ތައުލީމީ ދާއިރާގައި މިހާރު މަސައްކަތް ކުރަމުންދަނީ 2113 ބިދޭސީ ޓީޗަރުން: އެޑިއުކޭޝަން މިނިސްޓްރީ
ރާއްޖޭގައި 9841 ޓީޗަރުން ވަޒީފާ އަދާކުރޭ
ރާއްޖެޓީވީގެ ފަލަސުރުހީ ޕްރޮގުރާމްގައި މިނިސްޓރ އޮފް ސްޓޭޓް ފޯރ އެޑިއުކޭޝަން، އައިޝަތު އާތިޔާ ނަސީރު ވާހަކަ ދައްކަވަނީ
ތައުލީމީ ދާއިރާގައި މިހާރު މަސައްކަތް ކުރަމުންދަނީ 2113 ބިދޭސީ ޓީޗަރުން ކަމަށް އެޑިއުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގުރާމްގައި ވާހަކަ ދައްކަވަމުން މިނިސްޓރ އޮފް ސްޓޭޓް ފޯރ އެޑިއުކޭޝަން، އައިޝަތު އާތިޔާ ނަސީރު ވިދާޅުވީ، އެންމެ ފަހުގެ ތަފާސްހިސާބުތައް ދައްކާ ގޮތުން، މުޅި ރާއްޖޭގައި 9841 ޓީޗަރުން ވަޒީފާ އަދާކުރާ ކަމަށެވެ. އެގޮތުން، 2113 ބިދޭސީ ޓީޗަރުން މަސައްކަތް ކުރަމުން އަންނައިރު 7728 ދިވެހި ޓީޗަރުން މަސައްކަތް ކުރަމުން އަންނަ ކަމަށް އާތިޔާ ވިދާޅުވިއެވެ.
އަދިވެސް ގިނަ އަދަދެއްގެ ބިދޭސީ ޓީޗަރުން ތައުލީމު އުންގަންނައިދިނުމުގައި ހަރަކާތްތެރިވަމުން އަންނަކަން ފާހަގަ ކުރައްވައި އާތިޔާ ވިދާޅުވީ، ވަޒީފާ ދިނުމުގައި މިހާރު އެންމެ ބޮޑު އިސްކަމެއް ދެނީ ދިވެހިންނަށް ވަޒީފާގެ ފުރުސަތު ދިނުމަށް ކަމަށެވެ. އެގޮތުން، ސްކޫލެއްގައި ދިވެހި ޓީޗަރަކު ހުއްޓައި ދިވެއްސަކު އެ ވަޒީފާ ބޭނުންވެއްޖެނަމަ އެ ވަޒީފާ ދިވެހި ޓީޗަރަކަށް ދީ ބިދޭސީ ޓީޗަރ ފޮނުވާލެވޭނެ ކަމަށް ވިދާޅުވިއެވެ.
އާތިޔާ ވިދާޅުވީ މިހާރު ފުރަ މާލެއަށް ބަލާލިޔަސް ބިދޭސީ ޓީޗަރުން ވަރަށް ބޮޑުތަނުން މަދުކުރެވިފައިވާ ކަމަށާއި ސްކޫލްތަކުން ދޭތެރެ ދޭތެރެއިން ބިދޭސީ ޓީޗަރުން ތިއްބެވި މަގާމަށް ކުރިމަތިލުމަށް އިއުލާން ކުރާ ކަމަށެވެ.
އެެޑިއުކޭޝަން މިނިސްޓްރީގެ އަމާޒަކީ ދިވެހި ޓީޗަރުން ކިޔަވައިދިނުން ކަމަށާއި އޭގެ ވަރަށް ބޮޑެތި ސަބަބުތަކެއް އެބަހުރި ކަމަށް އާތިޔާ ފާހަގަކުރެއްވިއެވެ. ސަބަބެއްގެ ގޮތުގައި އާތިޔާ ފާހަގަކުރެއްވީ، ބިދޭސީ ޓީޗަރުންނާއި ރާއްޖޭގެ ސަގާފަތާއި ވިސްނާއި ގޮތާއި ފަރުގުތައް ހުރުމެވެ.
އާތިޔާ ވިދާޅުވީ ބިދޭސީ ޓީޗަރުން ހަމައެކަނި އުޅޭނީ ސާނަވީ އަދި މަތީ ސާނަވީ ތައުލީމު ހާސިލު ކުރާ ދަރިވަރުންނަށް ކިޔަވައިދެއްވުމަށް ކަމަށާއި ޕްރައިމަރީ ގްރޭޑްތަކުގައި ކިޔަވައިދޭނީ ހުސް ދިވެހިން ކަމަށެވެ. އަދި ދިވެހި ޓީޗަރުން އެ ދާއިރާތަކުން ބިނާ ކުރުމުގެ މަސައްކަތް ކުރަމުންދާކަމަށް ވެސް ވިދާޅުވިއެވެ.
