ހޯދަން އެންވަޔަރަމެންޓް ޕްރޮޓެކްޝަން އެޖެންސީ އާއި މިނިސްޓްރީ އޮފް ފިޝަރީޒް އެންޑް އެގްރިކަލްޗާ ގުޅިގެން ދިރާސާއެއް ވަނީ ހަދަން ފަށާފައެވެ. މި ދެ ކަނޑޫފަލަކީ ވެސް ސަރުކާރުން 2018 ވަނަ އަހަރުގެ ފަހުކޮޅު ހިމާޔަތްކޮށްފައިވާ ދެ ކަނޑޫފަލެވެ.
