ވޭމަންޑޫގައި ދިރިއުޅޭ ބިދޭސީން ދަފްތަރު ކުރުމަށް އިލްތިމާސްކޮށްފި
26 ޖޫން 2020 | ހުކުރު 12:3723 ޖުލައި ކުރިން ރަޖިސްޓްރީ ކުރަން ޖެހޭ
ތ.ވޭމަންޑޫ، ބިދޭސީން ރަޖިސްޓްރީ ކުރުމަށް މަސައްކަތުގައި ފުރިހަމަ އެއްބާރުލުން ނުލިބޭކަން ކައުންސިލް ފާހަގަކޮށްފައިވޭ
ތ. ވޭމަންޑޫގައި ދިރިއުޅޭ ބިދޭސީން ދަފްތަރުގައި ރަޖިސްޓްރީ ކުރުމަށް އިލްތިމާސްކޮށްފިއެވެ.
ވޭމަންޑޫ ކައުންސިލުން ބުނީ ރަށުގައި އުޅޭ ބިދޭސީންގެ ދަފްތަރު އެކުލަވާލުމަށް ބިދޭސީން ރަޖިސްޓްރީ ކުރުމަށް 2 ފަހަރު އިއުލާން ކުރި ކަމަށެވެ. ނަމަވެސް މިކަމުގައި ބިދޭސީން ގެންގުޅޭ ފަރާތްތަކުގެ އެއްބާރުލުން ލިބިފައިނުވާ ކަމަށް ކައުންސިލުން ބުނެއެވެ.
ކައުންސިލުން ބުނީ ދިވެހިރާއްޖޭގެ އިމިގްރޭޝަންގެ ގާނޫނުގެ 30 ވަނަ މާއްދާގައި ބަޔާންކޮށްފައިވާ ގޮތުން ރާއްޖޭގައި ބިދޭސީންނާއެކު މުއާމަލާތް ހިންގާ ފަރާތްތަކުން، ރާއްޖެ އެތެރެވުމުގެ ހުއްދަނެތް ބިދޭސީއަކު، ނުވަތަ މަސައްކަތް ކުރުމުގެ ހުއްދަނެތް ބިދޭސީއަކު ލައްވާ ރާއްޖޭގައި އެއްވެސް މަސައްކަތެއް ކޮށްގެން ނުވާނެ ކަމަށާއި އަދި ހަމަ އެމާއްދާގައި ރާއްޖޭގައި ހުރުމުގެ ހުއްދަނެތް ބިދޭސީއަކު ރާއްޖޭގެ އެއްވެސް ތަނެއްގައި ބަހައްޓާގެން ނުވާނެކަމަށް ބަޔާންކޮށްފައިވާ ކަމަށެވެ.
ދިވެހިރާއްޖޭގެ އިމިގްރޭޝަން ގާނޫނުގެ 33 ވަނަ މާއްދާގައި މި ޤާނޫނުގައި (އިމިގްރޭޝަން ގާނޫނު) ބަޔާންވެގެންވާ ގޮތާ ހިލާފަށް ކަމެއް ކުރުމަކީ، ނުވަތަ މި ގާނޫނުން ހާސިލުކުރަން ބޭނުންވާ މަގްސަދުތައް ހާސިލު ވިޔަނުދިނުމުގެ ގޮތުން އަމަލެއް ކުރުމަކީ، ކުށެއް ކަމަށް ބަޔާންކޮށްފައިވާތީ ކައުންސިލުން ބުނީ ރަށުގައި ވަޒީފާ އަދާކުރާ ބިދޭސީންނާއި އެފަރާތުގެ އާއިލާގެ އެއްވެސް މެމްބަރެއް ވޭމަންޑޫގައި ދިރިއުޅޭނަމަ އެފަރާތްތައް ދަފްތަރު ކުރުމުގެ މަސައްކަތް ކުރަމުންދާ ކަމަށެވެ.
އެހެންކަމުން ބިދޭސީން ގެންގުޅޭ ފަރާތްތަކުން ވީއެންމެ އަވަހަކަށް އެފަރާތްތަކުގެ މައުލޫމާތު ކައުންސިލް އާއި ހިއްސާކޮށް ދަފްތަރު ކުރުމުގެ މަސައްކަތް ކުރިއަށް ގެންދިއުން ގެންދިއުމަށް ކައުންސިލުން ވަނީ އެދިފައެވެ.
ކައުންސިލުން ބުނީ ރަށުގައި ބިދޭސީން ގެންގުޅޭ ފަރާތްތަކުން ޖުލައި 23 ޖުލައި 2020 ވާ ބުރާސްފަތި ދުވަހުގެ ނިޔަލަށް ދަފްތަރުގައި ރަޖިސްޓްރީ ކޮށްދިނުމަށް އެދޭ ކަމަށެވެ. އަދި ބިދޭސީން ދަފްތަކުރުމުގެ މަސައްކަތް ކުރިއަށް ދާނީ ރަސްމީ ދުވަސްތަކުގެ ހެނދުނު 9:00 އިން 12:00 އަށް ކަމަށް ވެސް ކައުންސިލުން ބުނެއެވެ.
މީގެ އިތުރުން ކައުންސިލުން ބުނީ އެންގުމާ އެއްގޮތަށް އަމަލު ނުކުރާ ފަރާތްތަކާއި މެދު ކަމާބެހޭ އިދާރާތަކާ ގުޅިގެން އަޅަންޖެހޭ ފިޔަވަޅުތަކާއި އަދި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ގާނޫނުގެ 143 މާއްދާގެ ދަށުން ފިޔަވަޅު އަޅަމުން ގެންދާނެ ކަމަށެވެ.
ދަފްތަރު ކުރުމަށް ކައުންސިލަށް ބޭނުންވާ ބިދޭސީންނާއި ގުޅޭ މައުލޫމާތު އަދި ހަވާލުވެހުރި ފަރާތުގެ މައުލޫމާތު ބަޔާންކުރާ ފޯމް މިކައުންސިލްގެ ވެބްލިންކްhttps://forms.gle/V7mVHUBqoGPAEuna9ޑައުންލޯޑް ކުރެވޭނެއެވެ. އަދި މިކައުންސިލްގެ އިދާރާއިން ވެސް ފޯމު ލިބެން ހުންނާނެއެވެ.
ވަޒީފާ އަދާކުރުމަށް ދިވެހިރާއްޖެއަށް ބިދޭސީން ގެނައުމުގެ ޤަވާއިދު ގެ 24 ވަނަ މާއްދާގެ (ހ) ގައި ރާއްޖޭގައި މަސައްކަތްކުރާ ބިދޭސީންގެ ރަޖިސްޓްރީއެއް ސަރުކާރުން ބެލެހެއްޓުމަށްޓަކައި، ރާއްޖޭގައި މީހުން ދިރިއުޅޭ ކޮންމެ ރަށެއްގައިމެ އެރަށެއްގެ ރަށު ކައުންސިލްގެ އޮފީހުގައި އަދި ސިޓީ ކައުންސިލްގެ އޮފީހުގައި "ބިދޭސީން ރަޖިސްޓްރީކުރާ ދަފުތަރެއް" އޮންނަންވާނެ ކަމަށް ބަޔާންކޮށްފައިވެއެވެ.
