ހުކުރު 03 ޖުލައި 2020
03 ފުނޯސް
1441 ޒުލްގައިދާ 12
ފަތިސް 04:40
އިރުއަރާ 05:58
މެންދުރު 12:14
އަސްރު 15:38
އިރުއޮއްސޭ 18:23
އިޝާ 19:41
ދިވެހިން ގެނައުން

ސިއްހީ ފަރުވާއަށް ގޮސް ނާދެވި ތިބި 91 ދިވެހިން ރާއްޖެ ގެނެސްފި

  • އެ މީހުންނަކީ ބޭސްފަރުވާއަށް ގޮސް ބޯޑަރުތައް ބަންދުކުރުމާއި ގުޅިގެން ނާދެވިފައި ތިބި މީހުން
  • އިންޑިއާގައި ތިބި ގިނަ އަދަދެއްގެ ދިވެހިން ވަނީ މީގެކުރިންވެސް ގެނެސްފައި
  • މި ފްލައިޓަކީ އިންޑިއާއަށް އިތުރު ބޭސްފަރުވާއަށް މީހުން ގެންދިއުމަށް ބޭއްވި ފްލައިޓެއް

ކ. މާލެ | 30 ޖޫން 2020 | އަންގާރަ 12:32 | 1,443

އަންގާރަ ދުވަހުގެ ހެނދުނު މޯލްޑިވިއަން ފްލައިޓްގައި ދިވެހިން ގެނައުން - މޯލްޑިވިއަން

ކޮވިޑް-19 ގެ ސަބަބުން އިންޑިއާ ލޮކްޑައުން ކުރުމާއި ގުޅިގެން، އިންޑިއާގައި ''ތާށިވެފައި'' ތިބި 91 މީހަކު ގައުމީ އެއަރލައިން މޯލްޑިވިއަން ގައި އަންގާރަ ދުވަހު ރާއްޖެ ގެނެސްފިއެވެ.

ހޯމަ ދުވަހުގެ ރޭ މޯލްޑިވިއަންގެ ފްލައިޓުގައި 28 މީހަކު އިތުރު ބޭސްފަރުވާއަށް އިންޑިއާގެ ކޮޗިންއަށް ގެންގޮސްފައިވާއިރު، މި ފްލައިޓް އަނބުރާ ރާއްޖެ އައިރު ވަނީ އިންޑިއާ އަށް ބޭސްފަރުވާ އަށް ގޮސް ތާށިވެފައި ތިބި 91 ދިވެހިން އަނބުރާ ގެނެސްފައެވެ.

މިކަމާއި ގުޅިގެން މޯލްޑިވިއަނުން ކޮށްފައިވާ ޓުވީޓެއްގައި ބުނެފައިވަނީ، އަންގާރަ ދުވަހުގެ ހެނދުނުގެ ވަގުތެއްގައި އެ މީހުން ރާއްޖެ ގެނެސްފައިވާ ކަމަށެވެ. އަދި އެ މީހުންނަށް ރާއްޖެ ނާދެވި ތިބީ އިންޑިއާގެ ބޯޑަރުތައް ބަންދުކުރުމުން ކަމަށް ވެސް މޯލްޑިވިއަނުން ބުންޏެވެ.

ބޭރު ގައުމުތަކުގައި ތިބި ދިވެހިން ރާއްޖެ ގެނައުމުގައި އެންމެ ބޮޑު އިސްކަމެއް ދެނީ ދައުލަތުގެ ހަރަދުގައި ބޭސްފަރުވާއަށާއި، ދައުލަތުގެ ހަރަދުގައި ކިޔަވަން ގޮސްފައި ތިބި މީހުންނަށް ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީން ވަނީ ބުނެފައެވެ. އަދި، ރާއްޖެއިން ބޭރުގެ އެކި ޤައުމުތަކުގައި ތިބި ދިވެހިންގެ ތެރެއިން ކޮންމެހެން އަންނަން ބޭނުންވާ މީހުންނަށް އެ ފުރުސަތު ހޯދައި ދިނުމަށް ހާރިޖީ ވުޒާރާއިން ދަނީ ގިނަ މަސައްކަތްތަކެއް ކުރަމުންނެވެ.

އެގޮތުން ޖޫން 16 ވަނަ ދުވަހު ރާއްޖޭގައި ތިބި އިންޑިއާ މީހުން ބަލާ އިންޑިއާގެ ބެންގަލޫރުން އައި ފްލައިޓުގައި 54 ދިވެހިން ވަނީ ގެނެސްފައެވެ.

ރާއްޖޭގައި ތިބި އިންޑިއާ މީހުން ބަލާ އައި އިތުރު ފްލައިޓްތަކެއްގައި ވެސް ދިވެހިން ގެނެސްފައިވެއެވެ. އެގޮތުން، ޖޫން 17 ވަނަ ދުވަހު އިންޑިއާގެ ވެރިރަށް ނިއު ދިއްލީ އިން އައި ފްލައިޓްގައި 10 ދިވެހިން ގެނެސްފައިވާއިރު ޖޫން 18 ހަމަ ދިއްލީން އައި އެހެން ފްލައިޓްގައި 2 ދިވެހިން ވަނީ ގެނެސްފައެވެ. އޭގެ އިތުރުން، ރާއްޖޭގައި ތިބި ނޭޕާލް މީހުން ބަލާ ޖޫން މަހުގެ 16 ވަނަ ދުވަހު އައި ފްލައިޓެއްގައި ވަނީ 7 ދިވެހިން ގެނެސްފައެވެ.

އެންމެ ފަހުން އަޕްޑޭޓް ކުރީ: 3 ދުވަަސް ކުރިން | ރިވިއު ކުރީ: ސިމާހާ ނަސީމް

މި ލިޔުން ކިޔާލުމުން

ޚަބަރެއް ނުވަތަ މައުލޫމާތެއް ރާއްޖެއެމްވީ އަށް ދެއްވުމަށް [email protected] އަށް އީމެއިލް ކުރައްވާ ނުވަތަ 3007773 ނަންބަރަށް ގުޅުއްވާ.