އެމްއާރްޑީސީގެ މުވައްޒަފުންނާއި ވެހިކަލްތައް މެޑަމް ފާތުން ބޭނުން ކުރެއްވުމުގައި ކޮރަޕްޝަނެއް ނެތް: އޭސީސީ
2 މާރިޗު 2018 | ހުކުރު 11:32އެފްއޭއެމް އިމާރާތަށް ތަކެތި ބަދަލުކުރަން ބޭނުންކުރީ އެމްއާރްޑީސީގެ ވެހިކަލް
ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމް ދީދީ
މޯލްޑިވްސް ރޯޑް ޑިވެލޮޕްމަންޓް ކޯޕަރޭޝަން (އެމްއާރްޑީސީ) ގެ މުވައްޒަފުންނާއި ވެހިކަލްތައް، ރައީސް އަބްދުﷲ ޔާމީންގެ އަނބިކަނބަލުން ފާތުމަތު އިބްރާހިމް ދީދީ ބޭނުންކުރެއްވުމުގައި ކޮރަޕްޝަނުގެ އަމަލެއް އެކުލެވިގެންނުވާ ކަމަށް އެންޓި ކޮރަޕްޝަން ކޮމިޝަން(އޭސީސީ) އިން ނިންމައިފިއެވެ.
އޭސީސީ އިން އެފަދަ އިން ނިންމާފައި ވަނީ، ފާތުމަތު އިބްރާހިމް ދީދީ ހިންގަވާ ކެމްޕެއިން އޮފީހުގެ ތަކެތި ފުޓްބޯލް އެސޯސިއޭޝަން އޮފް މޯލްޑިވްސް(އެފްއޭއެމް) ގެ އިމާރާތުގެ ބަޔަކަށް ބަދަލުކުރުމުގައި އެމްއާރްޑީސީގެ މުވައްޒަފުންނާއި ވެހިކަލްތައް ބޭނުންކޮށްފައިވާ ކަމަށް ބުނެ އެ ކޮމިޝަނަށް ހުށަހެޅުނު މައްސަލަ ބެލުމަށްފަހުގަ އެވެ.
ފާތުމަތު އިބްރާހިމް ދީދީ ހިންގަވާ އޮފީސް، އެފްއޭއެމް އިމާރާތަށް ބަދަލުކޮށްފައިވަނީ މިދިޔަ އަހަރުގެ އޮގަސްޓް މަހުގަ އެވެ. އެތަނަށް މުދާ ބަދަލުކުރުމުގައި އެމްއާރްޑީސީގެ މުވައްޒަފުން ހަރަކާތްތެރިވެފައިވާއިރު، މުދާ އުފުލާފައިވަނީ އެ ކުންފުނީގެ ވެހިކަލްތަކުގައެވެ.
އެ މައްސަލަ ބެލުމަށްފަހު އޭސީސީއިން ނިންމި ނިންމުމުގައިވާ ގޮތުގައި، ފާތުމަތު އިބްރާހިމް ދީދީ ހިންގަވާ ކެމްޕެއިން އޮފީހުގެ ތަކެތި އެފްއޭއެމް އިމާރާތަށް ބަދަލުކުރުމަށް އެމްއާރްޑީސީގެ ވެހިކަލް ބޭނުންކޮށްފައިވަނީ ކުއްޔަށް ނަގައިގެންނެވެ. އަދި މި މައްސަލައިގައި ކޮރަޕްޝަން ހުއްޓުވުމާއި މަނާކުރުމުގެ ގާނޫނުގައި ބަޔާންކޮށްފައިވާފަދަ ކޮރަޕްޝަނުގެ އަމަލެއް އެކުލެވިގެންވާ ކަމަށް ފާހަގަކުރެވިފައިނުވާ ކަމަށް އޭސީސީގެ ނިންމުމުގައިވެއެވެ.
ސައުދީ އަރަބިއްޔާގެ ސަރުކާރުން ދިވެހި ރައްޔިތުންނަށް ހަދިޔާކުރި ކަދުރުތަކުން ބައެއް ފާތުމަތު އިބްރާހިމް ދީދީ ހިންގަވާ ޖަމިއްޔާގެ ނަމުގައި ބެހި މައްސަލައެއް ވެސް އޭސީސީއިން ތަހުގީގުކުރި އެވެ. އެ ކަދުރުތައް ފާތުމަތު އިބްރާހިމް ދީދީގެ އޮފީހަށް ގެންގޮސްފައިވަނީ ވެސް އެމްއާރްޑީސީގެ ވެހިކަލްތަކުގައެވެ. އެ މައްސަލަ ބެލުމަށް ފަހު ވެސް އޭސީސީއިން ނިންމާފައިވަނީ ކޮރަޕްޝަނުގެ އަމަލެއް އެކުލެވިގެންނުވާ ކަމަށެވެ.
