ކުޅުދުއްފުށީގައި ޕީސީއާރު ޓެސްޓު ކުރެވޭނެ އިންތިޒާމު ހަމަޖައްސައިފި
ދުވާލަކު 72 ސާމްޕަލް ޓެސްޓް ކުރެވޭނެ
ކުޅުދުއްފުށީ ރީޖަނަލް ހޮސްޕިޓަލުގެ ޕީސީއާރު ލެބް
ކުޅުދުއްފުށީގައި ޕީސީއާރު ޓެސްޓު ކުރެވޭނެ އިންތިޒާމު ހަމަޖައްސައިފިއެވެ.
ކުޅުދުއްފުށި ރީޖަނަލް ހޮސްޕިޓަލް އިން ކުރި ޓުވީޓެއްގައި ބުނެފައިވަނީ ސަރުކާރުން ރާއްޖޭގެ އެކި ހިސާބުތަކުގައި ކޮވިޑް-19 ށް ޓެސްޓް ކުރެވޭނެ ގޮތް ހަމަޖެއްސުމަށްޓަކައި ކުރަމުންދާ މަސައްކަތުގެ ތެރެއިން ކުޅުދުއްފުށީ ރީޖަނަލް ހޮސްޕިޓަލު (ކޭއާރުއެޗު)ގެ ޕީސީއާރު ލެބްގެ މަސައްކަތް ނިމި މިހާރު ޓެސްޓް ކުރެވޭނެ އިންތިޒާމު ހަމަޖެހިފައިވާ ކަމަށެވެ.
ކޭއާރުއެޗުގެ ފަރާތުން މައުލޫމާތު ދެމުން ބުނީ ލެބުގައި ހުރި ޕީސީއާރު މެޝިނުން ދުވާލަކު 72 ސާމްޕަލް ޓެސްޓް ކުރެވޭނެ ކަމަށެޗެ.
އަދި އެ ލެބް ޓެކްނޮލޮޖިސްޓުން އައިޖީއެމްއެޗުގައި ތިން ހަފްތާގެ ތަމްރީނު ޕްރޮގުރާމެއް ފުރިހަމަ ކޮށްފައިވާ ކަމަށް ވެސް އެ ހޮސްޕިޓަލުން މައުލޫމާތު ދީފައިވެއެވެ. އެހެންނަމަވެސް، މި ވަގުތު ތަމްރީނު ފުރިހަމަ ކޮށްފައި ވަނީ ދެ ލެބް ޓެކްނޮލޮޖިސްޓުން ކަމަށް ވާތީ ފުލް ކެޕޭސިޓީގައި އަދި އޮޕަރޭޓް ނުކުރެވޭނެ ކަމަށާއި ކުރިއަށް އޮތްތަނުގައި އިތުރު މުވައްޒަފުން ތަމްރީނު ވެގެން ދާނެ ކަމަށެވެ.
ޑަބްލިއުއެޗްއޯއިން ފަންޑު ކޮށްގެން ކުރިއަށް ގެންދިޔަ ޕީސީއާރު ލެބްގެ މަސައްކަތް ކޮށްފައި ވަނީ ވޭވް ލެންތު ކޮމްޕެނީ ޕްރައިވެޓް ލިމިޓެޑުންނެވެ. ލެބްގެ ސިވިލް މަސައްކަތް ނިންމާފައިވަނީ 4 ޖޫން 2020 ގައެވެ.
