މުސާރަ ނުދީ މަސައްކަތް ކުރުވީ މުސާރަ ދޭނެކަމުގެ ޔަގީންކަން ސީލް މޯލްޑިވްސްއިން ދިނުމުން: ރިޒް މޯލްޑިވްސް
ފައިސާގެ ކަންކަން ލަސްވަމުންދަނީ ލޯނެއް ޕްރޮސެސް ވަމުންދާތީކަމަށް ސީލް މޯލްޑިވްސްއިން ބުނެފައިވޭ
ބޮޑުފިނޮޅުގައި ފުލުހުން ހަރަކާތްތެރިވަނީ
ބޮޑުފިނޮޅުގައި ތިބި މުވައްޒަފުންނަށް މުސާރަ ނުދީ މަސައްކަތް ކުރުވީ މުސާރަ ދޭނެ ކަން ސީލް މޯލްޑިވްސް ޕްރައިވެޓް ލިމިޓެޑުން ޔަޤީންކަން ދިނުމުން ކަމަށް ރިސޯޓުގެ ކޮންޓްރެކްޓަރ ރިޒް ޕްރައިވެޓް ލިމިޓެޑުން ބުނެފިއެވެ.
ރިސޯޓުގެ ކޮންޓްރެކްޓަރ ރިޒް ޕްރައިވެޓް ލިމިޓެޑުގެ ޤާނޫނީ ވަކީލުންގެ ޓީމުގެ ފަރާތުން ޤާނޫނީ ވަކީލު އަލީ ސައީދު ރާއްޖެ ޓީވީގެ "ސުންގަޑި" ޕްރޮގްރާމަށް މައުލޫމާތު ދެއްވަމުން ވިދާޅުވީ މުވައްޒަފުންގެ މުސާރައާއި ގުޅިގެން ސީލް މޯލްޑިވްސް ޕްރައިވެޓް ލިމިޓެޑާއި ރިޒް ޕްރައިވެޓް ލިމިޓެޑާއި ދެކުންފުނީގެ މެދުގައި ވަރަށް ގިނަ މުއާމަލާތްތަކެއް ހިންގުނު ކަމަށެވެ.
ފައިސާގެ ކަންކަން ލަސްވަމުންދަނީ ލޯނެއް ޕްރޮސެސް ވަމުންދާތީ ކަމަށާއި ލޯނު ޕްރެސަސް ވުމުން މުސާރަ ދޭނެ ކަމަށް ސީލް މޯލްޑިވްސް އިން ޔަޤީންކަން ދެމުންދިޔަ ކަމަށެވެ.
އެހެންކަމުން ހުރިހާ މުވައްޒަފުން ވެސް ތިބީ ލޯން ޕްރޮސެސް ވެގެން ފައިސާ ލިބޭނެ ކަމުގެ އިންތިޒާރުގައި ކަމަށް އޭނާ ވިދާޅުވިއެވެ.
ކޮވިޑާއި ގުޅިގެން ސީލް މޯލްޑިވްސްއަށް ލިބޭ ލޯނުގެ ތެރެއިން 500،000 ރުފިޔާ ލިބޭނެ ކަމަށް 31 ޖޫން އަދި 01 ޖުލައި ގައިވެސް ބުނެފައިވާ ކަމަށެވެ.
އަދި ލޯނުގެ ތެރެއިން މުސާރަ ކަންތައް ނިންމާލަދޭނެ ކަމަށާއި ފުރަތަމަ ލިބޭ 500،000 ގެ ތެރެއިން ކޮންމެ މުވައްޒަފަކަށް 2000 ރުފިޔާ ދިނުމަށްފަހު ކުރިއަށް އޮތް ތިން މަސްދުވަހުގެ ތެރޭގައި ބާކީ ފައިސާ ދޭ ގޮތަށް ވާހަކަ ދެކެވިފައިވާ ކަމަށެވެ.
ބޮޑުފިނޮޅުގައި ބިދޭސީން ކުރަން ފެށި އިހުތިޖާޖު ހަމަނުޖެހުމަށް ބަދަލުވެފައިވަނީ ސީލް މޯލްޑިވްސްގެ ފަރާތުން ބަޔަކު ތުޅާދޫއިން އިހުތިޖާޖު ހުއްތުވުމަށްޓަކައި އެރަށަށް އެރި ހިސާބުން ކަން އޭނާ ފާހަގަ ކުރެއްވިއެވެ.
ސައީދު ވިދާޅުވީ މި މައްސަލަ ހައްލުކުރުމަށްޓަކައި މޯލްޑިވްސް ޕޮލިސްސާރވިސް އިން ދެފަރާތަށް ވަރަށް ރަނގަޅު މާހައުލެއް ޤާއިމްކޮށްދީފައިވާ ކަމަށާއި މިކަމާއި ގުޅޭ ގޮތުން ހުރިހާ މުއައްސަސާއަކާއި ވާހަކަ ދެއްކުމަށް މީޑީއޭޓަރެއްގެ ދައުރު ފުލުހުން އަދާކޮށްދެމުންދާ ކަމަށެވެ.
ސީލް މޯލްޑިވްސްގެ ފަރާތުން އެއްވެސް ބޭފުޅަކު މި ވެރިފިކޭޝަންސްގެ ތެރޭގައި ބައިވެރިވެފައި ނުވާކަން ވަނީ ފާހަގަ ކޮށްފައެވެ.
ބޮޑުފިނޮޅުގައި މަސައްކަތް ކުރަމުން ދިޔަ ބިދޭސީންތަކަކަށް ލިބެންޖެހޭ މުސާރަ ނުލިބޭތީ، އެ މީހުން ވަނީ އެކަމާ ދެކޮޅަށް މިދިޔަ ބުރާސްފަތި ދުވަހުގެ ރޭ ހަޅުތާލުކޮށްފައެވެ.
ހަޅުތާލުކުރި ބިދޭސީން ވަނީ ފައިބަން އުޅުނު ދިވެހިން ހުއްޓުވައި، އެ ރަށުގެ އެވަގުތު ތިބި 12 ދިވެހިން ރަހީނުކޮށްފައެވެ.
އެއަށްފަހު އެ މީހުން ވަނީ އެ ރަށުގެ ތަކެއްޗަށް ގެއްލުންދީފައެވެ. ބިދޭސީންގެ އަތް ދަށުގައި ތިބި ދިވެހިން ސަލާމަތްކުރީ ހުކުރު ދުވަހު އެ ރަށަށް އެރި ފުލުހުންގެ ޓީމުންނެވެ. މައްސަލައިގައި ހިމެނޭ 19 ބިދޭސީއަކު ހައްޔަރުކޮށް އެ މީހުންގެ ބަންދަށް 15 ދުވަސް މިހާރު ވަނީ ޖަހާފައެވެ.
