ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ން ނޫސްވެރިކަމުގެ ދާއިރާގެ ކޯސްތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.

އެމްއެންޔޫގެ ފެކަލްޓީ އޮފް އާޓްސްއިން ބުނީ ނޫސްވެރިކަން އެންމެ ރަނގަޅަށް ކުރެވޭނީ ކަމުގެ އިލްމު އުނގެނިގެން ކަމަށެވެ. އަދި ނޫސްވެރިކަމުގެ ދާއިރާއިން ޑިގްރީ، ޑިޕްލޮމާ އަދި އެޑްވާންޑް ސެޓްފިކެޓްވެސް ފެކަލްޓީ އޮފް އާޓްސްގައި ހެދޭނެ ކަމަށެވެ.

އެމްއެންޔޫއިން ބުނީ މިއަހަރުގެ އޮގަސްޓް މަހުގައި ޔުނިވާސިޓީން ފެށުމަށް ހަމަޖެހިފައިވާ ކޯސްތަކަށް ވަނުމަށް އެދި ފޯމު ހުށަހެޅުމުގެ ފުރުސަތު މި މަހުގެ 30 ވާ ބުރާސްފަތި ދުވަހުގެ ނިޔަލަށް ހުޅުވާލެވިފައިވާ ކަމަށެވެ.

މިކޯސްތަކާ ބެހޭ މަޢުލޫމާތުcourses.mnu.edu.mv/ން ލިބެން ހުންނާނެ ކަމަށާއި، ކޯސްތަކަށް އެޕްލައިކުރުން ހަމަޖެހިފައިވަނީ އޮންލައިންކޮށްmnu.edu.mv/apply/ގައިވާ ޕޯޓަލް މެދުވެރިކޮށް ކަމަށް އެމްއެންޔޫއިން ބުނެއެވެ. އަދި އިތުރު މަޢުލޫމާތު [email protected] ށް މެއިލް ކުރުމުން ލިބޭނެ ކަމަށް އެމްއެންޔޫއިން ބުނެއެވެ.

ދިވެހިރާއްޖޭގެ ގައުމީ ޔުނިވާސިޓީން އެކި ދާއިރާތަކުން ދަރިވަރުން ބިނާ ކުރުމަށް ގިނަ ކޯސްތައް ހިންގައެވެ. އަދި އަހަރަކު ދެފަހަރު ކޯސްތަކަށް ވަނުމަށް ފުރުސަތު ހުޅުވާލާއިރު ކޮންމެ އަހަރަކު ވެސް ގިނަ އަދަދެއްގެ ދަރިވަރުން ކޯސްތަކަށް ކުރިމަތިލައެވެ. އަދި ޔުނިވާސިޓީގައި ސަރުކާރުން ދޭ ސްކޮލާޝިޕްގެ ދަށުންވެސް ގިނަ އަދަދެއްގެ ދަރިވަރުން ތައުލީމު ހާސިލު ކުރަމުންދެއެވެ.