ގައުމީ ޓީމަށް ކުޅެދީފައިވާ 109 މެޗު ބަލައިގަނެ ފީފާ ސެންޗަރީ ކްލަބުގައި ރާއްޖޭގައި އުފެދުނު އެންމެ މޮޅު އެއް ގޯލްކީޕަރު އިމްރާން މުހައްމަދު ހިމަނައިފައެވެ.

މިއާއެކު އިމްރަން ވެފައިވަނީ 100 ނުވަތަ އެއަށް ވުރެ ގިނަ "އޭ" ފެންވަރުގެ ބައިނަލްއަގުވާމީ މެޗު ގައުމީ ޓީމަށް ކުޅެދީގެން ފީފާ ސެންޗަރީ ކްލަބުގައި ހިމެނުނު ފުރަތަމަ ދިވެހި ކުޅުންތެރިޔާއަށެވެ.

ފީފާ ސެންޗަރީ ކްލަބުގައި އިމްރާނުގެ ނަން ހިމަނާފައިވަނީ މިދިޔަ މަހުގެ 30 ވަނަ ދުވަހު ފީފާ އިން އާންމުކުރި ލިސްޓުގައެވެ.

މި ކާމިޔާބީއާ ގުޅިގެން ގައުމީ ޓީމުގެ އެސިސްޓަންޓް ގޯލްކީޕަރު ޓްރެއިނަރަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ން ވަނީ މަރުހަބާ ކިޔާފައެވެ. އުމުރުން 39 އަހަރުގެ އިމްރާން ބުނީ ފީފާ ސެންޗަރީ ކްލަބުގައި ހިމެނުމަކީ ދިވެހި ފުޓްބޯޅައަށް އަދި އޭނާއަށް ލިބުނު ވަރަށް ބޮޑު ކާމިޔާބެއް ކަމަށް ދެކޭ ކަމަށާއި، އޭނާއަށް ދިން އެހީތެރިކަމަށް އެންމެންނަށް ޝުކުރުއަދާކުރާ ކަމަށެވެ.

މި ލިސްޓަށް އެރުމާ އެންމެ ގާތުގައި ދެން ހުރި ދިވެހި ކުޅުންތެރިޔަކީ ގައުމީ ޓީމަށް 80 މެޗު ކުޅެދީފައިވާ އަލީ އަޝްފާގު (ދަގަނޑޭ) އެވެ. މި ލިސްޓުގައި ހިމެނޭ ކުޅުންތެރިންގެ ތެރެއިން އެންމެ ގިނަ މެޗު ކުޅެފައިވާ ކުޅުންތެރިޔަކީ 184 މެޗު ކުޅެފައިވާ މިސްރުގެ އަހުމަދު ހަސަނެވެ.

މިދިޔަ އަހަރުގެ ނޮވެމްބަރު މަހުން ފުޓްބޯޅަ ކުޅުން ހުއްޓާލި އިމްރާން ވަނީ ގައުމީ ފުޓްބޯޅަ ޓީމުގެ ގޯލް 17 އަހަރު ބަލަހައްޓާފައެވެ. 2016 ވަނަ އަހަރު ގައުމީ ޓީމުން ރިޓަޔާކުރި އިމްރާނުގެ އެންމެ ބޮޑު ކާމިޔާބަކީ 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރުމެވެ.

ކްލަބު އީގަލްސް އިން ކެރިއަރު ފެށި އިމްރާން ވަނީ ވިކްޓަރީ ސްޕޯޓްސް ކްލަބު، ނިއުރޭޑިއަންޓް ސްޕޯޓްސް ކްލަބު، ވީބީ އައްޑޫ އެފްސީ، މާޒިޔާ ސްޕޯޓްސް އެންޑް ރެކްރިއޭޝަން އަދި ޓީސީ ސްޕޯޓްސް ކްލަބަށްވެސް ކުޅެފައެވެ.

ވިކްޓްރީއާ އާއި ނިއުރޭޑިއަންޓާއެކު ގައުމީ ތަށި އިމްރާން މިލްކުކުރިއިރު، ނިއުރޭޑިއަންޓުން 2013 ވަނަ އަހަރު ރާއްޖޭގެ ފުޓްބޯޅަ ސީޒަނުގެ ހުރިހާ މެޗަކުން މޮޅުވެ ހުރިހާ މުބާރާތެއް ކާމިޔާބުކުރިއިރު، އެޓީމުގެ ގޯލު ބެލެހެއްޓީވެސް އިމްރާނެވެ.

އަދި މިދިޔަ އަހަރު އިމްރާން ވަނީ ކުޅިވަރުގެ ދާއިރާއިން، ކުޅިވަރު ކުޅުމާއި މީހުން ތަމްރީނު ކުރުމުގެ ރޮނގުން ހިތްވަރު ދިނުމުގެ ގައުމީ އިނާމުވެސް ހާސިލުކޮށްފައެވެ.