އަންނަ ޖެނުއަރީން ފެށިގެން ސިންގަލް ޔޫސް ޕްލާސްޓިކް އެތެރެކުރުން މަނާކުރަން މަޖިލިހަށް ހުށަހަޅައިފި
29 ޖޫން 2020 | ހޯމަ 16:12މި ބިލަށް ހޯމަދުވަހުގެ ޖަލްސާގައި މެންބަރުން ވަނީ ބަހުސްކުރައްވާފައި
ގަމުދާއިރާގެ މެންބަރު މުހައްމަދު ވިސާމް
އަންނަ ޖެނުއަރީ 01 އިން ފެށިގެން ސިންގަލް ޔޫސް ޕްލާސްޓިކް އެތެރެކުރުން މަނާކުރުމަށް ރައްޔިތުންގެ މަޖިލީހަށް ހުށަހަޅައިފިއެވެ.
މި ބިލް ހުށަހަޅުއްވާފައިވަނީ ގަމު ދާއިރާގެ މެންބަރު މުހައްމަދު ވިސާމް އެވެ. ވިސާމް ހުށަހެޅުއްވި މިބިލަށް ހޯމަދުވަހު ބެއްވި ރައްޔިތުންގެ މަޖިލީހުގެ ޖަލްސާގައި މެންބަރުން ވަނީ ބަހުސް ކުރައްވަފައެވެެ.
ސަރުކާރުން މި ބިލް ހުށަހެޅުމުގެ ބޭނުމަކީ ދިވެހިރާއްޖެއަށް އެތެރެކުރާ ބައެއް މުދަލަށް ކަނޑައެޅިފައިވާ އިމްޕޯޓް ޑިއުޓީގެ މިންވަރުތަކަށް ބަދަލު ގެނައުމެވެ. "އެގޮތުން އިމްޕޯޓް ޑިއުޓީގެ މިންވަރު ބަދަލުކުރަން ހުށަހަޅާ ސަބަބުތަކުގެ ތެރޭގައި އުފެއްދުންތެރިކަން އިތުރުކުރުމުގެ ގޮތުން ދިވެހިރާއްޖެއަށް އެތެރެކުރެވޭ ބައެއް ބާވަތުގެ މުދަލުން އިމްޕޯޓް ޑިއުޓީ ނެގުން ކުޑަކުރުން ނުވަތަ ހުއްޓާލުމާއި، ސިއްޚަތަށް ގެއްލުންލިބޭ ބާވަތުގެ އެއްޗެހި ބޭނުންކުރުމުން ދުރުހެލިވުމަށް ބާރުއެޅުމަށްޓަކައި އެފަދަ މުދަލުގެ އިމްޕޯޓް ޑިއުޓީ ބޮޑުކުރުން" މިހެން ބިލުގައި ހިމަނާފައިވެއެވެ.
މީގެ އިތުރުން ވިޔަފާރި އުސޫލުން ރީއެކްސްޕޯޓް ކުރާ މުދަލަށް ރޯޔަލްޓީއެއް ނެގުމަށް ވެސް ވަނީ ހުށައަޅާފައެވެ. އަދި ޗެޕްޓަރު 87 ގައި ބަޔާންކޮށްފައިވާ އެއްގަމުގައި ދުއްވާ އެއްޗެހި ރައީސުލްޖުމްހޫރިއްޔާ ކަންޑައަޅާ ރަށްތަކެއްގައި ބޭނުންކުރާ ހާލަތުގައި އެ އެއްޗެއްސަށް ކަނޑައަޅާފައިވާ އިމްޕޯޓް ޑިއުޓީ މަޢާފްކުރެވޭ ގޮތަށް ހަމަޖެއްސުމާއި, އިމްޕޯޓް ޑިއުޓީ ދެއްކުމާއި ނުލާ ވަގުތީގޮތުން ދިވެހިރާއްޖެއަށް އެތެރެކުރުމުގެ ހުއްދަދެމުން އައި އުޅަނދުފަހަރު އެތެރެކުރުން ހުއްޓާލައި، ވަކި ތާރީޚެއްގެ ފަހުން އެފަދައުޅނަދުތަކުން އިމްޕޯޓް ޑިއުޓީ ދައްކަންޖެހޭގޮތަށް ކަނޑައެޅުމެވެ.
ޤާނޫނު ނަމްބަރު 70/4 ޖ. (އެކި ލިޔުންތަކުގައި ރެވެނިއު ސްޓޭމްޕް ޖެހުމުގެ ޤާނޫނު) ގެ ދަށުން އިމްޕޯޓް ލައިސެންސާއި އެކްސްޕޯޓް ލައިސަންސަށް ނަގަމުން އައި ރެވެނިޔު ސްޓޭމްޕް ނެގުން ހުއްޓާލައި، ރެވެނިއު ފީއެއް ތަޢާރަފް ކުރުން ވެސް މި ބިލްގައި ހިމެނިފައިވެއެވެ.
ސިންގަލް ޔޫސް ޕްލާސްޓިކް ބޭނުން ކުރުން ނައްތާލުމަކީ ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙުގެ ވައުދުތަކުގެ ތެރޭގައި ހިމެނޭ އެއް ވަޢުދެވެ. އެގޮތުން އދ. ގެ އާންމު މަޖިލީހުގައި ތަގްރީރު ކުރެއްވުމަށް ވަޑައިގެން ބޭއްވި ހަވާސާ ބައްދަލުވުމެއްގައި ރައީސް ސޯލިހު ވަނީ 2023 ވަނަ އަހަރުގެ ކުރިން ރާއްޖޭގައި ސިންގަލް ޔޫސް ޕްލާސްޓިކް ބޭނުން ކުރުން ހުއްޓާލާނެ ކަން އިއުލާން ކުރައްވާފައެވެ.
