މެމްބަރުން ކުރައްވާ ބުރަ މަސައްކަތް ރައްޔިތުން ބަލައިގަނޭ: މަޖިލީހުގެ ރައީސް
މިހާރަށް ވުރެ އިތުރަށް މަސައްކަތް ކުރެއްވުމަށް ރައީސް ނަޝީދު އެދިވަޑައިގެންނެވި
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ރައްޔިތުންގެ މަޖިލީހުގެ މެމްބަރުން ކުރައްވަމުން ގެންދަވާ ބުރަ މަސައްކަތް ރައްޔިތުން ބަލައިގަންނަ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާގައި ވާހަކަދައްކަވަމުން މަޖިލީހުގެ ރައީސް ވަނީ މަޖިލީހުގެ މެމްބަރުން ކުރައްވަމުން ގެންދަވާ މަސައްކަތަށް ތައުރީފު ކުރައްވާފައެވެ. ރައީސް ނަޝީދު ވިދާޅުވީ މެމްބަރުން ކުރައްވަމުން ގެންދަވާ މަސައްކަތް ދާއިރާގެ މެމްބަރުން ބަލައިގަންނަ ކަމަށާއި އަދި މިހާރަށް ވުރެ އިތުރަށް މަސައްކަތް ކުރެއްވުމަށް އެދިވަޑައިގަންނަވާ ކަމަށެވެ.
މަޖިލީހުގެ ރައީސް މިހެން ވިދާޅުވެފައިވާއިރު ބައެއް ފަރާތްތަކުން ދަނީ މަޖިލީހުން އެކަށީގެންވާ ވަރަށް މަސައްކަތްތައް ނުކުރާކަމުގެ ޝަކުވާ ކުރަމުންނެވެ.
ވާދަވެރި ޕާޓީތަކުގެ މެމްބަރުން މަޖިލީހުގެ ޖަލްސާތައް 'ބޮއިކޮޓް' ކޮށްފައިވާއިރު، މިކަމަށް އަލިއަޅުއްވާލާ ރައީސް ނަޝީދު ވަނީ އެ މެމްބަރުން މަޖިލީހަށް ވަޑައިގެން މަސައްކަތުގައި ބައިވެރިވެވަޑައިގަތުމަށް އެދިވަޑައިގެންފައެވެ. އެމަނިކުފަނު ވިދާޅުވީ މަޖިލިސް ނޫންތަނެއްގައި ހަގީގީ ސިޔާސީ ހަރަކާތެއް ނުހިނގާނެ ކަމަށެވެ.
އިދިކޮޅު މެންބަރުންނަށް ރައްކާތެރި މާޙައުލެއް ނެތް ކަމަށް ބުނެ އިދިކޮޅުން ވަނީ މަޖިލީހުގެ ޖަލްސާތައް ބޮއިކޮޓް ކޮށްފައެވެ.
