އައިޖީއެމްއެޗްގެ ކޭސް: 6 މުވައްޒަފުންނާއި 7 ބަލިމީހުންގެ އިތުރުން ދެ އެހީތެރިން ޕޮޒިޓިވްވެފައިވޭ
ކޮންޓެކްޓް ޓްރޭސިންނާއި ސާމްޕަލް ނެގުމުގެ މަސައްކަތް ދަނީ ކުރިއަށް
އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)
އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ކޭސްއާ ގުޅިގެން 6 މުވައްޒަފުންނާއި 7 ބަލިމީހުންގެ އިތުރުން ދެ އެހީތެރިން ޕޮޒިޓިވްވެފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން ހާމަކޮށްފިއެވެ.
އާދިއްތަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެޗްއީއޯސީގެ ސްޕޯކްސްޕާސަން ޑރ. ފާތުމަތު ނަޒްލާ ރަފީޤް ވިދާޅުވީ އާދިއްތަ ދުވަހު ލިބުނު ނަތީޖާތަކުން އައިޖީއެމްއެޗްގެ އިތުރު 2 މުވައްޒަފުން ޕޮޒިޓިވްވެފައިވާ ކަމަށެވެ. އަދި ހޮސްޕިޓަލުން ދޫކޮށްލެވުނު 2 ބަލި މީހުން ވެސް ޕޮޒިޓިވްވެފައިވާ ކަމަށާއި މިހާރު ކުރިއަށް ދަނީ ކޮންޓެކްޓް ޓްރޭސިންނާއި ސާމްޕަލް ނެގުމުގެ މަސައްކަތް ކަމަށް ވެސް ނަޒްލާ ވިދާޅުވިއެވެ.
އާދިއްތަ ދުވަހުގެ މެންދުރާއި ހަމައަށް އައިޖީއެމްއެޗުން 308 ސާމްޕަލް ނަގާފައިވާ ކަމަށް ޑރ. ނަޒްލާ ފާހަގަކުރެއްވިއެވެ. އަދި އިތުރަށް ކޭސްތައް ފެންނަ ވަރަކަށް ކޮންޓެކްޓް ޓްރޭސިންގގެ މަސައްކަތް ކުރެވިގެންދާނެ ކަމަށް ވެސް ވިދާޅުވިއެވެ.
އައިޖީއެމްއެޗްއާ ގުޅިގެން ހުރި އިތުރު ކޭސްއެއް ފެނިފައިވާ ކަމަށް ވެސް ޑރ. ނަޒްލާ ވިދާޅުވިއެވެ. އަދި ފޮޒިޓިވްވި މި މީހާ އަކީ ފިޔަވަތީގައި މަސައްކަތް ކުރާ ކުދިން ބަލާ މީހެއް ކަމަށާއި މި މީހާއަކީ އައިޖީއެމްއެޗްގައި އޮތް ބަލި މީހެއްގެ އާއިލާ މީހެއް ކަމަށް ވެސް ނަޒްލާ ފާހަގަކުރެއްވިއެވެ.
މި ކޭސްއާ ގުޅިގެން މިހާރު ފިޔަވަތީގެ 11 މުވައްޒަފުންނާއި 21 ކުދިން ކަރަންޓީންގައި ތިބި ކަމަށާއި މިވަގުތު އެ ހުރިހާ އެންމެން ވެސް ކަރަންޓީން ކުރެވިފައިވަނީ ފިޔަވަތީގައި ވަކި ކޮޓަރިތަކެއްގައި ކަމަށް އެޗްއީއޯސީން ބުނެއެވެ. އަދި ކަރަންޓީން ކުރެވިފައިވާ ކުދިންގެ އުމުރަކީ 6 އަހަރާއި 11 އަހަރު ކަމަށް ވެސް އެޗްއީއޯސީން ހާމަކުރެއެވެ.
މީގެ އިތުރުން ހޮނިހިރު ދުވަހު ޓްރީޓޮޕް ހޮސްޕިޓަލުގައި މަސައްކަތް ކުރާ މުވައްޒަފަކު ޕޮޒިޓިވްވި ކަމަށާއި އެ ހޮސްޕިޓަލުގައި ކޮންޓެކްޓް ޓްރޭސިންގގެ މަސައްކަތް ކުރިއަށް ގެންގޮސްފައިވާ ކަމަށް ޑރ. ނަޒްލާ ވިދާޅުވިއެވެ. އަދި 9 މީހަކު ކޮންޓެކްޓުންގެ ގޮތުގައި ދެނެގަނެވިފައިވާކަން ފާހަގަކުރައްވާ އެޗްއީއޯސީގެ ސްޕޯކްސްޕާސަން ވިދާޅުވީ ޓެސްޓު ނެގުމާއި ސާމްޕަލް ޓެސްޓު ކުރުމުގެ ކަންތައްތައް މިހާރު ކުރިއަށްދާ ކަމަށެވެ.
