ބޮޑުފިނޮޅުގައި މަސައްކަތް ކުރި މުވައްޒަފުންނަށް ހައްގު މިންވަރު، މެމްބަރު ރިޒާގެ އެކައުންޓް ފްރީޒްކޮށް މުދާ ނަގައިގެން ވިޔަސް ދިނުމަށް ނަވާނަވައިން ގޮވާލައިފިއެވެ.

ހަ މަހަށް ވުރެ ގިނަ ދުވަހު ބިދޭސީންތަކަކަށް މުސާރަ ނުދިން މައްސަލައާއި ގުޅިގެން ދިވެހިން ރަހީނުކުރި އަމަލު ކުށްވެރިކޮށް ނަވާނަވައިން ނެރުނު ބަޔާނުގައި ވަނީ ކުންފުނީގެ ވެރިފަރާތް، ރައްޔިތުންގެ މަޖިލީހުގެ މިލަންދޫ ދާއިރާގެ މެމްބަރު އަލީ ރިޒާގެ އެކައުންޓްތައް ފްރީޒް ކޮށް މުދާ ނަގައިގެން ވިޔަސް ވީ އެންމެ އަވަހަކަށް މަސައްކަތްތެރިންގެ ހައްގު މުސާރަ ދީ އިންސާފުގެ ކުރިމައްޗަށް ގެނައުމަށް ސަރުކާރާއި ކަމާއިބެހޭ އިދާރާތަކަށް ގޮވާލާފައެވެ.

އަދި މަސައްކަތްތެރިންގެ ހައްގުތައް ނިގުޅައިގަނެފައިވާ ފަރާތްތައް ފުރިހަމައަށް ޖަވާބުދާރީކުރުވައި، މަސައްކަތްތެރިން ގޮވާލާ ކަންކަމަށް އިޖާބަ ދިނުމަށް ނަވާނަވައިން ވަނީ ގޮވާލާފައެވެ. އަދި، ބިދޭސީ މަސައްކަތްތެރިންގެ އުޖޫރަ ހަމައަށް ނުދީ، އެފަރާތްތަކުގެ މިނިވަންކަމާއި، އިންސާނީ ޙައްޤުތަކަށް އަރައިގަތުމުން، އެ މަސައްކަތްތެރިންނާއި އެ ފަރާތްތަކުގެ އާއިލާގެ ދިރިހުރުމަށް ނުރައްކާ ވާކަން ގަބޫލު ކުރަންޖެހޭކަމަށްވެސް ނަވާނަވައިން ވަނީ ބުނެފައެވެ.

ބޮޑުފިނޮޅުގައި މަސައްކަތް ކުރަމުން ދިޔަ ބިދޭސީންތަކަކަށް ލިބެންޖެހޭ މުސާރަ ނުލިބޭތީ، އެ މީހުން ވަނީ އެކަމާ ދެކޮޅަށް ހަޅުތާލުކޮށްފައެވެ. ބިދޭސީން ކުރި ހަޅުތާލު ގޯސްވެގެން ދިޔައީ އެ ރަށުގައި ތިބި ދިވެހިންތަކެއް ރަށުން ފައިބަން އުޅެނިކޮށެވެ.

ހަޅުތާލުކުރި ބިދޭސީން ވަނީ ފައިބަން އުޅުނު ދިވެހިން ހުއްޓުވައި، އެ ރަށުގެ އެވަގުތު ތިބި 12 ދިވެހިން ރަހީނުކޮށްފައެވެ. އަދި އެ މީހުން ވަނީ އެ ރަށުގެ ތަކެއްޗަށް ގެއްލުންދީފައެވެ. ބިދޭސީންގެ އަތް ދަށުގައި ތިބި ދިވެހިން ސަލާމަތްކުރީ ހުކުރު ދުވަހު އެ ރަށަށް އެރި ފުލުހުންގެ ޓީމުންނެވެ. މައްސަލައިގައި ހިމެނޭ 19 ބިދޭސީއަކު ހައްޔަރުކޮށް އެ މީހުންގެ ބަންދަށް 15 ދުވަސް މިހާރު ވަނީ ޖަހާފައެވެ.