މާފުށީ ބިން ހިއްކުމުގެ މަސައްކަތް އެމްޓީސީސީން ނިންމާލައިފި
23 ޖޫން 2020 | އަންގާރަ 07:18އަމަލީ މަސައްކަތް ފަށާފައި ވަނީ ޑިސެމްބަރު މަހުގެ 25 ވަނަ ދުވަހު
މާފުށީ ބިން ހިއްކުމުގެ މަސައްކަތުގެ ތެރެއިން
ކ. މާފުށީގެ 25 ހެކްޓަރުގެ ބިން ހިއްކުމުގެ މަސައްކަތް މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ) ނިންމާލައިފިއެވެ.
މި މަސައްކަތުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.
އެމްޓީސީސީން ބުނީ މާފުށީ ބިން ހިއްކުމުގެ މަސައްކަތް މި މަހުގެ 14 ވަނަ ދުވަހު ނިންމާލާފައިވާ ކަމަށެވެ. މަޝްރޫއުގެ ދަށުން 25 ހެކްޓަރުގެ ބިން ހިއްކާފައިވާ ކަމަށެވެ. އަދި ހިއްކި ސަރަހައްދު ހިމާޔަތް ކުރުމަަށް ބޭނުންވާ ތޮށި ލުމަށް މި މަހުގެ 25 ވަނަ ދުވަހު ބާޖު އަންނާނެ ކަމަށް ވެސް އެމްޓީސީސީން ބުނެފައިވެއެވެ.
މާފުށީ ބިން ހިއްކާފައި ވަނީ ވަކި ރަށެއް ގޮތަށް، ކޯޒްވޭއަކުން މާފުށްޓާ ގުޅާލާގޮތަކަށެވެ. މިގޮތަށް މާފުށީގެ ބިން ހިއްކާފައި ވަނީ ބޮޑު ބީޗެއް ލިބޭގޮތަށާއި، ބިމަށް އޮތް ބޮޑު ޑިމާންޑަށް ހައްލު ހޯދައިދިނުމަށް ކަމަށް އެ ކުންފުނިން ބުނެއެވެ.
މާފުށީގެ ބިން ހިއްކަން 99.98 މިލިއަން ރުފިޔާއަށް އެމްޓީސީސީއާ ހަވާލުކުރީ މިދިޔަ އަހަރުގެ އޯގަސްޓް މަހުގެ 27 ވަނަ ދުވަހުއެވެ.
