ކޮވިޑް-19: އައިޖީއެމްއެޗްގައި އެޑްމިޓްކޮށްފައިވާ އެންމެން ޓެސްޓްކުރަން ނިންމައިފި

އައިޖީއެމްއެޗްގައި 4 މުވައްޒަފަކާއި، ފަރުވާ ދެމުންދިޔަ ބަލި ދެ މީހަކަށް ކޮވިޑް-19 ޖެހުމުން، އައިޖީއެމްއެޗްގައި އެޑްމިޓްކޮށްގެން ފަރުވާ ދެމުންދާ އެންމެން ކޮވިޑް-19އަށް ޓެސްޓް ކުރުމަށް ނިންމައިފިއެވެ.

އެއިޖީއެމްއެޗުން ހޮނިހިރު ދުވަހު ނެރެފައިވާ ބަޔާނެއްގައި ބުނެފައިވަނީ، އައިސީޔޫގައި މިވަގުތު ކޮވިޑް-19އަށް ޕޮޒިޓިވް ބަލި މީހެއް އަދި މުވައްޒަފެއްވެސް ނެތް ކަަމަށެވެ. ނަމަވެސް ރައްކާތެރިކަމުގެ ގޮތުން އަޅާ ފިޔަވަޅެއްގެ ގޮތުން، މިވަގުތަށް ބަލި މީހުން އައިސީޔޫއަށް ވެއްދުން މަޑު ޖައްސާލައި، އައިސީޔޫއިން ދޭންޖެހޭ ފަރުވާ ދެވޭނެ ގޮތް އެ ހޮސްޕިޓަލުގެ އެހެން ތަނެއްގައި ހަމަޖައްސާފައިވާ ކަމަށެވެ.

Advertisement

މީގެ އިތުރުން އައިޖީއެމްއެޗުން ބުނީ، ހޮސްޕިޓަލުގައި އެޑްމިޓްކޮށްގެން ފަރުވާދޭ ބަލި މީހުން ކޮވިޑް-19އަށް ޓެސްޓްކުރުމުގެ ނިޒާމު އިތުރަށް ހަރުދަނާކޮށް، އެޑްމިޓްކޮށްގެން ފަރުވާދޭ ހުރިހާ އެންމެންވެސް ކޮވިޑް-19އަށް ޓެސްޓް ކުރާގޮތަށް ހަމަޖައްސާފައިވާ ކަމަށެވެ. ނަމަވެސް ބަލި މީހެއްގެ ފުރާނަ ސަލާމަތްކުރަންޖެހޭ ފަދަ ނުވަތަ އެނޫންވެސް ބޮޑު އިމަރޖެންސީ ހާލަތެއް މެދުވެރިވެއްޖެނަމަ، ކޮވިޑް-19ގެ ނަތީޖާ ލިބެންދެން މަޑުނުކޮށް، ދޭންޖެހޭ ފަރުވާ ރައްކާތެރިކަމުގެ ފިޔަވަޅުތައް އެޅުމާއިއެކު ދޭނެކަމުގެ ޔަގީންކަން އައިޖީއެމްއެޗުން ވަނީ ދީފައެވެ.

އައިޖީއެމްއެޗުގައި އެޑްމިޑް ކޮށްފައިވާ، ހުރިހާ ބަލި މީހުން ކޮވިޑް-19އަށް ޓެސްޓްކުރަން ނިންމީ، އެ ހޮސްޕިޓަލުގެ އައިސީޔޫގައި، ކެންސަރު ބައްޔަށް ފަރުވާ ދެމުންދަނިކޮށް ނިޔާވި އުމުރުން 39 އަހަރުގެ އިންޑޮނޭޝިއާ މީހަކު ކޮވިޑް-19އަށް ޕޮޒިޓިވް ވުމާއި ގުޅިގެންނާއި، އައިސީޔޫގައި އޭރު ތިބި ހުރިހާ ބަލި މީހުންނާއި އައިސީޔޫއިން އެހެން ވޯޑުތަކަށް ބަދަލުކުރި ބަލި މީހެއް ކޮވިޑް-19އަށް ޓެސްޓްކޮށް، އޭގެެތެރެއިން ފަރުވާ ދެމުންދިޔަ ދެ މީހަކު ކޮވިޑް-19 އަށް ޕޮޒިޓިވް ވުމާއި ގުޅިގެން ގެންނެވެ.

މީގެއިތުރުން، އައިޖީއެމްއެޗްގެ ހުރިހާ މުވައްޒަފުން ކޮވިޑް-19އަށް ޓެސްޓްކޮށް، މިހާތަނަށް 4 ހަތަރު މުވައްޒަފަކު ކޮވިޑް-19އަށް ޕްޒިޓިވް ވެފައިވާ ކަމަށް އައިޖީއެމްއެޗުން ބުނެފައިވެއެވެ.