ޝަރުއީ ދާއިރާގެ މަސައްކަތްތައް އައު އާއްމު ހާލަތުގެ އުސޫލަށް ބަދަލުކޮށްފި
މި އުސޫލްގައި ކޯޓުތައް ނުވަތަ އިދާރާތަކުން ކުރަންޖެހޭ ކަންކަން ހިމެނޭ
ޖުޑީޝަލް އެޑްމިނިސްޓްރޭޓަރ އަބްދުﷲ ނަޒީރު
ކޮވިޑް-19އާ ގުޅިގެން ދައުލަތުގެ އިދާރާތައް ނުހުޅުވައި ހުރުމަށްފަހު، އައު އާއްމު ހާލަތު (ނިއު ނޯމަލް) ގައި ޝަރުއީ ކޯޓުތަކާއި އިދާރާތައް ހުޅުވައި ހިދްމަތްތައް ދިނުމަށް ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން އަންގައިފިއެވެ.
ޑީޖޭއިން ބުނީ، "ކޮވިޑް-19އާ ގުޅިގެން ކަނޑައެޅޭ އައު އާއްމު ހާލަތުގައި ޝަރުއީ ކޯޓުތަކާއި އިދާރާތަކުގެ މަސައްކަތް ކުރުމުގެ ގޮތުން އަޅަންޖެހޭ ފިޔަވަޅުތަކާއި މުވައްޒަފުން އަމަލު ކުރަންޖެހޭ ގޮތުގެ އުސޫލް" ވަނީ އާއްމު ކޮށްފައި ކަމަށެވެ.
ޑީޖޭއޭއިން ނެރެފައިވާ ސަރކިއުލަރއެއްގައި ބުނެފައިވަނީ، ހުރިހާ ކޯޓުތަކާއި އިދާރާތަކުން ވެސް އެ އުސޫލާ އެއްގޮތަށް މަސައްކަތްތައް އިންތިޒާމު ކުރުމަށް ދަންނަވާ ކަމަށެވެ. އަދި ކޮންމެ ކޯޓަކުން ވެސް އަދި އިދާރާތަކުން ވެސް، އެތަނެއްގެ ޖާގައާއި މަސައްކަތް ކުރަންޖެހޭ ގޮތަށާއި ނުވަތަ ފޯރުކޮށްދޭންޖެހޭ ހިދްމަތަށް ރިއާޔަތްކޮށް، އެ އުސޫލާ ހިލާފު ނުވާނޭ ގޮތުގެ މަތީން މަސައްކަތް ކުރަންޖެހޭ ގޮތުގެ ތަފާތު އުސޫލްތައް ގާއިމު ކުރުމަކީ ކުރެވިދާނެ ކަމެއް ކަމަށެވެ.
ޑީޖޭއޭއިން އާއްމުކޮށްފައިވާ އެ އުސޫލްގައި، މައިގަނޑު ތިން ބަޔަކަށް ބަހާލާފައިވެއެވެ. އެގޮތުން، ކޯޓު ނުވަތަ އިދާރާއިން އަމަލު ކުރަންޖެހޭ ގޮތް ބަޔާންކުރާ ބަޔާއި މުވައްޒަފުން އަމަލު ކުރަންޖެހޭ ގޮތް ބަޔާންކުރާ ބައިގެ އިތުރުން، އެހެނިހެން ކަންތައްތައް ހިމެނޭ ބަޔެވެ.
ކޯޓުތަކުން ނުވަތަ އިދާރާއިން އަޅާނޭ ފިޔަވަޅުތަކުގެ ތެރޭގައި، ކޯޓު ނުވަތަ އިދާރާއެއްގެ މުވައްޒަފަކު ކޮވިޑް-19އަށް ޕޮޒިޓިވް ވެއްޖެނަމަ، ނުވަތަ މުވައްޒަފެއްގެ ކިބައިން ބަލީގެ އަލާމާތްތައް ފެންނަނަމަ އެކަމުގައި އަމަލު ކުރުމަށް އެޗްޕީއޭއިން ކަނޑައަޅާފައިވާ އެސްއޯޕީއާ އެއްގޮތަށް އަމަލު ކުރުމާއި، މުވައްޒަފެއް ނުވަތަ ގޭގައި ތިބެގެން މަސައްކަތްކުރަންޖެހޭ ހާލަތެއް މެދުވެރިވެއްޖެނަމަ، ގޭގައި ތިބެގެން މަސައްކަތް ކުރެވޭނެ ގޮތް ހެދުމެވެ.
