ފުޓްބޯޅައިގެ އެންމެ މަތީ ކޯޗިންގ ލައިސަންސް މޯހަން ނަގައިފި

ފުޓްބޯޅައިގެ އެންމެ މަތީ ކޯޗިންގ ލައިސަންސް ކަމަށްވާ އޭއެފްސީ ޕްރޯ ލައިސަންސް މުޙައްމަދު ޝިޔާޒް (މޯހަން) ނަގައިފިއެވެ.

އޭއެފްސީ ޕްރޯ ލައިސަންސް އަކީ ޔުއެފާ ޕްރޯ ލައިސަންސްއާ އެއް ފެންވަރެއްގެ ސެޓްފިކެޓެކެވެ. މިއީ އޭ ލައިސަންސް އަށް ފަހު ދެން އޮންނަ، އަދި ފުޓްބޯޅައިގައި މިވަގުތު ނެގެން އޮންނަ އެންމެ މަތީ ލައިސަންސެވެ.

ކްލަބު އީގަލްސްއަށް ކޯޗުކަން ކޮށްދެމުން އަންނަ މޯހަން ޕްރޯ ލައިސަންސް ނެގިއިރު، މިދިޔަ ސީޒަނުގެ ތެރޭގައި މި ކޯސް ހެދުމަށް ގައުމުން ބޭރަށް ދާން ޖެހުމުގެ ސަބަބުން އޭނާއަށް ވަނީ އީގަލްސްގެ ބައެއް މެޗުތައް ގެއްލިފައެވެ.

މޯހަން ޕްރޯ ލައިސަންސް ނެގުމާ ގުޅިގެން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވަނީ މޯހަންއަށް މަރުހަބާ ކިޔާފައެވެ.

1997ން 2008ށް ގައުމީ ޓީމުގެ އެސިސްޓަންޓް ކޯޗެއްގެ ގޮތުގައި މަސައްކަތް ކުރި މޯހަން ވަނީ ރާއްޖޭން 2008 ވަނަ އަހަރުގެ ސާފް ޗެމްޕިއަންޝިޕް ކާމިޔާބުކުރުމުގައި މުހިންމު ދައުރެއް އަދާކޮށްފައެވެ. ކްލަބު ކޯޗިން ކެރިއަރުގައި މޯހަން ވަނީ ނިއުރޭޑިއަންޓާއި ވެލެންސިއާ އަދި އދ. މަހިބަދޫގެ އިތުރުން ދ. ކުޑަހުވަދޫ ޓީމަށް ފުރަތަމަ ޑިވިޝަނުގައި ކޯޗުކޮށްދީފައެވެ. މިހާރު އިރުޝާދު ދެމުން އަންނަނީ ކްލަބު އީގަލްސް އަށެވެ.

މޯހަން ޕްރޯ ލައިސަންސް ހާސިލުކުރިއިރު، އޭނާ އަކީ އޭއެފްސީގެ ކޯޗިން އިންސްޓްރަކްޓަރެއްވެސް މެއެވެ. އޭނާ ވަނީ ރާއްޖޭގެ އިތުރުން ނޭޕާލާއި ކެމްބޯޑިއާ އަދި މޮންގޯލިއާގައި އޭއެފްސީގެ ސީ ލައިސަންސް ކޯހުގައި ކިޔަވައިދީފައެވެ.

މޯހަންއަކީ ރާއްޖެއިން ޕްރޯ ލައިސަންސް ނެގި ދެވަނަ ކޯޗެވެ. މި ލައިސަންސް އެންމެ ފުރަތަމަ ނެގީ މިހާރު ޓީސީ ސްޕޯޓްސް ކްލަބަށް އިރުޝާދު ދެމުން އަންނަ މުޙައްމަދު ޝާޒްލީ (ޝާޒް) އެވެ.