ޣައިރު ޤާނޫނީ އެއްވުންތައް ރޫޅާލެވޭނެ ޤާބިލްކަން ފުލުހުންގެ ކިބައިގައި ހުންނަތަން ދެކެން ބޭނުން: މިނިސްޓަރ އިމްރާން
ކުރިއަށް އޮތްތާންގައި އެކަން ކަށަވަރު ކުރައްވާނެ ކަމަށް ވިދާޅުވި
މުޒާހަރާ ރޫޅާލުމުގައި ފުލުހުން ހަރަކާތްތެރިވަނީ
ޣައިރު ޤާނޫނީ އެއްވުންތައް ރޫޅާލެވޭނެ ޤާބިލްކަން ފުލުހުންގެ ކިބައިގައި ހުންނަތަން ދެކެން ބޭނުންވާކަމަށް ހޯމް މިނިސްޓަރ އިމްރާން އަބްދުﷲ ވިދާޅުވެއްޖެ އެވެ.
އަންގާރަ ދުވަހު މިނިސްޓަރ އިމްރާން ކުރެއްވި ޓްވީޓޭއްގައި ވިދާޅުވެފައިވަނީ އިންސާނީ ކަރާމާތަށް އިސްކަންދީގެން ޕްރޮފެޝަނަލްކޮށް ޣައިރު ޤާނޫނީ އެއްވުންތައް ރޫޅާލެވޭނެ ޤާބިލުކަން ފުލުހުންގެ ކިބައިގައި ހުންނަތަން ދެކެން ބޭނުންވާ ކަމަށެވެ. އަދި ފުލުހުންނަށް ދެވޭ ތަޢުލީމާއި ތަމްރީންތަކުގެ ތެރެއިން ކުރިއަށް އޮތްތާންގައި އެކަން ކަށަވަރު ކުރައްވާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ އިމްރާން ޓްވީޓްކުރައްވާފައި މިވަނީ ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމުގެ ނަމުގައި ހަރަކާތްތައް ހިންގަމުން އަންނަ "ނަވާނަވައި" މޫވްމެންޓުން ރައްޔިތުންގެ މަޖިލިސް އިދާރާ ސަރަޙައްދުގައި ހޯމަ ދުވަހު މުޒާހަރާ ކޮށްފައިވަނިކޮށެވެ. އެ މުޒާހަރާ ރޫޅާލުމުގައި ފުލުހުން ބާރުގެ ބޭރުގެ ބޭނުންކޮށްފައިވާ ގިނަ ބަޔަކުދަނީ ބުނަމުންނެވެ.