އަދި މަސައްކަތު ގަޑި ނިމުން އަވަހަށް އޮފީސް ބަންދު ކުރުމާއި، ކޮންމެހެން ކުރަންޖެހޭ މަސައްކަތެއް ކުރުމަށް ވެސް ހަވީރު 4ގެ ފަހުން އޮފީސް ހުޅުވާފައި ބަހައްޓަން ނުޖެހޭގޮތަށް މަސައްކަތްތައް އިންތިޒާމުކުރުން ހިމެނެއެވެ. އޭގެ އިތުރުން، ތަނުގެ ސާފުތާއިހިރުކަމާއި ކޮވިޑް-19އަށް އަޅަންޖެހޭ ރައްކާތެރިކަމުގެ ހުރިހާ ފިޔަވަޅުތަކެއް އެޗްޕީއޭގެ ގައިޑްލައިނާ އެއްގޮތަށް އަޅާފައި ހުރުން ހިމެނެއެވެ.
މުވައްޒަފުން އަމަލު ކުރަންޖެހޭ ގޮތްތަކަށް ބަލާއިރު، ކޮންމެ މުވައްޒަފެއް ވެސް މަސައްކަތަށް ހާޒިރުވާއިރު، ތިމާއާއި އަނެކާގެ ރައްކާތެރިކަމަށް އެޅުމަށް ހުރި ހުރިހާ ފިޔަވަޅުތަކެއް އެޅުމާއި، މާސްކް އެޅުމާއި، އަމިއްލަ ސެނިޓައިޒަރ އަތްމަތީގައި ގެންގުޅުން ފަދަ ކަންކަމުގެ އިތުރުން، ކޮވިޑް-19ގެ އަލާމާތެއް ހުރިނަމަ އެކަން ސުޕަރވައިޒަރަށް އަންގައި، މުވައްޒަފަށް ހައްގުވާ ޗުއްޓީ ނެގުމާއި، އައިސޮލޭޝަން ނުވަތަ ކަރަންޓީން ހާލަތަށް ގެންގޮސްފި ނަމަވެސް އޮފީހަށް އަންގައި، ހާއްސަ ޗުއްޓީ ހަމަޖެއްސުމަށް އެދެންވާނެ ކަމަށް ވެސް އުސޫލްގައިވެއެވެ.
އެހެނިހެން ކަންކަމުގެ ތެރޭގައި، ކޯޓުން ނުވަތަ އިދާރާއިން ދޭ ހިދްމަތްތައް ވީހާވެސް ބޮޑަށް އޮންލައިންކޮށް ދިނުމާއި، އޮފީހުގެ އާއްމު ސަރަހައްދުތަކުގައި ގައިދުރުކަން ބެހެއްޓޭނެ އިންތިޒާމު ކުރުމާއި، އެކަން ކަށަވަރުވާނެ ގޮތަށް މެނުވީ އާއްމު ފަރާތްތައް އިދާރާގެ ތެރެއިން ނުވެއްދުމާއި ހިދުމަތް ހޯދާ ފަރާތްކަށް އަތް ދޮވެވޭނެ އިންތިޒާމު ނުވަތަ ސެނިޓައިޒް ކުރެވޭނެ އިންތިޒާމު ހަމަޖެއްސުންފަދަ ކަންކަމުގެ އިތުރުންވެސް ކޮވިޑް-19 ރޯގާއިން ރައްކާތެރިވުމަށް އަޅަންޖެހޭ ފިޔަވަޅުތައް އެޅުން މި އުސޫލްގައިވެއެވެ.
