ފުވައްމުލަކު ސިޓީގައި ގާއިމްކޮށްފައިވާ ނަރުދަމާ ނިޒާމަކީ ރައްޔިތުންނަށް އޮތް ބޮޑު މުސީބާތެއް: މެމްބަރު މުންތާޒު
24 ޖޫން 2020 | ބުދަ 20:06ނަރުދަމާ ނިޒާމު ގާއިމްކޮށްފައިވާ ގޮތުން މުޅި ރަށުތެރޭގައި ނަޖިސް ފެން
ރާއްޖެޓީވީގެ ފަލަސުރުހީ ޕްރޮގްރާމްގައި ފުވައްމުލަކު ދެކުނު ދާއިރާގެ މެމްބަރު މުހައްމަދު މުންތާޒު ވާހަކަދައްކަވަނީ
ކުރީގެ ރައީސް އަބްދުﷲ ޔާމީންގެ ވެރިކަމުގައި ފުވައްމުލަކު ސިޓީގައި ގާއިމްކޮށްފައިވާ ނަރުދަމާ ނިޒާމަކީ ރައްޔިތުންނަށް އޮތް ބޮޑު މުސީބާތެއް ކަމަށް ފުވައްމުލަކު ދެކުނު ދާއިރާގެ މެމްބަރު މުހައްމަދު މުންތާޒު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެމްބަރު މުންތާޒު ވިދާޅުވީ ފުވައްމަލަކު ސިޓީގެ ތަރައްގީއަށް ގިނަ މަސައްކަތްތައް ކުރެވޭއިރު، މިހާރު ރައްޔިތުންނަށް ދިމާވެފައިވާ އެންމެ ބޮޑު ގޮންޖެހުމަކީ ކުރީގެ ރައީސް އަބްދުﷲ ޔާމީންގެ ވެރިކަމުގައި ގާއިމްކޮށްފައިވާ ނަރުދަމާ ނިޒާމުގެ މައްސަލަ ކަމަށެވެ.
މެމްބަރު މުންތާޒު ވިދާޅުވީ ނަރުދަމާ ނިޒާމަކީ ފާއިތުވެދިޔަ ސަރުކާރުން އިންތިޚާބަށް ދިމާކޮށްފައި އަވަސް އަރުވާލައިގެން ނިންމާފައިވާ ޕްރޮޖެކްޓެއް ކަމަށާއި، އެޕްރޮޖެކްޓަށް ދައުލަތުގެ ބަޖެޓުން ގާތްގަނޑަކަށް 300 މިލައަންއަށް ގާތްކުރާ އަދަދަށް ފައިސާ ހަރަދު ކޮށްފައިވާ ކަމަށެވެ. މިއީ ރައްޔިތުންނާއި، ގައުމަށް ދިން ވަރަށް ބޮޑު ގެއްލުމެއްގެ ގޮތުގައި މެމްބަރު ވަނީ ސިފަކުރައްވާފައެވެ.
ނަރުދަމާގެ ޕްރޮޖެކްޓަކީ ރައްޔިތުންނަށް ބޮޑު މުސީބާތެއްކަން ފާހަގަކުރައްވައި މެމްބަރު މުންތާޒު ވިދާޅުވީ ރައްޔިތުންނަށް އޭގެ ފަސޭހައިގެ ބަދަލުގައި އުފުލަން ޖެހެނީ ތަކުލީފު ކަމަށެވެ. އެގޮތުން ނަރުދަމާ ނިޒާމު ގާއިމް ކޮށްފައިވާ ގޮތުން ގިނަ ޖަންގްޝަންތައް ފުރި، ގެތަކާއި މަގުތަކަށް ލީކުވަނީ ނަޖިސްފެން ކަމަށް މެމްބަރު ވިދާޅުވިއެވެ.
މެމްބަރު ވިދާޅުވީ ބޭނުންވަނީ ކިތަންމެ ބޮޑު ހަރަދެއްކޮށްގެން ވިޔަސް އައު ނަރުދަމާ ނިޒާމެއް އަޅައިގެން ވިޔަސް މައްސަލަ ހައްލު ކުރަން ކަމަށެވެ. ފެނަކައާ ހަވާލާދެއްވާ މެމްބަރު މުންތާޒު ވިދާޅުވީ އުންމީދު ކުރަނީ އަވަސް މުސްތަގުބަލެއްގައި މައްސަލަ ހައްލުވެގެން ދިއުން ކަމަށާއި، ލަސްވެގެން ހަމަސް ދުވަހުގެ ތެރޭގައި ހައްލު ލިބޭނެ ކަމަށެވެ.
މީގެ އިތުރުން މުންތާޒު ވިދާޅުވީ ރައްޔިތުންގެ ފައިސާއާ އިހުމާލުވެފައިވާ މީހުން އިންސާފުގެ ކުރިމައްޗަށް ގެންނާނެ ކަމަށެވެ.
މުންތާޒު ވިދާޅުވީ ރައީސް އިބްރާހިމް މުހައްމަދު ސޯލިހު ވެރިކަމަށް ގެނައީ އިންސާފު ގާއިމް ކުރުމަށް ކަމަށާއި، މިސަރުކާރުގައި ރައްޔިތުންނަށް އިންސާފު ހޯދައިދޭނެ ކަމަށެވެ.
