ވައިރަލް ހުން ފެތުރޭތީ އައިޖީއެމްއެޗްގައި ޚާއްޞަ ކްލިނިކެއް
އެޗްޕީއޭއިން ބުނެފައިވަނީ މިދުވަސްވަރު ރާއްޖޭގެ އެކި ސަރަހައްދުތަކުގައި އަރިދަފުސް ރޯގާ އާއި ވައިރަލް ހުން ހަލުވި ކަމާއެކު ފެތުރެމުންދާ ކަމަށް
އައިޖީއެމްއެޗް: މިހާރު ވަނީ މިދުވަސްވަރު ފެތުރޭ ރޯގާއަށް ޚާއްޞަކޮށް ކްލިނިކެއް ހުޅުވާފައި
މިދުވަސްވަރު މާލޭގައި ހަލުވިކަމާއެކު ފެތުރެމުންދާ އަރިދަފުސް ރޯގާއާއި ވައިރަލްހުން ޖެހޭ މީހުންނަށް ފަރުވާދިނުމަށް އައިޖީއެމްއެޗުގައި ހާއްސަ ކްލިނިކެއް ހޮނިހިރު ދުވަހު ހުޅުވައިފިއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނެރެފައިވާ ބަޔާނެއްގައި ބުނެފައިވަނީ މިދުވަސްވަރު ރާއްޖޭގެ އެކި ސަރަހައްދުތަކުގައި އަރިދަފުސް ރޯގާ އާއި ވައިރަލް ހުން ހަލުވި ކަމާއެކު ފެތުރެމުންދާ ކަމަށެވެ.
އެހެންކަމުން މާލޭގައި ޑޮކްޓަރަށް ދެއްކުން ފަހިކޮށްދިނުމުގެ ގޮތުން އައިޖީއެމްއެޗް ގައި "ފުލޫ ކްލިނިކު"ގެ ނަމުގައި ހޮނިހިރު ދުވަހުން ފެށިގެން ކުލިނިކެއް ހުޅުވާފައިވާ ކަމަށް އެ ބަޔާނުގައި ވެއެވެ.
އެ ކުލިނިކު ހުޅުވާފައި ހުންނާނީ ހޮނިހިރު ދުވަހުގެރޭ 10:00 އަށެވެ. އަދި އާދީއްތަ ދުވަހުން ފެށިގެން ހެނދުނު 8:00 އިން ދަންވަރު 12:00 އަށް ހުޅުވިފައި ހުންނާނެއެވެ.
އެޗްޕީއޭ އިން ބުނީ، ރޯގާއާ ގުޅިގެން އަތޮޅުތަކުގެ ހޮސްޕިޓަލްތަކާއި ސިއްހީ މަރުކަޒުތަކުގައި އަދި ޕްރައިވެޓް ކްލިނިކް ތަކުގައި ޚާއްސަ މަސައްކަތްތަކެއް ކުރަމުންދާ ކަމަށެވެ.
ފެތުރެމުންދާ ރޯގާގައި ބައެއް ފަހަރު ބަލިމީހާގެ ހާލުދެރަވާތީވެ، އަރިދަފުސް ރޯގާ ޖެހި މަދުވެގެން ދެ އަލާމާތެއް ފެނިއްޖެނަމަ ލަސްނުކޮށް ޑޮކްޓަރަށް ދައްކަން އެ އޭޖެންސީން އިލްތިމާސް ކޮށްފައިވެއެވެ.
