ސަފާރީއެއްގައި ބިދޭސީ އަންހެނަކު ރޭޕް ކުރިކަމަށް ބުނާ ދެ މީހުން ދޫކޮށްލައިފި
މައްސަލައިގައި ދިވެހި ދެ ފިރިހެނުން ފުލުހުން ހައްޔަރުކުރި
ހުޅުމާލޭގެ ފަޅުތެރޭގައި ސަފާރީތައް އަޅާފައި: ހަފުތާ ބަންދުގައި ގިނަ ބަޔަކު ސަފާރީތަކަށް ދާ ކަމަށްވޭ
ހުޅުމާލެ ކައިރީ އަޅާފައި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލައެއްގައި ފުލުހުން ހައްޔަރުކޮށްފައިވާ ދެ މީހުން ބަންދުން ދޫކޮށްލައިފިއެވެ.
ފުލުހުންގެ މީޑިއާއިން ބުނީ، ތަހުގީގަށް ހައްޔަރުކޮށްފައި ބެހެއްޓޭނެ އެކަށީގެންވާ ސަބަބެއް ނެތުމުން ފުލުހުންގެ ބެލުމުގެ ދަށަށް ގެނެވުނު މީހުން މިހާރު ދޫކޮށްލާފައިވާ ކަމަށެވެ. އެކަމަކު އެ މައްސަލައިގެ ތަހުގީގު ކުރަމުންދާ ކަމަށް ފުލުހުން ބުނެއެވެ.
ފުލުހުން ބުނެފައިވާ ގޮތުގައި، ހުޅުމާލެ ކައިރީ އަޅާފާއި އޮތް ސަފާރީއަކަށް ދިޔަ ބިދޭސީ އަންހެނަކަށް ޖިންސީ ގޯނާކުރި މައްސަލައެއް ހުކުރު ދުވަހުގެ ފަތިހު ފަހެއް ޖެހި ހާއިރު ފުލުހުންނަށް ވަނީ ހުށަހަޅާފައެވެ.
އެ މައްސަލައިގެ ތުހުމަތުގައި ކުށުގެ ވެށިން 39 އަހަރުގެ ދިވެހި ދެ ފިރިހެނުން ފުލުހުންގެ ބެލުމުގެ ދަށަށް ގެންގޮސްފައިވާ ކަމަށް ފުލުހުން ބުނެފައިވެއެވެ.
ސަފާރީއަށް ދިޔަ ބިދޭސީ އަންހެނަކީ، ކޮން ގައުމެއްގެ މީހެއް ކަމާއި، އެއީ ފަތުރުވެރިއެއް ނުވަތަ ރާއްޖޭގައި ވަޒީފާ އަދާކުރާ ބިދޭސީ އަންހެނެއްކަން ނުވަތަ ކީއްކުރާ ކޮން، ބިދޭސީ އަންހެނެއް ކަމެއް މިހާތަނަށް އެނގިފައެއް ނުވެއެވެ. އަދި ފުލުހުން ވެސް މިފަދަ އެއްވެސް ތަފުސީލެއް ހާމައެއް ނުކުރެއެވެ.
ހުޅުމާލެ ކައިރީގައި އަޅަފައި އޮންނަ ސަފާރީތަކަށް ގިނަ ބަޔަކު ދެއެވެ. އަދި އެ ސަފާރީތަކަށް އާއިލީ ޗުއްޓީ ހޭދަކުރުމަށްވެސް ދާކަމަށް ވެއެވެ. ހާއްސަކޮށް ހަފުތާ ބަންދުގައި ހުޅުމާލެ ކައިރީ ސަފާރީތަކަށްދާ މީހުން ގިނަކަން ފާހަގަކުރެވެއެވެ. މިހެން ގޮސް އުޅުމުގެ ތެރޭގައި ޖިނާއީ ބައެއް ކުށްތައް ކުރަމުންދާކަންވެސް ބައެއް ފަރާތްތަކުން ބުނެއެވެ. އަދި އެފަދަ ބައެއް މައްސަލަތައް ފުލުހުންނަށް ހުށަހެޅި ފުލުހުން ބަލަމުންވެސް ދެއެވެ.
މިފަހަކަށް އައިސް ރާއްޖޭ ރޭޕް ކުރުމާއި، ޖިންސީ ގޯނާކުރުން ފަދަ މައްސަލަތައް ވަނީ ވަރަށް ބޮޑަށް އިތުރުވެފައެވެ. ހާއްސަކޮށް، 18 އަހަރުން ދަށުގެ އަންހެން ކުދިންނަށް ޖިންސީ ގޯނާކުރުން ހިމެނެއެވެ. އަދި ދާދިފަހުން ވަނީ އޮޅުވާލައިގެން ގެސްޓް ހައުސަކަށް ކުޑަ އަންހެން ކުއްޖަކު ގެންގޮސް ރޭޕް ކުރުމުގެ ދެ މައްސަލައެއް ފެންމަތި ވެފައެވެ.
