ކިޔަވައިދިނުމުގެ ފެންވަރު ރަނގަޅު ކުރުމަަށް ޔުނިވަރސިޓީތަކަށް "އަތް ބާނައިގެން" ކަންތައް ކުރުމުގެ ވިސްނުމެއް ނެތް: ހަޔަރ އެޑިއުކޭޝަން
27 ޖޫން 2020 | ހޮނިހިރު 08:34މަތީ ތަޢުލީމާއި ބެހޭ ޤާނޫނު ވުޖޫދަށް އައުމާއެކު ކިޔަވައިދިނުމުގެ ފެންވަރު ރަނގަޅު ކުރެވޭނެ
ދިވެހިރާއްޖޭގެ ގައުމީ ޔުނިވަރސިޓީ: ޔުނިވަރސިޓީތަކަށް އަތް ބާނައިގެން ކަންތައް ކުރުމުގެ ވިސްނުމެއް މި ސަރުކާރުން ނުގެންގުޅޭނެ
ކޯސްތަކުގެ ފެންވަރު ރަނގަޅު ކުރުމަށް ޔުނިވަރސިޓީތަކަށް އަތް ބާނައިގެން ކަންތައް ކުރުމުގެ ވިސްނުމެއް މި ސަރުކާރުން ނުގެންގުޅޭ ކަމަށް މިނިސްޓަރ އޮފް ހަޔަރ އެޑިއުކޭޝަން ޑރ. އިބްރާހިމް ހަސަން ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ރާއްޖޭގެ މަތީ ތަޢުލީމު ފޯރުކޮށްދޭ ފަރާތްތަކަށް ބަލާއިރު ގިނައީ ޕްރައިވެޓް ސެކްޓަރުގެ ކޮލެޖުތައް ކަމަށާއި އޭގެތެރޭގައިވެސް ވަރަށް ރަނގަޅު ފެންވަރަކަށް ތަޢުލީމު ފޯރުކޮށް ދިނުމުގެ މަސައްކަތް ކުރާ ކޮލެޖުތައް އެބަހުރި ކަމަށެވެ.
ރާއްޖޭގެ ތަޢުލީމު ދޭ ބައެއް ތަންތަނުގެ ކިޔަވައިދިނުމުގެ ފެންވަރު ދަށް ކަމަށާއި ހަމައެކަނި ސަނަދެއް ދޭން ކުރާ ކަމެއްގެ ގޮތުގައި ބައެއް ފަރާތްތަކުން ސިފަކުރާއިރު، އެކަމަށް އިޝާރާތް ކުރައްވާ މިނިސްޓަރު ވިދާޅުވީ، ކޯސްތައް ޑިޒައިން ކުރެވިފައިވާ މަގުސަދާއި ކޮންޓެންޓްއާ ދޭތެރޭގައި ވިސްނަންޖެހޭނެ ކަމަށެވެ. އެގޮތުން، ބައެއް ކޯސްތައް ތިއަރީ ބަޔަށް ފޯކަސްކޮށް ފަރުމާކޮށްފައި ހުންނައިރު ވަކި ސިނާއަތަކަށް މީހުން ބިނާކުރުމަށް ބޭނުންވާ ޢިލްމާއި ހުނަރު އަށަގެންނެވުމުގެ މަގުސަދުގައި ފަރުމާކޮށްފައިވާ ކޯސްތައްވެސް އެބަހުރި ކަމަށެވެ.
މިނިސްޓަރު ވިދާޅުވީ ޕްރައިވެޓް ސެކްޓަރުން ފޯރުކޮށްދޭ ޚިދުމަތްތަކަށް ސަރުކާރުން "އިންޓަރވީން" ކުރެވޭނީ ވަކި ވަރަކަށް ކަމަށެވެ. އަދި ސަރުކާރުން ހިންގަނީ ދެ ޔުނިވަރސިޓީއެއްކަން ފާހަގަކޮށް މިނިސްޓަރު ވިދާޅުވީ، ޔުނިވަރސޓީގެ ކިޔަވައިދިނުމުގެ މިންގަނޑުތަކާއި ހުރިހާ ކަމެއްވެސް ނިންމަނީ އެކަމަށް ހާއްސަކޮށް ކަނޑައަޅާފައިވާ ކައުންސިލަކުން މިނަވަން ކަމާއެކު ކަމަށެވެ. އަދި ސަރުކާރުގެ ޔުނިވަރސިޓީތަކަށް އަތްބާނައިގެން ކަންތައް ކުރުމުގެ ވިސްނުމެއް މި ސަރުކާރުގެ ނެތްކަން މިނިސްޓަރު ފާހަގަކުރެއްވިއެވެ.
ނަމަވެސް ކިޔެވުމުގެ ފެންވަރު ރަނގަޅުކުރަން ފެނިއްޖެ ހާލަތެއްގައި އެކަން ކުރައްވާނެކަން ފާހަގަކޮށް މިނިސްޓަރު ވިދާޅުވީ، މަތީ ތަޢުލީމާއި ބެހޭ ޤާނޫނު ވުޖޫދަށް އައުމާއެކު މިފަދަ މައްސަލަތަކައް ހައްލު ލިބިގެންދާނެ ކަމަށެވެ. ޤާނޫނުގެ ސަބަބުން، ކިޔަވައިދިނުމުގެ ފެންވަރު ރަނގަޅު ކުރުމަށް މޯލްޑިވިސް ކުއަލިފިކޭޝަން އޮތޯރިޓީ އާއި ހަޔަރ އެޑިއުކޭޝަނަށް ޤާނޫނީ ބާރު ލިބިގެންދާނެ ކަމަށާއި، ޤާނޫނު ނެތުމުން ދިމާވާ ދަތިތައް އެބަހުރި ކަމަށް މިނިސްޓަރު ވިދާޅުވިއެވެ.
