އައު އާންމު ހާލަތުގެ މި މުއްދަތުގައި ވެހިކަލް ސްޓިކަރ މީރާއިން ދޫ ނުކުރާނެ
5 ޖުލައި 2020 | އާދީއްތަ 07:03ވެހިކަލް ސްޓިކަރ ދޫކުރާނެ ތާރީހެއް ފަހުން އިއުލާން ކުރާނެ
މީރާއިން ވެހިކަލް ސްޓިކަރ ދޫކުރުމާއި ގުޅޭ ގޮތުން ދީފައިވާ މައުލޫމާތު
އައު އާންމު ހާލަތުގެ މި މުއްދަތުގައި ވެހިކަލް ސްޓިކަރ ދޫ ނުކުރާނެކަމަށް މީރާއިން ބުނެފިއެވެ.
ކޮވިޑް-19އާ ގުޅިގެން މާލެ ސަރަހައްދުގައި އިއުލާން ކޮށްފައިވާ ފުރަބަންދުގެ ހާލަތު އަނެއްކާވެސް 15 ދުވަހަށް އިތުރު ކޮށްފައިވާއިރު ކުރިން އަޅާފައިވާ ގިނަ ފިޔަވަޅުތަކަށް އެޗްޕީއޭއިން ވަނީ ލުއިތަކެއް ދީފައެވެ.
އާދީއްތަ ދުވަހުން ފެށިގެން އޮފީސްތައް ހުޅުވައި ހިދުމަތް ދެމުން އަންނައިރު މީރާއިން ކޮށްފައިވާ ޓުވީޓެއްގައި ބުނެފައިވަނީ، މި މުއްދަތުގައި ވެސް މީރާއިން ވެހިކަލް ސްޓިކަރ ދޫ ނުކުރާނެ ކަމަށެވެ. އަދި ސްޓިކަރ ދޫކުރަން ފަށާނެ ތާރީހް ފަހުން އިއުލާނު ކުރާނެކަމަށެވެ.
ފުރަބަންދުގެ މުއްދަތުގެ ތެރޭގައި ފައިސާ ދެއްކުމާއި، ބަޔާން ހުށަހެޅުން އަދި ރަޖިސްޓްރޭޝަންގެ މަސައްކަތްތައް މީރާއިން ކުރަމުން ގެންދަނީ އޮންލައިންކޮށެވެ. މީރާގެ މަސައްކަތްތަކުގެ ތެރެއިން ގާތްގަޑަކަށް ހުރިހާ މަސައްކަތްތަކެއް ވެސް މި މުއްދަތެއްގެ ތެރޭގައި ކުރިއަށްގެންދެވޭނެ ކަމަށް މީރާއިން ވަނީ މީގެ ކުރިން ބުނެފައެވެ.
