ނަވާނަވައި މުޒާހަރާ: މަސައްކަތްތެރިންގެ ޙައްޤުތަކާއި، އަތޮޅުތެރޭގެ ތަރައްޤީއަށް ގޮވާލައިފި
މުޒާހަރާ ފަށާފައިވަނީ ހޯމަ ދުވަހު 08:30 ގައި މަޖިލިސް އިދާރާ ގޭގެ ކުރިމަތީގައި
ނަވާނަވައިން ކުރިއަށް ގެންދިޔަ މުޒާހަރާ: ގާތްގަނޑަކަށް 10 މީހުން މުޒާހަރާގައި ބައިވެރިވެ އަޑުއުފުލާފައިވޭ
ސިޔާސީ، އިގުތިސާދީ އަދި އިޖްތިމާއީ ގޮތުން ރައްޔިތުން ބާރުވެރިކުރުވުމުގެ ނަމުގައި ހަރަކާތްތައް ހިންގަމުން އަންނަ "ނަވާނަވައި" މޫވްމެންޓުން ރައްޔިތުންގެ މަޖިލިސް އިދާރާ ސަރަޙައްދުގައި މުޒާހަރާ ކޮށްފިއެވެ.
ހޯމަ ދުވަހު 08:30 ގައި މަޖިލިސް އިދާރާ ގޭގެ ކުރިމަތީގައި ބޭއްވި މި މުޒާހަރާގެ ބައިވެރިން މަޖިލިސް ސަރަޙައްދުން ދުރުކޮށް، ފުލުހުން ވަނީ އެ ސަރަޙައްދުގައި ހަރަކާތްތެރިވެފައެވެ. އެއާއެކު މުޒާހަރާގެ ބައިވެރިން ވަނީ މަޖިލިސް އިދާރާ ކުރިމަތީގައި އޮންނަ ގޯޅި (އިންޑިއަން އެމްބަސީ ކުރިމަތީގައި) ފުލުހުން ކޯރޑަން ކޮށްފައިވާ ހިސާބުގައި މުޒާހަރާ ކުރިއަށް ގެންގޮސްފައެވެ.
ގާތްގަނޑަކަށް 10 ބައިވެރިން މުޒާހަރާގައި ބައިވެރިވެފައިވާއިރު، ކޮވިޑް-19 ގެ ސަބަބުން ވަޒީފާ ގެއްލި، ދިރިއުޅޭ ތަނުން ނުކުންނަން މަޖުބޫރުވެފައިވާ މީހުން ޙައްޤުތައް ކަށަވަރު ކޮށްދިނުމަށް މަޖިލީހުން މަސައްކަތް ނުކުރާ ކަމަށް ބުނެ، މުޒާހަރާގެ ބައިވެރިން ވަނީ އެކަމުގެ ކަންބޮޑުވުން ފާޅުކޮށްފައެވެ.
މުޒާހަރާ ކުރިއަށްގެންދާ ސަބަބާއި ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ނަވާނައިގެ ސްޕޯކްސްޕަރސަން ފާތިމަތު ސާއިރާ ވިދާޅުވީ، މި މުޒާހަރާއަކީ ކޮވިޑް-19 އާ ގުޅިގެން އިންކަމް ސަޕޯޓް އެލަވެންސް ލިބުނު މީހުންގެ އަދަދު ދަށްވުމުގެ އިތުރުން އެލަވަންސް ލިބުން ލަސްވުމާއި، އެލަވަންގެ ގޮތުގައި ލިބުނު އަދަދު ދަށްވުމާއި، ކޮވިޑް-19 ގެ ހާލަތުގައި ކުލި ނުދެއްކިގެން ގެތަކުން މީހުން ނެރެމުންދާ މައްސަލާގައި މަޖިލީހުން އެއްވެސް ފިޔަވަޅެއް އެޅިފައި ނުވުމާއި، އަންހެނުންނާއި ކުޑަކުދިންނަށް ރައްކަތެރިކަމަށްކުރާ ހޭދަ ދަށްވުމުގެ ސަބަބުން އެކަމަށް އަޑު އުފުލައި، އެ ޙައްޤުތައް ހޯދައިދިނުމަށް ކުރިއަށްގެންދާ ހަރާކާތެއް ކަމަށެވެ.
ސާއިރާ އިތުރަށް ވިދާޅުވީ، އެކަންތައްތަކަށް މަޖިލީހުގެ މެމްބަރުން އަޑުއުފުލާފައި ނުވާ ކަމަށާއި، މިހާތަނަށްވެސް އެކަމަށް ހައްލެއް ހޯދުމަށް މަޖިލީހުން މަސައްކަތް ކޮށްފައިނުވާ ކަމަށެވެ.
އޭގެ އިތުރުން، މާލެ ސަރަޙައްދު ތަރައްޤީ ކުރުމަށް ކުރާ ހޭދަ އަތޮޅު ތެރެއަށް ނުކުރުމާއި، އަތޮޅު ތެރޭގައި ކޮވިޑް-19 ގެ ޓެސްޓް ހެދޭނެ އިންތިޒާމުތައް ހަމަޖެއްސުމަށްވެސް މުޒާހަރާގެ ބައިވެރިން ގޮވާލާފައިވެއެވެ.
މަޖިލިސް ނިމޭ ގަޑީގައިވެސް މުޒާހަރާ ކުރުމަށް ނިންމާފައިވާއިރު، ނަވާނަވައިން ވަނީ ވިހާވެސް ގިނަ ބަޔަކު މުޒާހަރާ އަށް ދިޔުމަށް އެދިފައެވެ. އަދި އެންމެންވެސް މާސްކު އަޅައިގެން ތިބުމަށާއި، ގައިދުރުކަން ބެހެއްޓުމަށް ނަވާނަވައިން އިލްތިމާސްކުރެއެވެ. އެގޮތުން ހެނދުނު ގަޑީގައި ކުރިއަށް ގެންދިޔަ މުޒާހަރާގައިވެސް ބައިވެރިން ތިބީ މާސްކް އަޅައި، މަސައްކަތްތެރިންގެ ޙައްޤުތަކަށް ގޮވާލާ ބެނަރ ތަކާއި ބޯޑުތައް ހިފައިގެންނެވެ.
މުޒާހަރާ ކުރިއަށް ގެންދިޔަ ސަރަޙައްދުގައި ގިނަ އަދަދެއްގެ ފުލުހުންވެސް ހަރަކާތްތެރިވިއެވެ.
